Taiwan: తైవాన్‌ అధ్యక్ష ఎన్నికల్లో.. అధికార పార్టీ విజయం

తైపీ: తైవాన్‌ అధ్యక్ష ఎన్నిక (Taiwan Presidential Election)ల్లో అధికార డెమొక్రటిక్‌ ప్రోగ్రెసివ్‌ పార్టీ (DPP) సత్తా చాటింది. డీపీపీ తరఫున బరిలోకి దిగిన లాయ్‌ చింగ్‌ తె (Lai Ching-te) విజయం సాధించారు. ప్రతిపక్షాలు ఓటమిని అంగీకరించినట్లు అంతర్జాతీయ మీడియా తెలిపింది. అధ్యక్ష, పార్లమెంటు ఎన్నికలకు సంబంధించి శనివారం ఉదయం 8 గంటల నుంచి సాయంత్రం 4 గంటల వరకు పోలింగ్‌ ప్రక్రియ నిర్వహించారు. ఆ తర్వాత ఓట్ల లెక్కింపు చేపట్టి ఫలితాలు ప్రకటిస్తున్నారు.

చైనాతో ఉద్రిక్తతల వేళ.. తైవాన్‌లో అధ్యక్ష ఎన్నికలు

చైనాతో తీవ్ర ఉద్రిక్తతలు కొనసాగుతున్న వేళ.. తైవాన్‌లో అధ్యక్ష ఎన్నికలపై ప్రపంచవ్యాప్తంగా ఆసక్తి నెలకొంది. ఈ ద్వీప దేశం తమ భూభాగమేనంటూ డ్రాగన్‌ కొన్నేళ్లుగా వాదిస్తున్న విషయం తెలిసిందే. తరచూ ద్వీపం చుట్టూ చైనా యుద్ధ విన్యాసాలు చేపడుతోంది. ఈ మధ్యే దీన్ని విలీనం చేసుకునేందుకు ప్రణాళికను కూడా ఆవిష్కరించింది. మరోవైపు.. తైవాన్‌ ప్రస్తుత అధ్యక్షురాలు సాయ్‌ ఇంగ్-వెన్‌, ఉపాధ్యక్షుడు లాయ్‌ చింగ్‌లు తైవాన్‌పై బీజింగ్‌ సార్వభౌమాధికార వాదనలను వ్యతిరేకిస్తున్నారు.