SA vs IND: భారత్‌తో తొలి టెస్టు.. పట్టుబిగించిన సఫారీలు.. రెండో రోజు ఆట పూర్తి

సెంచూరియన్‌: సౌతాఫ్రికాతో జరుగుతున్న తొలి టెస్టులో భారత బౌలర్లు తేలిపోయారు. దక్షిణాఫ్రికా బ్యాటర్లు.. టీమ్‌ఇండియా బౌలింగ్‌ను సమర్థంగా ఎదుర్కొన్నారు. దీంతో రెండో రోజు ఆట ముగిసేసరికి సౌతాఫ్రికా.. 256/5 స్కోరుతో మెరుగైనస్థితిలో నిలిచింది. సరైన వెలుతురు లేమి కారణంగా ఆటను 66 ఓవర్ల వద్ద నిలిపివేశారు. ప్రస్తుతం సఫారీలు 11 పరుగుల ఆధిక్యంలో ఉన్నారు. డీన్ ఎల్గర్‌ (140*; 211 బంతుల్లో 23 ఫోర్లు) శతకంతో అదరగొట్టగా.. డేవిడ్ బెడింగ్‌హమ్ (56; 87 బంతుల్లో 7 ఫోర్లు, 2 సిక్స్‌లు) అర్ధ శతకం బాదాడు. ఎల్గర్‌తోపాటు మార్కో జాన్సన్‌ (3*) క్రీజులో ఉన్నాడు.

టోనీ డి జోర్జి (28), మార్‌క్రమ్ (5), కీగన్ పీటర్సన్ (2), వెరినే (4) పరుగులు చేశారు. భారత బౌలర్లలో జస్‌ప్రీత్ బుమ్రా, మహ్మద్ సిరాజ్‌ తలో రెండు వికెట్లు పడగొట్టగా.. ప్రసిద్ధ్‌ కృష్ణకు ఒక వికెట్ దక్కింది. అంతకుముందు 208/8 ఓవర్‌నైట్‌ స్కోరుతో రెండో రోజు ఆటను ప్రారంభించిన భారత్ మరో 37 పరుగులు జోడించి 245 పరుగులకు ఆలౌటైంది. 70 పరుగులతో క్రీజులోకి వచ్చిన కేఎల్ రాహుల్‌ (101) శతకం బాది చివరి వికెట్‌గా వెనుదిరిగాడు.