Feedback | E-PAPER | Pratibha

Avinash: విజయమ్మ పరామర్శ దృశ్యాలు చిత్రీకరణ .. మీడియాపై వైకాపా శ్రేణుల దాడి

వైఎస్ అవినాష్‌ రెడ్డి ముందస్తు బెయిల్‌ పిటిషన్‌పై రేపు సుప్రీం కోర్టులో విచారణ జరగనుంది. జస్టిస్‌ మహేశ్వరి, జస్టిస్‌ నరంహా నేతృత్వంలో ధర్మాసనం వాదనలు విననుంది.

Updated : 22 May 2023 19:45 IST

22/05/2023 19:56(IST)

జగన్‌ అండదండలతోనే...: వర్ల రామయ్య

వివేకా హత్య కేసు దర్యాప్తు జరగకూడదని, అసలు ముద్దాయిలు బయటకు రాకూడదని వైఎస్‌ జగన్ ఆకాంక్షిస్తున్నారని తెదేపా పొలిట్ బ్యూరో సభ్యులు వర్ల రామయ్య ధ్వజమెత్తారు. జగన్ అండదండలతోనే సీబీఐ అధికారులను బెదిరించే స్థాయికి రాష్ట్ర పోలీసులు వెళ్లారని మండిపడ్డారు. సీఎం లక్ష్యం నెరవేర్చడం కోసం రాష్ట్ర పోలీస్ యంత్రాంగం వ్యవహరిస్తున్న తీరు అభ్యంతరకరమని ఆయన ఆక్షేపించారు.

22/05/2023 18:40(IST)

అవినాష్‌రెడ్డి బెయిల్‌ పిటిషన్‌పై రేపు సుప్రీంలో విచారణ

ఎంపీ అవినాష్‌ బెయిల్‌ పిటిషన్‌పై మంగళవారం సుప్రీం కోర్టులో విచారణ జరగనుంది. జస్టిస్‌ మహేశ్వరి, జస్టిస్‌ నరసింహా నేతృత్వంలోని ధర్మాసనం వాదనలు విననుంది. తన బెయిల్‌ పిటిషన్‌పై విచారించేలా హైకోర్టు వెకేషన్‌ బెంచ్‌ను ఆదేశించాలని సుప్రీం కోర్టుకు అవినాష్‌రెడ్డి విజ్ఞప్తి చేశారు. తల్లి అనారోగ్యం వల్ల వారంపాటు సీబీఐ విచారణకు హాజరుపై మినహాయింపు ఇవ్వాలని కోరారు. తన పిటిషన్‌ను హైకోర్టు బెంచ్‌ వినేవరకు అరెస్టు చేయొద్దని, ఈ మేరకు సీబీఐని ఆదేశించాలని పిటిషన్‌లో కోరారు.

22/05/2023 18:24(IST)

విశ్వభారతి ఆస్పత్రి వద్ద మరోసారి వైకాపా శ్రేణుల దౌర్జన్యం

ఎంపీ అవినాష్‌ రెడ్డి తల్లి శ్రీలక్ష్మి చికిత్స పొందుతున్న విశ్వభారతి ఆస్పత్రి వద్ద మరోసారి వైకాపా శ్రేణులు మీడియా ప్రతినిధులపై దౌర్జన్యానికి పాల్పడ్డాయి. పరామర్శకు వచ్చిన వైఎస్‌ విజయమ్మను ఫొటోలు తీస్తుండగా దాడికి యత్నించాయి. వారిపై రాళ్లతో దాడికి దిగాయి. దీంతో మీడియా ప్రతినిధులు తప్పించుకొని అక్కడి నుంచి పరుగుతీశారు. వారిని దుర్భాషలాడుతూ వైకాపా శ్రేణులు వెంబడించాయి.

22/05/2023 18:07(IST)

పాలకులే అంగీకరించినప్పుడు ప్రభుత్వాన్ని రద్దు చేయొచ్చుగా: నక్కా ఆనంద్‌ బాబు

తను కొట్టినట్లు ఉండాలి, నువ్వు ఏడ్చినట్లు ఉండాలి అన్నట్లుగా వివేకా హత్య కేసులో సీబీఐ అవినాష్ రెడ్డి తీరు ఉందనీ తెదేపా పొలిట్ బ్యూరో సభ్యులు నక్కా ఆనంద్ బాబు ధ్వజమెత్తారు. ఓ హత్యకేసు నిందితుడి అరెస్టు కోసం సీబీఐ స్థానిక పోలీసుల్ని బతిమలాడటం సిగ్గుచేటనీ మండిపడ్డారు. శాంతి భద్రతల సమస్య తలెత్తుతుందని ఎస్పీ, అధికారపార్టీ ఎమ్మెల్యేలు చెప్పటం దుర్మార్గమైన చర్యని ఆక్షేపించారు. శాంతిభద్రతలు పరిరక్షించలేమని పాలకులే అంగీకరించినప్పుడు ప్రభుత్వాన్ని రద్దు చేయొచ్చుగా అని ఆయన విమర్శించారు.
ప్రజాస్వామ్యంపై నమ్మకం పెరగాలంటే, తమ చిత్తుశుద్ధిని నిరూపించుకునేలా సీబీఐ పనిచేయాలని కోరారు.

