Pakistan: పాకిస్థాన్‌లో చైనా ఇంజినీర్లపై మజీద్‌ బ్రిగేడ్‌ దాడి..!

ఇంటర్నెట్‌డెస్క్‌: పాకిస్థాన్‌(Pakistan)లో చైనా(China)కు చెందిన ఇంజినీర్ల వాహనశ్రేణిపై ఉగ్రదాడి జరిగింది. బలూచిస్థాన్‌లోని అత్యంత కీలకమైన గ్వాదర్‌లో ఈ ఘటన చోటు చేసుకొంది. స్థానికంగా ఉన్న ఫకీర్‌ కాలనీ వంతెనపైకి చైనా ఇంజినీర్లకు చెందిన ఏడు వాహనాలు చేరుకోగానే రెబల్స్‌ కాల్పులు జరిపారు. ఈ దాడికి తాము బాధ్యత వహిస్తున్నట్లు బలూచ్‌ లిబరేషన్‌ ఆర్మీకి చెందిన మజీద్‌ బ్రిగేడ్‌ పేరిట ఓ ప్రకటన విడుదలైంది. దాదాపు రెండు గంటల పాటు కాల్పులు చోటుచేసుకున్నాయి. ఒక చైనా ఇంజినీరు.. భద్రతా సిబ్బంది ఒకరు గాయపడినట్లు సమాచారం. దాడికి పాల్పడిన ఇద్దరు ముష్కరులను మట్టుబెట్టారు. 

పాక్‌ స్వాతంత్ర్య దినోత్సవానికి (ఆగస్టు 14) ఒక రోజు ముందు ఈ దాడి జరగడం గమనార్హం. తాజా దాడులతో గ్వాదర్‌ పోర్టుకు వెళ్లే అన్ని మార్గాలను మూసివేశారు. ఈ దాడితో పాకిస్థాన్‌లోని చైనా దౌత్యకార్యాలయం అప్రమత్తమైపోయింది. పాక్‌లోని బలూచిస్థాన్‌, సింధ్‌ ప్రావిన్స్‌ల్లోని చైనీయులు తదుపరి ఆదేశాలు వచ్చేవరకు ఇళ్లలోనే ఉండిపోవాలని కోరింది.

గత 100 ఏళ్లలో చూడని ఘోరం : అమెరికా ఫైర్‌ డిపార్ట్‌మెంట్‌

పాకిస్థాన్‌లోని చైనా వాసులపై ఇటీవల కాలంలో దాడులు పెరిగిపోయాయి. ముఖ్యంగా గ్వాదర్‌ పోర్టుపై చైనా పెత్తనం చేయడంతో స్థానికులు ఆగ్రహంగా ఉన్నారు.  గతేడాది మే నెలలో ఓ మహిళ కరాచీలోని విశ్వవిద్యాలయం సమీపంలో చైనీయులు ప్రయాణిస్తున్న బస్సుపై ఆత్మాహుతి దాడికి పాల్పడింది. ఈ దాడి కూడా బలూచిస్థాన్‌ లిబరేషన్‌ ఆర్మీనే చేయించింది. ఇక 2021లో చైనా ఇంజినీర్లను తీసుకెళుతున్న బస్సుపై బాంబుదాడి జరిగింది. దీనిలో 13 మంది చనిపోయారు. ఈ దాడిలో మృతులకు పాకిస్థాన్‌ కొన్ని మిలియన్‌ డాలర్ల నష్టపరిహారం చెల్లించాల్సి ఉంది. అంతేకాదు.. చైనా దర్యాప్తు బృందాలు స్వయంగా పాక్‌కు వచ్చి విచారణ జరిపాయి. అదే ఏడాది ఏప్రిల్‌లో క్వెట్టాలో ఓ విలాసవంతమైన హోటల్‌పై కూడా బాంబుదాడి చేసి చైనా దౌత్యవేత్తను చంపేశారు.