Ukraine Crisis: వీసా ఉంటేనే రష్యా పౌరులకు అనుమతి.. జెలెన్‌స్కీ కీలక నిర్ణయం

కీవ్‌: ఉక్రెయిన్ అధ్యక్షుడు వ్లాదిమిర్​ జెలెన్​స్కీ కీలక నిర్ణయం తీసుకున్నారు. ఇకపై వీసాలు ఉంటేనే రష్యా పౌరులను తమ దేశంలోకి అనుమతించనున్నట్లు ప్రకటించారు. జులై 1 నుంచి ఈ విధానం అమల్లోకి వస్తుందని టెలిగ్రామ్‌ వేదికగా వెల్లడించారు. రష్యా, ఉక్రెయిన్​ పౌరులు ఎలాంటి వీసాలు లేకుండానే ఇరు దేశాలకు వెళ్లేవారు. అయితే ఉక్రెయిన్​పై రష్యా దండయాత్ర చేపట్టిన తర్వాత ఇరు దేశాల మధ్య ఉద్రిక్త పరిస్థితులు నెలకొన్నాయి. నాలుగు నెలలుగా  ఉక్రెయిన్​పై రష్యా దాడులు చేస్తూనే ఉంది. ఈ నేపథ్యంలోనే రష్యా చొరబాటును నిలువరించేలా ఆ దేశ పౌరులకు జెలెన్​స్కీ వీసా విధానాన్ని ప్రకటించారు. 1991లో సోవియట్ యూనియన్ నుండి ఉక్రెయిన్ స్వాతంత్య్రం పొందిన తర్వాత నుంచి కొనసాగుతున్న రష్యన్‌ పౌరుల వీసా రహిత రాకపోకలకు ఈ చర్య ముగింపు పలకనుంది.

మరోవైపు తమ 27 దేశాల కూటమిలో చేరేలా దరఖాస్తు చేసుకునేందుకు ఉక్రెయిన్​కు అవకాశం ఇవ్వాలని యూరోపియన్ యూనియన్ కార్యనిర్వాహక విభాగం సిఫారసు చేసింది. ఇది ఉక్రెయిన్​కు ఊరటనిచ్చే విషయమే అయినప్పటికీ.. ఈ అధికార ప్రక్రియ పూర్తికావడానికి ఏళ్ల సమయం పట్టే అవకాశం ఉంది. ఉక్రెయిన్ దరఖాస్తుకు ఈయూ కూటమిలోని అన్ని దేశాలు ఆమోదం తెలపాల్సి ఉంటుంది. ఈయూ సిఫారసులపై అవగాహన ఉన్నప్పటికీ వెనక్కి తగ్గని రష్యా.. ఉక్రెయిన్​పై భీకర దాడులు కొనసాగిస్తూనే ఉంది.