Alcoholic: మద్యం ఒక్కసారి తాగినా.. బానిసలయ్యే ముప్పు!

బెర్లిన్‌: ‘నేనేమీ రోజూ తాగట్లేదు.. విందులు, వినోదాల సమయంలోనే తాగుతున్నా. మద్యపానంపై నాకు నిగ్రహం ఉంది’ అని ఎవరైనా అనుకుంటే.. వారు పొరపడుతున్నట్లేనని జర్మనీ పరిశోధకులు తాజాగా తేల్చిచెప్పారు. మద్యం ఒక్కసారి తాగినా.. జీవితాంతం దానికి బానిసలుగా మారే ముప్పుంటుందని హెచ్చరించారు. ఎలుకలు, పళ్ల ఈగల్లో ఆల్కహాల్‌ ప్రభావంపై వారు విస్తృత స్థాయిలో అధ్యయనం చేశారు. ఒక్కసారి మద్యం ప్రభావానికి గురైనా.. నాడీకణాల నిర్మాణంలో మార్పులు చోటుచేసుకునేందుకు అవకాశాలున్నట్లు అందులో తేల్చారు. ముఖ్యంగా నాడీకణాల్లోని సినాప్స్‌, మైటోకాండ్రియాల పనితీరును ఆల్కహాల్‌ (ఒకే ఒక్క మోతాదులోనే) మార్చగలుగుతున్నట్లు వారు తెలిపారు. ఫలితంగా వ్యక్తులు మద్యానికి బానిసలుగా మారే ముప్పు పెరుగుతున్నట్లు చెప్పారు.