sky lift: నానక్‌రాంగూడ అగ్నిప్రమాదం.. 14మందిని కాపాడిన ‘బాహుబలి’ క్రేన్‌ ఇదే..

హైదరాబాద్‌‌: హైదరాబాద్‌లోని నానక్‌రామ్‌గూడలో గ్రాండ్‌ స్పైసీ బావర్చి హోటల్‌లో జరిగిన అగ్ని ప్రమాదంలో సహాయక చర్యలకు అధికారులు బ్రాంటో స్కైలిఫ్ట్‌ (brontoskylift)ను రంగంలోకి దించిన విషయం తెలిసిందే. సకాలంలో దీన్ని తీసుకురావడం వల్ల ప్రాణ నష్టం తప్పింది. భవనంలో దట్టమైన పొగలు కమ్ముకోవడంతో భయంతో టెర్రస్‌పై చిక్కుకున్న 14మందిని కాపాడటంలో ఈ స్కైలిఫ్ట్‌ కీలక పాత్ర పోషించింది. దీంతో ఈ స్కై లిఫ్ట్‌ క్రేన్‌ అందరి దృష్టిని ఆకర్షిస్తోంది. ఈ భారీ క్రేన్‌(బాహుబలి క్రేన్‌)తో భవనం అద్దాలు పగలగొట్టడం, టెర్రస్‌పై చిక్కుకున్న వారిని కిందకు దించడం వంటివి చుట్టుపక్కల ఉన్నవారంతా ఎంతో ఆసక్తిగా గమనించారు. అయితే, ఈ బ్రాంటో స్కైలిఫ్ట్‌ను తెలంగాణ ప్రభుత్వం గతంలోనే కొనుగోలు చేసింది.

ప్రస్తుతం హైదరాబాద్‌ నగర శివారు ప్రాంతాల్లో ఎక్కడ చూసినా బహుళ అంతస్తుల (అద్దాల మేడలు) భవనాలు పెరగడంతో భవిష్యత్తులో ఎదురయ్యే ప్రమాదాలను దృష్టిలో ఉంచుకొని ప్రభుత్వం కొనుగోలు చేసింది. ఫిన్‌లాండ్‌ నుంచి రెండు భారీ స్కైలిఫ్ట్‌లను హైదరాబాద్‌కు తీసుకొచ్చింది. మాదాపూర్‌, సికింద్రాబాద్‌ అగ్నిమాపక కేంద్రాల్లో ఈ బ్రాంటో స్కైలిఫ్ట్‌లను ఉంచినట్టు అధికారులు వెల్లడించారు. దాదాపు 54 మీటర్ల ఎత్తు.. 18 అంతస్తుల వరకు రెస్క్యూ ఆపరేషన్‌ నిర్వహించగలిగే సమర్థత దీనికి ఉంటుందని తెలిపారు. దీన్ని ఆపరేట్‌ చేయడం కూడా అంత కష్టమేమీ కాదని అధికారులు చెబుతున్నారు.