సమీర, నక్షత్రలకు స్వర్ణాలు

తెలంగాణ సబ్‌ జూనియర్‌ అథ్లెటిక్స్‌లో ‘లక్ష్య’ క్రీడాకారులకు 18 పతకాలు

ఈనాడు సీఎస్‌ఆర్‌ కార్యక్రమం ‘లక్ష్య’ క్రీడాకారులు తెలంగాణ రాష్ట్ర సబ్‌ జూనియర్‌ అథ్లెటిక్స్‌ ఛాంపియన్‌షిప్‌లో సత్తాచాటుతున్నారు. సోమవారం గచ్చిబౌలి స్టేడియంలో ప్రారంభమైన ఈ పోటీల్లో తొలిరోజు ‘లక్ష్య’ అథ్లెట్లు 18 పతకాలు కైవసం చేసుకున్నారు. అందులో 8 స్వర్ణ, 5 రజత, 5 కాంస్య పతకాలు ఉన్నాయి. అండర్‌-12 బాలికల 100 మీటర్ల పరుగులో కరీంనగర్‌ జిల్లాకు చెందిన నక్షత్ర (13.77 సెకన్లు), 600 మీ. పరుగులో సమీర బేగం (1 నిమిషం 52 సెకన్లు) అగ్రస్థానాల్లో నిలిచి పసిడి పతకాలు సొంతం చేసుకున్నారు. అండర్‌-8 బాలికల 50మీ. పరుగులో జాహ్నవి రావు (వరంగల్‌) స్వర్ణం, 300 మీ. పరుగులో జెశ్వెత రావు (వరంగల్‌) రజత పతకాలు సాధించారు. మంచిర్యాలకు చెందిన శ్రీకేతన్‌ అండర్‌-8 బాలుర 50 మీ., 300 మీ. పరుగులో స్వర్ణాలు గెలుచుకున్నాడు. మంచిర్యాల క్రీడాకారులు జ్యోతిర్మయి (అండర్‌-8 బాలికలు, 300 మీ.) స్వర్ణం, సింధ్య జాస్మిన్‌ (అండర్‌-8 బాలికలు, స్టాండింగ్‌ బ్రాడ్‌ జంప్‌) స్వర్ణం, సిద్ధార్థ (అండర్‌-8 బాలురు, బ్రాడ్‌ జంప్‌) రజతం, సిరిజ్ఞ చౌదరి (అండర్‌-12 బాలికలు, 100 మీ.) కాంస్య పతకాలు నెగ్గారు. సిద్దిపేటకు చెందిన అర్షిత (అండర్‌-12 బాలికలు, లాంగ్‌జంప్‌) కాంస్యం, వెంకటేశ్‌ (అండర్‌-12 బాలురు, 400 మీ.) రజత పతకాలు సాధించారు. జడ్చర్ల క్రీడాకారులు అనిల్‌ (అండర్‌-8 బాలురు, స్టాండింగ్‌ బ్రాడ్‌ జంప్‌) స్వర్ణం, రాజశేఖర్‌ (అండర్‌-12 బాలురు, 600 మీ.) రజతం, అరవింద్‌ (అండర్‌-8 బాలురు, 50 మీ.) కాంస్యం, శివకుమార్‌ (అండర్‌-12 బాలురు, లాంగ్‌జంప్‌) కాంస్య పతకాలు గెలుచుకున్నారు. పార్వతి (జడ్చర్ల) అండర్‌-8 బాలికల 50 మీ. పరుగులో కాంస్యం, స్టాండింగ్‌ బ్రాడ్‌ జంప్‌లో రజతం సాధించింది.