22/05/2023 17:25(IST)

విశ్వభారతి ఆస్పత్రికి వచ్చిన వైఎస్‌ విజయమ్మ

విశ్వభారతి ఆస్పత్రిలో చికిత్స పొందుతున్న కడప ఎంపీ వైఎస్‌ అవినాష్‌రెడ్డి తల్లి శ్రీలక్ష్మిని పరామర్శించేందుకు వైఎస్‌ విజయమ్మ వచ్చారు. వైద్యులు, కుటుంబసభ్యులతో మాట్లాడి ఆమె ఆరోగ్య పరిస్థితిని తెలుసుకున్నారు.

22/05/2023 16:04(IST)

అవినాష్‌రెడ్డిని అరెస్టు చేస్తే శాంతిభద్రతలు దెబ్బతింటాయ్‌: మాజీ ఎమ్మెల్యే మోహన్‌రెడ్డి

కడప ఎంపీ అవినాష్ రెడ్డిని సీబీఐ అధికారులు అరెస్టు చేస్తే శాంతిభద్రతలు దెబ్బతింటాయని కర్నూలు మాజీ ఎమ్మెల్యే ఎస్వీ మోహన్ రెడ్డి తెలిపారు. అవినాష్ రెడ్డి తల్లి అనారోగ్యంతో ఉండడంతో ఎంపీ సీబీఐ విచారణకు హాజరు కావడం లేదని ఆయన అన్నారు. ఆరోగ్యం మెరుగై ఆసుపత్రి నుంచి డిశ్ఛార్జి అయిన తర్వాత విచారణకు వెంటనే హాజరు అవుతారని ఎంపీ చెప్పినట్లు ఎస్వీ మోహన్ రెడ్డి తెలిపారు. సీబీఐ అధికారులు స్పందించి విచారణకు మరోసారి గడువు ఇవ్వాలని ఆయన కోరారు.

22/05/2023 15:53(IST)

పాత్రికేయులపై అవినాష్‌రెడ్డి అనుచరుల దాడి.. నంద్యాలలో ధర్నా

కర్నూలులో మీడియా ప్రతినిధులపై ఎంపీ అవినాష్‌ రెడ్డి అనుచరుల దాడులను నిరసిస్తూ నంద్యాల తహసీల్దార్ కార్యాలయం ఎదుట జర్నలిస్టుల సంఘం ఏపీయూడబ్ల్యూజే నాయకులు ధర్నా చేశారు. ఉప తహశీల్దారు రమాదేవికి వినతిపత్రం అందజేశారు. దాడి చేసిన వారిపై కఠిన చర్యలు తీసుకోవాలని డిమాండ్ చేశారు.

22/05/2023 14:40(IST)

డీజీపీ సలహా మేరకు నిర్ణయం తీసుకుంటాం: ఎస్పీ కృష్ణకాంత్‌

వివేకా హత్య కేసులో సహనిందితుడైన కడప ఎంపీ వైఎస్‌ అవినాష్‌రెడ్డిని సీబీఐ అరెస్టు చేస్తోందన్న ఊహాగానాల నేపథ్యంలో కర్నూలులో ఉత్కంఠ కొనసాగుతోంది. ఈ విషయంలో సీబీఐ అధికారులు మల్లగుల్లాలు పడుతున్నారు. శాంతిభద్రతల దృష్ట్యా ఎస్పీ కృష్ణకాంత్‌ను రెండుసార్లు కలిసి వారు చర్చలు జరిపారు. అవినాష్‌కు లొంగిపోవాల్సిందిగా చెప్పాలని సూచించారు. దీనిపై ఎస్పీ కృష్ణకాంత్‌ ఎలాంటి స్పష్టత ఇవ్వలేదు. తాజాగా డీజీపీ సలహా తీసుకుని నిర్ణయం తీసుకుంటామని చెప్పారు.

22/05/2023 14:17(IST)

వైకాపా కార్యకర్తలకు ఆసుపత్రి వద్దే భోజనాలు!

