కోబ్రా సైన్యం

ఆదర్శం

కోబ్రా సైన్యం

పడగ విప్పిన పాము కనిపిస్తే గుండెలదిరిపోతాయి. వెంటనే అక్కణ్నుంచి పారిపోతాం. వీలైతే కర్రలతో కొట్టి చంపేస్తాం. ముప్ఫై ఏళ్ల అజయ్‌గిరి మాత్రం వాటిని పసిపిల్లల్ని లాలిస్తున్నట్టు ఒడుపుగా బంధిస్తాడు. సురక్షితంగా అడవుల్లో వదిలేస్తాడు. అలాగని అతడు పాములు పట్టే వ్యక్తేం కాదు. కర్నాటక షిమోగా జిల్లాలోని అగుంబె రెయిన్‌ ఫారెస్ట్‌ రిసెర్చ్‌ స్టేషన్‌ (ఏఆర్‌ఆర్‌ఎస్‌)లో ఫీల్డ్‌ డైరెక్టర్‌. అతడి కృషితో ఆ ప్రాంతంలో నల్లతాచు పాముల్ని రక్షించడానికి ఎనిమిది గ్రామాల్లో పెద్ద సైన్యమే తయారైంది. పశ్చిమ కనుమల్లోని దట్టమైన అటవీ ప్రాంతంలో ఉండే అగుంబె ప్రాంతంలో అత్యంత విషపూరితమైన తాచుపాముల బెడద ఎక్కువ. పాము కాటుతో మనుషులు చనిపోయే సందర్భాలూ ఎక్కువే. ముఖ్యంగా రైతులు. మహారాష్ట్ర నుంచి అజయ్‌ ఏఆర్‌ఆర్‌ఎస్‌కి వచ్చేవరకూ ఇదే పరిస్థితి. తర్వాత ఈ కథ మారింది. తను వచ్చాక గ్రామస్థులెవరికైనా పాము కనిపిస్తే దాన్ని చంపకుండా తనకు ఫోన్‌ చేయమని చెప్పాడు. ఆ చుట్టుపక్కల ఎక్కడ విష సర్పం కనిపించినా తనకే కాల్‌ వెళ్లేది. అలా ఈ కొన్నేళ్లలో వేల సర్పాలను బంధించాడు. పాము కాటు నుంచి మనుషుల్ని కూడా. తర్వాత అంతటితో ఆగిపోలేదు. పాముల్ని ఎలా పట్టాలి? ఎక్కడ వదిలేయాలి? వాటితో ఎలా జాగ్రత్తగా మెలగాలి? అనే విషయాలపై ఒక కోర్సులాగా చుట్టుపక్కల రైతులు, విద్యార్థులకు బోధిస్తున్నాడు. వాటిని రెచ్చగొట్టినప్పుడు, తమ ప్రాణాలకు హాని కలుగుతుంది అని భావించినప్పుడు మాత్రమే సర్పాలు తమ కోరలకు పని చెబుతాయంటాడు అజయ్‌. జీవావరణ వ్యవస్థలో పాముల ఆవశ్యకత వివరిస్తాడు. అతడి కృషి ఫలితంగా గ్రామస్థులు పామును చంపడం మాని వాటి రక్షకులుగా మారారు.

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు