Shubman Gill: విమర్శలకు కౌంటర్‌.. 12 ఇన్నింగ్స్‌ల తర్వాత గిల్ సెంచరీ

ఇంటర్నెట్ డెస్క్‌: పేలవ ఫామ్‌తో విమర్శలు ఎదుర్కొన్న శుభ్‌మన్‌ గిల్ (Shubman Gill) ఎట్టకేలకు శతకంతో సమాధానం ఇచ్చాడు. వైజాగ్‌ వేదికగా ఇంగ్లాండ్‌తో జరుగుతున్న రెండో టెస్టు మ్యాచ్‌ రెండో ఇన్నింగ్స్‌లో 132 బంతుల్లోనే సెంచరీ పూర్తి చేసుకున్నాడు. భారత జట్టు ఆధిక్యాన్ని 350 పరుగులు దాటించాడు. అతడి కెరీర్‌లో ఇది మూడో శతకం. 12 ఇన్నింగ్స్‌ల తర్వాత మూడంకెల స్కోరు నమోదు చేశాడు. గతేడాది మార్చిలో ఆసీస్‌తో నాలుగో టెస్టులో చివరిసారిగా శతకం చేశాడు. ఏడేళ్ల తర్వాత వన్‌డౌన్‌లో స్వదేశం వేదికగా జరిగిన మ్యాచ్‌లో ఒక భారత బ్యాటర్‌ సెంచరీ సాధించడం విశేషం. చివరిసారిగా 2017లో నాగ్‌పుర్‌లో శ్రీలంకపై ఛెతేశ్వర్ పుజారా శతకం చేశాడు.

రెండో ఇన్నింగ్స్‌లో ఓవర్‌ నైట్‌ 28/0 స్కోరుతో మూడో రోజు ఆటను ప్రారంభించిన టీమ్‌ఇండియాకు ఆదిలోనే ఎదురు దెబ్బ తగిలింది. ఇంగ్లాండ్‌ పేసర్ జేమ్స్‌ అండర్సన్ వరుస ఓవర్లలో ఓపెనర్లు యశస్వి జైస్వాల్ (17), రోహిత్ శర్మ (13)ను పెవిలియన్‌కు పంపాడు. ఆ తర్వాత శ్రేయస్‌ అయ్యర్ (29)తో కలిసి గిల్ ఇన్నింగ్స్‌ను నిర్మించాడు. ఈ సమయంలో రెండుసార్లు లైఫ్‌లు రావడంతో గిల్ బతికిపోయాడు. వచ్చిన అవకాశాలను సద్వినియోగం చేసుకుని విజృంభించాడు. ఆరంభంలో ఆచితూచి ఆడిన అతడు.. కుదురుకున్నాక బ్యాట్‌ను ఝుళిపించాడు. అక్షర్‌తో కలిసి ఐదో వికెట్‌కు 89 పరుగులు జోడించిన అనంతరం షోయబ్‌ బషీర్‌ బౌలింగ్‌లో గిల్‌(104) పెవిలియన్‌ చేరాడు.