అమెరికాలో సామాన్యుడికి రూ.6,250 కోట్ల లాటరీ

అమెరికాలోని వాషింగ్టన్‌ రాష్ట్రంలో ఓ వ్యక్తి సుమారు రూ.6,250 కోట్లకుపైగా (754.6 మిలియన్‌ డాలర్లు) సొమ్మును లాటరీలో గెలుచుకున్నారు. పవర్‌బాల్‌ లాటరీ గేమ్‌లో ఆ వ్యక్తి ఈ భారీ జాక్‌పాట్‌ను సొంతం చేసుకున్నారు. ఒక టికెట్‌.. మొత్తం ఆరు నంబర్ల(05, 11, 22, 23, 69, 07)తో సరిపోలిందని.. దీని మొత్తం విలువ రూ.6,250 కోట్లకుపైనే అని లాటరీ నిర్వాహకులు సోమవారం రాత్రి ఓ ప్రకటనలో తెలిపారు. విజేతను గుర్తించాల్సి ఉంది. జాక్‌పాట్‌ నగదు మొత్తాన్ని విజేతకు విడతలవారీగా చెల్లిస్తారు. తొలుత కొంతభాగం ఇచ్చేస్తారు. మిగిలిన మొత్తాన్ని గెలిచిన సమయం నుంచి 29 సంవత్సరాల వరకు దశల వారీగా చెల్లిస్తారు. గెలుచుకున్న మొత్తానికి సంవత్సరానికి 5 శాతం చొప్పున వడ్డీని జతచేస్తారు. విజేత అందుకు అంగీకరించని పక్షంలో 754.6 మిలియన్‌ డాలర్ల జాక్‌పాట్‌ మొత్తం కాస్తా 407.2 మిలియన్‌ డాలర్లకు తగ్గుతుంది. ఆ సొమ్ము అంతటినీ విజేత చేతికి ఒకేసారి అందజేస్తారు. అమెరికా లాటరీ చరిత్రలో ఇది తొమ్మిదో అతిపెద్ద లాటరీ అని నిర్వాహకులు చెబుతున్నారు.