అవినాష్‌ను అరెస్టు చేసేందుకు సీబీఐ విశ్వ ప్రయత్నాలు చేస్తోంది. రెండో సారి కర్నూలు ఎస్పీతో సీబీఐ అధికారులు చర్చలు జరుపుతున్నారు. దీనిపై ఎస్పీ సైతం ఎలాంటి స్పష్టత ఇవ్వడం లేదు. ఎప్పుడు ఏం జరుగుతుందోనని భావించిన వైకాపా కార్యకర్తలు విశ్వభారతి ఆసుపత్రి వద్దే బైఠాయించారు. కార్యకర్తలు అక్కడ నుంచి వెళ్లకుండా స్థానిక నేతలు వారికి భోజన ఏర్పాట్లు చేస్తున్నారు. వాహనాల్లో వారికోసం ప్రత్యేకంగా భోజనం తెప్పిస్తున్నారు.

22/05/2023 13:43(IST)

రెండో సారి ఎస్పీని కలిసిన సీబీఐ అధికారులు

అవినాష్‌ రెడ్డి అరెస్టు విషయంలో కర్నూలు ఎస్పీని సీబీఐ అధికారులు మరోసారి కలిశారు. సీబీఐ అధికారులు విజ్ఞప్తి చేస్తున్నప్పటికీ అవినాష్ అరెస్టుపై ఎస్పీ కృష్ణకాంత్ స్పష్టత ఇవ్వడం లేదు. డీజీపీ ఆదేశాల మేరకు నిర్ణయం తీసుకుంటామని ఎస్పీ పేర్కొన్నట్లు సమాచారం.

22/05/2023 13:37(IST)

సెంట్రల్‌ ఫోర్స్‌ సాయంతో అవినాష్‌ అరెస్టు?

ఎంపీ అవినాష్ రెడ్డి అరెస్టుపై కర్నూలులో ఉత్కంఠ కొనసాగుతూనే ఉంది. సీబీఐ అధికారులు ఐదుగురు సభ్యులు మూడు వాహనాల్లో కర్నూలుకు చేరుకొని పోలీస్‌ గెస్ట్ హౌస్ లో ఉన్నారు. మరో వైపు విశ్వభారతి ఆసుపత్రి వద్ద వైకాపా కార్యకర్తలు బైఠాయించారు. దీంతో ఆసుపత్రి పరిసరాల్లో పోలీసులు బారిగేట్లు ఏర్పాటు చేసి నియంత్రిస్తున్నారు. సెంట్రల్ ఫోర్స్ సాయంతో అవినాష్ రెడ్డిని అరెస్టు చేస్తారని ప్రచారం జరుగుతోంది.

22/05/2023 13:29(IST)

తల్లి అనారోగ్యానికి.. అవినాష్‌ అరెస్టుకు సంబంధం ఏంటి?

మినహాయింపు ఇవ్వాలని కోరుతూ వైఎస్‌ అవినాష్‌ రెడ్డి సీబీఐ అధికారులకు మరో లేఖ రాయడంపై వైకాపా ఎంపీ రఘురామకృష్ణరాజు తీవ్రంగా మండిపడ్డారు. ‘‘ముందస్తు బెయిల్‌పై రేపు విచారణ ఉంది. మినహాయింపు కావాలని అవినాష్‌ లేఖ రాశారు. రేపు సుప్రీంలో పిటిషన్‌ విచారణకు వస్తుందని అవినాష్‌కు తెలుసా? పిటిషన్‌ రేపు సుప్రీంకోర్టులో విచారణకు రావచ్చు.. రాకపోవచ్చు.. ఆయన తల్లి అనారోగ్యానికి.. అవినాష్‌ అరెస్టుకు సంబంధం ఏంటి? నిజంగా ఆమెకు బాగాలేకపోతే హైదరాబాద్‌లోనే.. ఇంకోచోటో చేర్చాలి కదా.. హైదరాబాద్‌లో అయితే వీరికి అన్ని రకాల సహకారాలు అందవనా? ధర్నాలు, ఆందోళనలు చేస్తే అరెస్టులు ఆపేస్తారా? కర్నూలులో ఉంటే కడపకు దగ్గరగా ఉంటుందనా.. నాటకాలు ఆడుతున్నారు.. లేక కర్నూలులో మన సీఎం.. మన పోలీసులనా.. ఇక్కడ చేర్చింది’’ అని రఘురామ వ్యాఖ్యానించారు.

