బంగారం కింద కోట్ల ఏళ్లనాటి మట్టీమశానం

దిల్లీ: ప్రపంచంలోకెల్లా అతిపెద్ద బంగారం ఖనిజ నిక్షేపాల కింద అత్యంత పురాతన హిమానీనద అవశేషాలను కనుగొన్నట్లు దక్షిణాఫ్రికా, అమెరికా శాస్త్రవేత్తలు ప్రకటించారు. దక్షిణాఫ్రికాలో బయటపడిన ఈ అవశేషాలు 290 కోట్ల ఏళ్లనాటి హిమానీనదాల సంబంధించినవి. మంచు గడ్డగా ఉండే హిమానీనదం కరిగి నీరయ్యేటప్పుడు రాళ్లూమట్టీ కొట్టుకువస్తాయి. దక్షిణాఫ్రికాలో బయటపడినవి సరిగ్గా ఆ శిథిలాలే. వాటిని కనుగొన్న ప్రాంతం ఒకప్పుడు దక్షిణ ధ్రువానికి దగ్గరగా ఉండి క్రమేణా పైకి జరిగి ఉండవచ్చు. లేదా యావత్‌ భూగోళం మంచు బంతిలా మారి వాతావరణంలో కర్బనం, మీథేన్‌ పాళ్లు తగ్గి వ్యతిరిక్త గ్రీన్‌హౌస్‌ ప్రభావం ఏర్పడి ఉండవచ్చు. ఆ సమయంలో మంచు కప్పిన రాళ్లు, మట్టి ఇప్పుడు బయటపడి ఉండవచ్చని శాస్త్రవేత్తలు ప్రతిపాదిస్తున్నారు.