కొండాపూర్‌, ఖమ్మం ఆసుపత్రులకు వైద్య మంత్రి ప్రశంసలు

ఈనాడు, హైదరాబాద్‌: ఒకప్పుడు నెలకు కేవలం 20 కాన్పులు చేసిన కొండాపూర్‌ ప్రభుత్వ దవాఖానాలో ఇప్పుడు నెలకు 250 ప్రసవాలు జరుగుతుండటం అభినందనీయమని వైద్య, ఆరోగ్య శాఖ మంత్రి హరీశ్‌రావు ప్రశంసించారు. గడిచిన 4 నెలల్లో ఈ ఆసుపత్రిలో 990 కాన్పులు చేయగా.. అందులో 559 సహజ ప్రసవాలు జరగడం గొప్ప విషయమన్నారు. సిజేరియన్‌ కాన్పులను 45 శాతం నుంచి 30 శాతానికి తగ్గించిన ఆసుపత్రి సూపరింటెండెంట్‌ డాక్టర్‌ వరదాచారి, సిబ్బందిని మంత్రి అభినందించారు. ఖమ్మంలోని మాతా శిశు సంరక్షణ కేంద్రంలోనూ ఏప్రిల్‌లో 599 ప్రసవాలు జరిగితే అందులో 359 సహజ కాన్పులు కావడం ప్రశంసనీయమన్నారు. సహజ ప్రసవాలను 40 శాతం నుంచి 61 శాతానికి పెంచేందుకు కృషిచేసిన జిల్లా కలెక్టర్‌, వైద్య సిబ్బందికి అభినందనలు తెలిపారు. ఇదే స్ఫూర్తిని కొనసాగించాలని సూచించారు.