కృష్ణాలో స్వల్పంగా తగ్గిన ప్రవాహం

 సాగర్‌ నుంచి కొనసాగుతున్న నీటి విడుదల

ఈనాడు, హైదరాబాద్‌: కృష్ణా నదిలో ప్రవాహం స్వల్పంగా తగ్గింది. నాగార్జునసాగర్‌ వద్ద గురువారం రాత్రి సమయానికి ఇన్‌ఫ్లో 1.71 లక్షలకు చేరుకుంది. ప్రస్తుతం 16 గేట్లను ఐదు అడుగుల మేర ఎత్తి నీటిని దిగువకు విడుదల చేస్తున్నారు. విద్యుత్‌ ఉత్పత్తి కేంద్రాలు, కాల్వలు కలిపి మొత్తం 1.78 లక్షల క్యూసెక్కులు దిగువకు వెళ్తున్నట్టు అధికారులు తెలిపారు. శ్రీశైలం వద్ద ఇన్‌ఫ్లో 2.93 లక్షల క్యూసెక్కులు ఉండగా, ఏడు గేట్లను పది అడుగుల మేర ఎత్తి 1.94 లక్షల క్యూసెక్కులు దిగువకు వదులుతున్నారు. రెండు రాష్ట్రాల జల విద్యుదుత్పత్తి, పోతిరెడ్డిపాడు, కల్వకుర్తి, మల్యాల-హంద్రీనీవా ఎత్తిపోతలకు కలిపి 2.62 లక్షల క్యూసెక్కులు విడుదల చేస్తున్నారు. గోదావరిలో జయశంకర్‌ భూపాలపల్లి జిల్లా కాళేశ్వరం ఎత్తిపోతల పథకం పరిధిలోని లక్ష్మీ(మేడిగడ్డ) బ్యారేజీ దిగువన ప్రవాహం కొనసాగుతోంది.