Published : 23/12/2022 19:06 IST

రింగుల జుట్టును కాపాడుకోవాలంటే..!

జుట్టు తేమను కోల్పోవడానికి, నిర్జీవమైపోవడానికి వాతావరణం కూడా ఓ కారణమే. ప్రత్యేకించి శీతాకాలంలో వీచే చల్లగాలులు, మంచు వల్ల జుట్టు తేమను కోల్పోతుంది. అదే కర్లీ హెయిర్ అయితే మరిన్ని సమస్యలు..! ఈ క్రమంలో బయటకు వెళ్లేటప్పుడు జుట్టును కవర్ చేసుకునేలా క్యాప్ ధరించడం, స్కార్ఫ్ కట్టుకోవడం మంచిది. అదేవిధంగా ఈ చలికాలంలో కర్లీ హెయిర్‌ను కాపాడుకోవడానికి మరికొన్ని సహజసిద్ధమైన చిట్కాల్ని సైతం ప్రయత్నించచ్చు.

⚛ సాధారణంగా వాతావరణం చల్లగా ఉన్నప్పుడు నీరు తాగాలనిపించదు. కానీ రింగుల జుట్టును ఆరోగ్యంగా ఉంచుకోవాలంటే రోజూ తగినంత నీటిని తాగే విషయంలో అశ్రద్ధ చేయకూడదు.

⚛ అలాగే కనీసం ఏడెనిమిది గంటలు ఏ ఆలోచనలు లేకుండా ప్రశాంతంగా నిద్రపోవడానికీ ప్రాధాన్యమివ్వాలి. తద్వారా ఒత్తిడి, ఆందోళనలకు గురికాకుండా ప్రశాంతంగా ఉండచ్చు.

⚛ అప్పుడప్పుడూ కొన్ని చుక్కల హెయిర్ సీరంను రాసుకోవడం వల్ల కూడా కర్లీ హెయిర్‌ను సంరక్షించుకోవచ్చు.

⚛ రింగుల జుట్టు ఉన్న వారు ఎక్కువగా బాధపడేది చిట్లిన చివర్లతోనే! దానివల్ల కేశాలు నిర్జీవంగా కనిపిస్తాయి కూడా. కాబట్టి ప్రతి మూడు నెలలకోసారి చివర్లను కత్తిరిస్తూ ఉండాలి. ఇలా చేయడం వల్ల జుట్టు త్వరగా ఎదగడంతో పాటు ఆరోగ్యంగానూ ఉంటుంది.

⚛ జుట్టుకు తేమనందించడంలో కలబంద చక్కగా పని చేస్తుంది. కాబట్టి వారానికి రెండుసార్లు కలబంద గుజ్జును జుట్టు కుదుళ్ల నుంచి చివర్ల వరకు పట్టించి ఆపై 20 నిమిషాల తర్వాత తలస్నానం చేయడం వల్ల చక్కటి ఫలితం ఉంటుంది.

⚛ జుట్టు తేమను కోల్పోకుండా చేయడంలో తేనె పాత్ర కీలకం. అందుకే జుట్టుకు పోషణనందించే కండిషనర్లు, డీప్ కండిషనర్లతో పాటు క్లెన్సర్‌లలోనూ కాస్త తేనెను కలుపుకొని అప్లై చేసుకుంటే జుట్టు పొడిబారకుండా జాగ్రత్తపడచ్చు.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.