murder: హంతకులకు అడ్రస్‌ చెప్పిన ఇన్‌స్టా పోస్టు.. మోడల్‌ హత్యలో కీలక విషయాలు

ఇంటర్నెట్‌డెస్క్‌: ఆ దేశంలోని అందగత్తెల్లో ఆమె ఒకరు.. ఆపై సోషల్‌ మీడియా స్టార్‌. ఈ క్రమంలో సదరు బ్యూటీ చేసిన ఓ పోస్టే ఆమెకు ప్రాణాంతకంగా మారింది. తన కోసం గాలిస్తున్న హంతకులకు చిరునామా ఇచ్చినట్లైంది. కొద్ది సేపట్లోనే ఆమెపై దుండగులు కాల్పులు జరిపారు. ఈ ఘటన ఈక్వెడార్‌లో జరిగింది. అత్యంత నాటకీయంగా మోడల్‌ లాండీ పరాగా గోయ్‌బురో హత్యకు గురైంది. అసలేం జరిగిందంటే..

లాండీ పరాగా ఈక్వెడార్‌లోని ఓ రెస్టారెంట్‌లో భోజనం చేస్తున్న ఫొటోను సోషల్‌ మీడియాలో పోస్టు చేసింది. దాంతో ఆ మోడల్‌ను చంపడానికి కాపు కాసిన ఇద్దరు దుండగులు ఆ పోస్టు ద్వారా ఆమె ఎక్కడ ఉన్నది తెలుసుకున్నారు. వెంటనే ఆ రెస్టారెంట్‌కు చేరుకున్నారు. లాండీ తన స్నేహితుడితో మాట్లాడుతుండగా దుండగులు తుపాకులతో లోపలికి ప్రవేశించి ఆమెపై కాల్పులకు పాల్పడ్డారు. దీంతో ఆమె అక్కడికక్కడే ప్రాణాలు కోల్పోయింది. ఈ ఘటనకు సంబంధించిన దృశ్యాలు సీసీ కెమెరాలో రికార్డ్‌ అయ్యాయి.

లాండీ పరాగా మిస్‌ ఈక్వెడార్‌ కంటెస్టెంట్‌. ఆమె ఇన్‌స్టాగ్రామ్‌ స్టార్‌. ఆమెకు మాదకద్రవ్యాల డీలర్‌ లియోనార్డో నోరెరోతో అఫైర్‌ ఉన్నట్లు సమాచారం. గతేడాది జైల్లో జరిగిన ఓ ఘటనలో అతడు ప్రాణాలు కోల్పోయాడు. నోరెరో భార్య ఈ హత్యకు కుట్ర పన్నినట్లు పోలీసులు అనుమానం వ్యక్తం చేస్తున్నారు.