Trump: ఎంగిలి పిజ్జా.. ఎవరికి కావాలి.. ట్రంప్‌ మార్క్‌ ఆఫర్‌..!

ఇంటర్నెట్‌డెస్క్‌: చేతిలో చాటంత పిజ్జా పెట్టుకొని.. దానిలోని ఓ ఎంగిలి ముక్కను మాత్రమే తీసి ఎవరికైనా కావాలా అని అడిగితే ఎలా ఉంటుంది.. ఇలాంటి వెకిలిపనే చేశారు అమెరికా మాజీ అధ్యక్షుడు డొనాల్డ్‌ ట్రంప్‌( Donald Trump). తన అభిమానులకు ఎంగిలి పిజ్జా ముక్కను ఆఫర్‌ చేశారు. ఈ ఘటన అమెరికాలోని ఫోర్ట్‌మేయర్స్‌లో చోటు చేసుకొంది. దీనికి సంబంధించిన వీడియోను ఓ రిపోర్టరు ట్విటర్‌లో షేర్‌ చేయడంతో వైరల్‌గా మారింది. 

ట్రంప్‌ ఫోర్ట్‌మేయర్స్‌లోని లీ కౌంటీ అనే ప్రాంతంలో రిపబ్లికన్‌ పార్టీ తరపున ఓ కార్యక్రమంలో పాల్గొని తిరుగు ప్రయాణంలోని డౌన్‌టౌన్‌ హౌస్‌ ఆఫ్‌ పిజ్జా అనే దుకాణం వద్ద ఆగారు. ట్రంప్‌ అక్కడికి వచ్చిన విషయం తెలుసుకొని సుమారు 100 మంది అభిమానులు పరిగెత్తుకొంటూ వచ్చారు. ఆ తర్వాత ట్రంప్‌ ఓ పెద్ద పిజ్జాను తీసుకొని దానిలో ఓ స్లైస్‌ను అభిమానుల వైపు చూపిస్తూ ‘‘నేను కొరికిన ఈ ముక్క ఎవరైనా తింటారా..?’’ అని అడిగారు. ఆ తర్వాత పిజ్జా ముక్కను కొరికి తిన్నారు. ట్రంప్‌ ఆఫర్‌ విని ఆయన వీరాభిమానులు కూడా కంగుతున్నారు. ఆ తర్వాత వారు ‘నో’ అని పెద్దగా అరిచారు. 

ట్రంప్‌ ఫాస్ట్‌ఫుడ్‌ను ఇష్టంగా ఆరగిస్తారని ఆయన అభిమానులందరికీ తెలుసు. అందులోనూ పిజ్జా అంటే ఆయనకు మరింత ప్రీతి. విదేశీ ప్రయాణాల సమయంలో కూడా ఆయన విమానంలో పిజ్జాలు ఉండాల్సిందేనని సహాయకులు చెప్పేవారు.