ఎవరైనా బ్యాట్‌ను రిపేర్‌ చేసేవారు ఉన్నారా? 

ఆర్చర్‌ మూడేళ్ల కిందటి ట్వీట్‌ వైరల్‌..

ఇంటర్నెట్‌డెస్క్‌: ఇంగ్లాండ్‌తో జరిగిన నాలుగో టీ20లో టీమ్‌ఇండియా ఉత్కంఠ పరిస్థితుల్లో 8 పరుగుల తేడాతో విజయం సాధించిన సంగతి తెలిసిందే. చివర్లో ఇంగ్లాండ్ పేస్‌ బౌలర్‌ జోఫ్రాఆర్చర్‌(18; 8 బంతుల్లో 2x4, 1x6) ధాటిగా ఆడి భారత శిబిరంలో కాస్త ఆందోళన కలిగించాడు. ఈ క్రమంలోనే ఇన్నింగ్స్‌ చివరి ఓవర్‌లో అతడి బ్యాట్‌ విరిగింది. అయితే, ఇప్పుడా విషయం ఆన్‌లైన్‌లో చర్చనీయాంశమైంది. ఎందుకంటే మూడేళ్ల క్రితం అతడు చేసిన ఓ ట్వీటే అందుకు కారణం. 2018 మార్చి 7న ఆర్చర్‌ ఓ ట్వీట్‌ చేస్తూ ‘ఇంగ్లాండ్‌లో ఎవరైనా బ్యాట్‌ను మంచిగా రిపేర్‌ చేసేవాళ్లు ఉన్నారా?’ అని పేర్కొన్నాడు. తాజాగా నాలుగో టీ20లో అతడి బ్యాట్‌ విరగడంతో ఆ ట్వీట్‌ వైరల్‌గా మారింది.

ఇంగ్లాండ్‌ ఇన్నింగ్స్‌ చివరి ఓవర్లో ఆ జట్టు విజయానికి 23 పరుగులు అవసరమయ్యాయి. అప్పుడు భారత విజయం తేలికే అనిపించింది. కానీ, శార్ధూల్‌ వేసిన ఆ ఓవర్‌లో జోర్డాన్‌(12) తొలి బంతికి సింగిల్‌ తీసిచ్చాడు. తర్వాత ఆర్చర్‌.. రెండు, మూడు బంతులను 4, 6గా మలిచాడు. దాంతో భారత శిబిరంలో కలవరం రేపాడు. ఆపై శార్ధూల్‌ వరుసగా రెండు వైడ్లు వేయడంతో ఉత్కంఠ మరింత పెరిగింది. సమీకరణం 3 బంతుల్లో 10 పరుగులకు మారింది. అలాంటి స్థితిలోనే ఆర్చర్‌ నాలుగో బంతిని ఎదుర్కోగా బ్యాట్‌ విరిగింది. అతడు సింగిల్‌ తీశాడు. అయిదో బంతికి జోర్డాన్‌ ఔటయ్యాడు. చివరి బంతికి ఆర్చర్‌ ఒక్క పరుగు కూడా చేయలేకపోయాడు. దాంతో టీమ్‌ఇండియా విజయం సాధించింది.