బాల్టిక్‌ ప్రాంతంలో జీపీఎస్‌ జామింగ్‌

ఐరోపాలో వందల విమానాలపై ప్రభావం

ఇంటర్నెట్‌ డెస్క్‌: బాల్టిక్‌ సముద్ర తీర ప్రాంతంలోని ఐరోపా దేశాల్ని జీపీఎస్‌ సిగ్నల్‌ సమస్య పీడిస్తోంది. గగనతలంలో ఉన్న విమానాలకు నకిలీ సంకేతాలు పంపి వాటి జాడను తప్పుగా చూపెడుతున్నాయంటూ ప్రముఖ ‘న్యూస్‌వీక్‌’ వార్తా సంస్థ ఇటీవల ఓ కథనాన్ని ప్రచురించింది. దీని ప్రకారం ఐరోపాలోని బాల్టిక్‌ సముద్రంతోపాటు నాటో దేశాల సమీపంలోకి వచ్చే పౌర విమానాలు అధికంగా జామింగ్‌కు గురవుతున్నాయని తెలిపింది. కేవలం రెండు రోజుల్లో 1,614 విమానాలు జామింగ్‌కు గురయినట్లు పేర్కొంది. పోలండ్‌, ఫిన్లాండ్‌, దక్షిణ స్వీడన్‌ ప్రాంతాల్లో ఈ సమస్య అధికంగా ఉందని వివరించింది. ఇది సాధారణంగా జరిగే జీపీఎస్‌ జామింగ్‌ కాదని.. గతంలో ఎన్నడూ లేనంతగా జరుగుతోందని వెల్లడించింది. ఇదే సమయంలో జీపీఎస్‌ వ్యవస్థను నిలిపివేసే సామర్థ్యం రష్యాకు ఉందని స్వీడన్‌ సైన్యం ఇటీవల అనుమానం వ్యక్తం చేయడం గమనార్హం.