నేపథ్య గాయని పి.సుశీలకు ఘంటసాల శతజయంతి ప్రత్యేక పురస్కారం

వేడుకలను ప్రారంభించనున్న సీజేఐ జస్టిస్‌ ఎన్‌వీ రమణ  

ఈనాడు-హైదరాబాద్‌, రవీంద్రభారతి-న్యూస్‌టుడే: అమర గాయకుడు ఘంటసాల వేంకటేశ్వరరావు శత జయంతి వేడుకల సందర్భంగా నేపథ్య గాయని పి.సుశీలకు ‘ఘంటసాల శతజయంతి ప్రత్యేక పురస్కారం’ అందజేయనున్నట్లు నిర్వాహకులు గురువారం ఒక ప్రకటనలో తెలిపారు. శనివారం మధ్యాహ్నం 3 గంటలకు హైదరాబాద్‌ నగరంలోని రవీంద్రభారతిలో నిర్వహించనున్న కార్యక్రమాన్ని సుప్రీంకోర్టు ప్రధాన న్యాయమూర్తి జస్టిస్‌ ఎన్‌వీ రమణ ప్రారంభిస్తారని వేడుకల నిర్వహణ కమిటీ అధ్యక్షుడు మండలి బుద్ధప్రసాద్‌, ఉపాధ్యక్షుడు కె.వి.రమణాచారి, ‘సంగమం ఫౌండేషన్‌’ వ్యవస్థాపకులు సంజయ్‌కిషోర్‌  తెలిపారు. ఘంటసాలతో అనుబంధమున్న సీనియర్‌ నటులు కృష్ణవేణి, జమున, మురళీమోహన్‌ తదితరులను సత్కరించనున్నట్లు వారు పేర్కొన్నారు. ఈ సందర్భంగా ఘంటసాల పాటల సంగీత విభావరి ఉంటుందని సంజయ్‌ కిషోర్‌ తెలిపారు.