డ్రైవర్‌ లేని బస్సులూ వచ్చేశాయ్‌!

శాన్‌ఫ్రాన్సిస్కోలో ఉచిత ప్రయాణం

శాన్‌ఫ్రాన్సిస్కో: అమెరికాలోని శాన్‌ఫ్రాన్సిస్కో నగరం రోబో ట్యాక్సీలు, డ్రైవర్‌ లేని బస్సులతో ప్రయోగాలు మొదలుపెట్టింది. రవాణా, ప్రయాణికుల భద్రతాపరమైన సమస్యలు ఉన్నా నగరంలో రోబో ట్యాక్సీ సేవలను అనుమతించిన వారం రోజులకే అధికారులు డ్రైవర్‌ రహిత స్వయంచాలిత బస్సు సేవలకూ పచ్చజెండా ఊపారు. ఈ విద్యుత్తు బస్సు శాన్‌ఫ్రాన్సిస్కో నగరం వద్ద సముద్రంలోని ట్రెజర్‌ ఐలాండ్‌లో ప్రయోగాత్మకంగా మొదలైంది. 2,000 మంది నివసించే ఈ దీవిలోని నివాస ప్రాంతాలను మార్కెట్‌ ప్రాంతంతో కలిపే ఈ బస్సులో ప్రయాణాలు ఉచితం. ఒకేసారి 10 మంది ప్రయాణికులను తీసుకెళ్లే ఈ బస్సు ఉదయం 9 గంటల నుంచి సాయంత్రం 6 గంటల వరకు తిరుగుతుంది. డ్రైవర్‌ కానీ, స్టీరింగ్‌ వీల్‌ కానీ ఉండని ఈ బస్సులో రిమోట్‌ కంట్రోల్‌తో ఒక అటెండెంట్‌ మాత్రం ఉంటారు. అత్యవసర పరిస్థితిలో బస్సును ఆపడమే కాకుండా ప్రయాణికులకు ఆయన భరోసా ఇస్తాడు. డ్రైవర్‌ రహిత బస్సు కన్నా ముందు కాలిఫోర్నియా అధికారులు శాన్‌ఫ్రాన్సిస్కో నగరంలో క్రూజ్‌, వేమో అనే రెండు రోబో ట్యాక్సీ కంపెనీలను అనుమతించారు. వీటిలో క్రూజ్‌ సంస్థ జనరల్‌ మోటార్స్‌ కంపెనీ అనుబంధ సంస్థ. ఈ కంపెనీకి చెందిన రోబో ట్యాక్సీ గురువారం రాత్రి ఒక అగ్నిమాపక వాహనాన్ని ఢీకొనడంతో అందులోని ప్రయాణికుడు ఆసుపత్రి పాలయ్యాడు. రోబో ట్యాక్సీలు హఠాత్తుగా ఆగుతున్నాయని, రవాణాకు ఆటంకాలు కలిగిస్తున్నాయని ఆరోపణలు రావడంతో మరిన్ని రోబో ట్యాక్సీ సంస్థలకు ఇప్పుడే అనుమతులు ఇవ్వకూడదని నిర్ణయించారు. అయినా శాన్‌ఫ్రాన్సిస్కోలో డ్రైవర్‌ లేని బస్సుతో ప్రయోగాన్ని అనుమతించారు. ఈ బస్సులో అటెండెంట్‌ ఉంటారు కాబట్టి ప్రమాదం జరగదని భావిస్తున్నారు.