చారిత్రక తప్పిదం..ఒప్పిదం!

అడగండి చెబుతాం!

చారిత్రక తప్పిదం..ఒప్పిదం!

మ్యాచ్‌ ఫలితం మారిపోవడానికి.. ఒక్క క్షణం చాలు! ఆ క్షణంలో వేసే ఒక బంతి.. ఆడే ఒక షాట్‌.. తీసుకునే ఒక నిర్ణయంతో పెద్ద మార్పు సంభవించవచ్చు. విపరీతమైన పోటీ, అత్యంత ఉత్కంఠ ఉండే ప్రపంచకప్‌లో సమయోచిత నిర్ణయం తీసుకోవడం అత్యంత కీలకం. నిర్ణయం వికటిస్తే ప్రపంచకప్పే పోవచ్చు. నిర్ణయం సరైందైతే కప్పే వచ్చి ఒళ్లో వాలొచ్చు. ప్రపంచకప్‌లో ఈ తరహా చారిత్రక తప్పిదాలేంటో.. ఒప్పిదాలేంటో చూద్దాం పదండి.

బ్యాటింగ్‌ చేసి ఉంటే..x

అది 2003 ప్రపంచకప్‌. తొలి మ్యాచ్‌లో ఆస్ట్రేలియా చేతిలో చిత్తయినప్పటికీ ఆ తర్వాత గొప్పగా పుంజుకుని అద్భుత విజయాలు సాధించిన టీమ్‌ఇండియా.. ఫైనల్‌కు దూసుకొచ్చింది. మళ్లీ ప్రత్యర్థి కంగారూ జట్టే. టాస్‌ గంగూలీనే వరించింది. బ్యాటింగ్‌కు స్వర్గధామంలా ఉన్న పిచ్‌పై ముందు బౌలింగ్‌ చేయడానికి నిర్ణయించుకున్నాడు దాదా. కానీ పాంటింగ్‌ సేన భారత బౌలింగ్‌ను ఉతికారేసి ఏకంగా 359 పరుగుల భారీ స్కోరు సాధించింది. అప్పట్లో 300 కూడా భారీ స్కోరు. అలాంటిది ప్రపంచకప్‌ ఫైనల్లో 360 లక్ష్యమంటే మాటలా? ఇన్నింగ్స్‌ మొదలవడానికి ముందే భారత్‌ ఓటమి ఖరారైపోయింది. ఆ రోజు దాదా బ్యాటింగ్‌ ఎంచుకోకుండా పెద్ద తప్పు చేశాడన్నది విశ్లేషకుల అభిప్రాయం.

ఆ షాట్‌ ఎందుకాడాడో..x

క్రికెట్‌ పుట్టిల్లయిన ఇంగ్లాండ్‌ ఇప్పటిదాకా ప్రపంచకప్‌ గెలవలేదు. ఐతే 1987లో ఆ జట్టు ట్రోఫీకి ఎంతో చేరువగా వెళ్లింది. కానీ గెలవలేకపోయింది. ఆస్ట్రేలియా 254 పరుగుల లక్ష్యాన్ని నిర్దేశించగా.. ఇంగ్లాండ్‌ ఒక దశలో 135/2తో మంచి స్థితిలో నిలిచింది. క్రీజులో ఉన్న ఇద్దరు బ్యాట్స్‌మెన్‌ కుదురుకుని ఉన్నారు. 8 వికెట్లు చేతిలో ఉండగా.. ఇంకో 119 పరుగులు చేస్తే చాలు. ఈ స్థితిలో బోర్డర్‌ బౌలింగ్‌లో గ్యాటింగ్‌ (41) అప్పటికి వినియోగంలోనే లేని రివర్స్‌ స్వీప్‌ ఆడాలని నిర్ణయించుకున్నాడు. ఆ షాట్‌ తేడా కొట్టింది. బంతి గాల్లోకి లేచింది. గ్యాటింగ్‌ వెనుదిరగ్గానే ఆస్ట్రేలియా ఒత్తిడి పెంచింది. ఇంగ్లాండ్‌ తడబడింది. విజయానికి కేవలం 8 పరుగుల దూరంలో ఆగిపోయింది. రివర్స్‌ స్వీప్‌ ఆడాలన్న గ్యాటింగ్‌ అనాలోచిత నిర్ణయమే ఇంగ్లాండ్‌కు ప్రపంచకప్‌ను దూరం చేసిందన్నది స్పష్టం.

డీఆర్‌ఎస్‌ లెక్క తేడా కొట్టి..x

దురదృష్టాన్ని జేబులో పెట్టుకుని ప్రపంచకప్‌లో అడుగుపెట్టే జట్టు దక్షిణాఫ్రికా. 1992లో డీఆర్‌ఎస్‌ పద్ధతి ఆ జట్టు కొంప ఎలా ముంచిందో తెలిసిందే. 2003లో మరోసారి డీఆర్‌ఎసే ఆ జట్టుకు విషాదాన్ని మిగిల్చింది. శ్రీలంకపై 269 పరుగుల లక్ష్యంతో బరిలోకి దిగిన 4 వికెట్లు చేతిలో ఉండగా.. 45 బంతుల్లో 57 పరుగులు చేయాల్సిన స్థితిలో వర్షం దోబూచులాడింది. ఒక ఓవర్‌ పడ్డాక మ్యాచ్‌ ఆగింది. డీఆర్‌ఎస్‌ ప్రకారం ఆ ఓవర్‌ ముగిసేసరికి దక్షిణాఫ్రికా 230 చేస్తే గెలిచేది. కానీ ఆ జట్టు చేసింది 229 పరుగులే. ఓవర్‌ ఐదో బంతికి సిక్సర్‌ బాదిన బౌచర్‌.. అప్పటికే దక్షిణాఫ్రికా ముందంజలో ఉందనుకుని చివరి బంతికి సింగిల్‌ తీయలేదు. ఈ నిర్ణయమే కొంపముంచింది. డీఆర్‌ఎస్‌ పద్ధతిని అంచనా వేయడంలో తడబాటు ఆ జట్టు ప్రపంచకప్‌ నుంచి నిష్క్రమించేలా చేసింది.

