నేడు అతి భారీ వర్షాలు

ఈనాడు, హైదరాబాద్‌: రెండు ఉపరితల ఆవర్తనాలతో రుతుపవనాలు చురుగ్గా కదులుతున్నందున రాష్ట్రంలో గురువారం అతి భారీ, శుక్రవారం భారీ వర్షాలు అక్కడక్కడ కురిసే అవకాశాలున్నాయని వాతావరణశాఖ బుధవారం మీడియాకు తెలిపింది. తూర్పు, పశ్చిమ భారత ప్రాంతాల మధ్య గాలుల్లో అస్థిరత ఏర్పడి ఉత్తర భారత ప్రాంతమంతా 3.1 కిలోమీటర్ల ఎత్తున ఉపరితల ఆవర్తనం ఏర్పడింది. మరోవైపు ఒడిశా, ఛత్తీస్‌గఢ్‌లపై మరో ఉపరితల ఆవర్తనం 1.5 కిలోమీటర్ల ఎత్తున ఉంది. వీటి ప్రభావంతో రాష్ట్రంలో విస్తారంగా వర్షాలు కురుస్తున్నాయి. బుధవారం ఉదయం నుంచి రాత్రి వరకు 12 గంటల వ్యవధిలో పలు ప్రాంతాల్లో వర్షాలు కురిశాయి.