Nigeria: నైజీరియాలో బందిపోట్ల దాడి.. వందల మంది మృతి..!

ఇంటర్నెట్‌డెస్క్‌: నైజీరియాలో బందిపోట్లు నరమేధం సృష్టిస్తున్నారు. మంగళవారం నుంచి గురువారం మధ్య ప్రజలపై పలుమార్ల దాడులు చేసి దోపిడీలకు పాల్పడ్డారు. ఈ ఘటనల్లో కనీసం 200 మంది ప్రాణాలు కోల్పోయారు. గత సోమవారం ఇక్కడి సైనిక దళాలు అడవుల్లోని సాయుధులపై దాడి చేసి 100 మందిని మట్టుబెట్టాయి. దీనికి ప్రతిగా వారు జంఫారా రాష్ట్రంలో దాడులకు తెగబడ్డారు. ఈ క్రమంలో దాదాపు 100 మంది చనిపోయి ఉండొచ్చని తొలుత భావించినా.. ఆ తర్వాత మృతుల సంఖ్య 200కు చేరింది. భారీ ఆయుధాలతో మోటార్‌సైకిళ్లపై వచ్చిన ముష్కరులు ఇళ్లను దహనం చేయడంతోపాటు మనుషుల్ని ఊచకోత కోశారు. ఈ క్రమంలో 2,000 పశువులను దొంగిలించారు.

ఇక్కడి క్రిమినల్‌ గ్యాంగ్‌లతో ప్రభుత్వ దళాలకు ఘర్షణలు జరుగుతున్నాయి. ప్రభుత్వం వీరిని బందిపోట్లుగా పేర్కొంది.  ప్రభుత్వ దళాల దాడులను తప్పించుకొనేందుకు  ఈ బందిపోట్లు జంఫారా రాష్ట్రం వైపు వెళ్లినట్లు స్థానిక మీడియా వెల్లడించింది. ఈ దాడి ఘటనపై నైజీరియా అధ్యక్షుడు మహమ్మద్‌ బుహారీ మాట్లాడుతూ ‘సాయుధులపై పోరాటంలో ప్రభుత్వ దళాలు వెనక్కి తగ్గేది లేదు. తాజా దాడి బందిపోట్ల నిస్పృహను తెలియజేస్తోంది’ అని పేర్కొన్నారు. ఈ బందిపోట్లను కూడా ఉగ్రవాదులగా ప్రకటిస్తూ కఠిన వైఖరి అనుసరిస్తామని అక్కడి ప్రభుత్వం బుధవారం ప్రకటించింది.