యువి కాదు.. ధోని

2011 ప్రపంచకప్‌ ఫైనల్లో భారత్‌ ముందు 275 పరుగుల ప్రమాదకర లక్ష్యాన్ని నిలిపింది శ్రీలంక. 31 పరుగులకే 2 వికెట్లు పడ్డాయి. కోహ్లి (35) అండతో జట్టు స్కోరును వంద దాటించాడు గంభీర్‌. కానీ విరాట్‌ ఔటవ్వగానే మళ్లీ భారత్‌ ఒత్తిడిలో పడింది. మామూలుగా అయితే అప్పుడు యువరాజ్‌ బ్యాటింగ్‌కు రావాలి. కానీ ధోని అతడిని ఆపి తనే ముందు బ్యాటింగ్‌కు వెళ్లాడు. తీవ్ర ఒత్తిడిలో మహి ఆ రోజు చెలరేగిపోయిన తీరు అసాధారణం. యువీ మంచి ఫామ్‌లోనే ఉన్నప్పటికీ.. ఆ ఒత్తిడిలో అతనెలా ఆడేవాడో? మరో వికెట్‌ పడితే భారత్‌ విజయావకాశాలు ప్రమాదంలో పడేవే. ధోని వచ్చి ధనాధన్‌ ఇన్నింగ్స్‌తో మ్యాచ్‌ గమనాన్నే మార్చేశాడు. జట్టుకు కప్పు అందించాడు. ఆ రోజు యువీ కన్నా తనే ముందు రావాలన్న మహి నిర్ణయం చరిత్రాత్మకమే.

అక్రమ్‌ను పిలిస్తే ఇంజీని పంపాడు

అది 1992 ప్రపంచకప్‌లో పాకిస్థాన్‌-న్యూజిలాండ్‌ సెమీఫైనల్‌. పాక్‌ ముందు 263 పరుగుల భారీ లక్ష్యం నిలిచింది. చివరి 15 ఓవర్లలో 123 పరుగులు చేయాలి. పాక్‌ పరిస్థితి చాలా కష్టంగా ఉంది. అప్పుడే సలీం మాలిక్‌ ఔటయ్యాడు. క్రీజులో ఉన్న జావెద్‌ మియాందాద్‌.. హిట్టింగ్‌ చేయడంలో దిట్ట, కాస్త అనుభవం కూడా ఉన్న వసీమ్‌ అక్రమ్‌ను పంపాలని డ్రెసింగ్‌ రూమ్‌కు సైగ చేశాడు. కానీ కెప్టెన్‌ ఇమ్రాన్‌ ఖాన్‌ మాత్రం.. ఇంజమామ్‌ను పంపించాడు. అతను కెప్టెన్‌ నమ్మకాన్ని నిలబెడుతూ చెలరేగిపోయాడు. 37 బంతుల్లోనే 60 పరుగులు చేసి పాక్‌కు సంచలన విజయాన్నందించాడు. ఈ విజయం ఇచ్చిన విశ్వాసంతో పాక్‌ ఫైనల్లోనూ రెచ్చిపోయింది. ప్రపంచకప్‌ను ఎగరేసుకుపోయింది.

లాయిడ్‌ చెప్పాడు..

1979 ప్రపంచకప్‌లో వెస్టిండీస్‌తో సెమీస్‌లో 294 పరుగుల ఛేదనలో పాక్‌ దీటుగా స్పందించింది. రెండో వికెట్‌కు 166 పరుగులు జోడించిన జహీర్‌ అబ్బాస్‌, మాజిద్‌ పాక్‌ను గెలుపు బాటలో నడిపించారు. ఐతే డ్రింక్స్‌ విరామంలో లాయిడ్‌ బౌలర్లకు ఒక సూచన చేశాడు. జహీర్‌ ఆఫ్‌స్టంప్‌ మీద పడే బంతుల్ని అలవోకగా ఆడేస్తున్నాడని పసిగట్టిన లాయిడ్‌.. లైన్‌ మార్చి లెగ్‌ మీదికి వేయాలని చెప్పాడు. కొలిన్‌ క్రాఫ్ట్‌ అదే చేశాడు. జహీర్‌ లెగ్‌ గ్లాన్స్‌ ఆడబోయి క్యాచ్‌ ఔటయ్యాడు. అక్కడి నుంచి పాక్‌ గాడి తప్పింది. మ్యాచ్‌ వెస్టిండీస్‌ సొంతమైంది. ఆపై విండీస్‌ ఫైనల్లోనూ నెగ్గి రెండోసారి కప్పు అందుకుంది.

Tags :