22/05/2023 13:15(IST)

సీబీఐకి ఎంపీ అవినాష్‌ మరో లేఖ

ఎంపీ అవినాష్‌రెడ్డి సీబీఐకి మరో లేఖ రాశారు. తన తల్లి అనారోగ్యం దృష్ట్యా విచారణ నుంచి మినహాయింపు ఇవ్వాలని కోరారు. ఈ నెల 27వ తేదీ వరకు మినహాయింపు ఇవ్వాలని సీబీఐ అధికారులను లేఖలో కోరారు. ముందస్తు బెయిల్‌ పిటిషన్‌ సుప్రీంకోర్టులో విచారణలో ఉన్నందున తన విజ్ఞప్తిని పరిగణనలోకి తీసుకోవాలని కోరారు.

22/05/2023 11:57(IST)

అవినాష్‌ రెడ్డికి సుప్రీంలో చుక్కెదురు

వైఎస్ అవినాష్‌ రెడ్డికి సుప్రీంకోర్టులో చుక్కెదురైంది. ముందుస్తు బెయిల్‌ పిటిషన్‌పై విచారించేందుకు సుప్రీం వెకేషన్‌ బెంచ్‌ నిరాకరించింది. మెన్షనింగ్‌ లిస్టులో ఉంటేనే విచారిస్తామని జస్టిస్‌ అనిరుధ్‌, జస్టిస్‌ సంజయ్‌ కరోల్‌ల ధర్మాసనం స్పష్టం చేసింది. మెన్షనింగ్‌ అధికారి ముందుకు వెళ్లాలని ధర్మాసనం సూచించింది. జస్టిస్‌ సంజయ్‌ కరోల్‌ ధర్మాసనం ముందు పిటిషన్‌ విచారణకు రాకూడదని తెలిపింది.

22/05/2023 11:31(IST)

ఆసుపత్రి వద్ద బైఠాయించిన వైకాపా కార్యకర్తలు

వైఎస్‌ అవినాష్‌ను అరెస్టు చేసేందుకు సీబీఐ అధికారులు కర్నూలు ఎస్పీకి లిఖితపూర్వక లేఖ ఇచ్చారనే ప్రచారం జరుగుతోంది. ఈ నేపథ్యంలో అనినాష్‌ను అరెస్టు చేస్తే ఊరుకునేది లేదని వైకాపా కార్యకర్తలు హెచ్చరించినట్లు తెలుస్తోంది. ఈ క్రమంలో విశ్వభారతి ఆసుపత్రి ఎదుట బైఠాయించిన పార్టీ కార్యకర్తలు ఆందోళనకు దిగారు.

22/05/2023 11:10(IST)

ముందస్తు బెయిల్‌.. మరోసారి సుప్రీంకు అవినాష్‌

దిల్లీ: ముందుస్తు బెయిల్‌ అంశంపై వైఎస్‌ అవినాష్‌ రెడ్డి మరోసారి సుప్రీంకోర్టును ఆశ్రయించారు. జస్టిస్‌ జె.కె.మహేశ్వరి, జస్టిస్‌ నరసింహ ధర్మాసనం ముందు అవినాష్‌ న్యాయవాది మెన్షన్‌ చేశారు. పిటిషన్‌ తమ ముందుకు విచారణకు రావట్లేదని.. మరో వెకేషన్‌ బెంచ్‌ ముందుకు వెళ్లాలని సుప్రీంకోర్టు సూచించింది. దీంతో మరో వెకేషన్‌ బెంచ్‌ ముందుకు అవినాష్ తరఫు న్యాయవాది వెళ్లారు.

22/05/2023 11:05(IST)

అవినాష్‌ అరెస్టుకు రంగం సిద్ధం?కర్నూలు ఎస్పీకి సీబీఐ లిఖితపూర్వక లేఖ?

వైకాపా ఎంపీ అవినాష్‌ రెడ్డిని అరెస్టు చేస్తారనే ఊహాగానాల నేపథ్యంలో కర్నూలులో హైటెన్సన్‌ వాతావరణం నెలకొంది. అవినాష్‌ను అరెస్టు చేస్తారనే ప్రచారం జరగడంతో విశ్వభారతి ఆస్పత్రి వద్దకు వైకాపా కార్యకర్తలు పెద్ద సంఖ్యలో చేరుకుంటున్నారు. శాంతి భద్రతల దృష్ట్యా ఆస్పత్రి వద్ద పోలీసులు భారీగా మోహరించారు. ఇలాంటి పరిస్థితుల్లో వైఎస్‌ అవినాష్‌ రెడ్డిని అరెస్టు చేస్తున్నట్లు కర్నూలు ఎస్పీకి సీబీఐ అధికారులు లిఖిత పూర్వకంగా లేఖ ఇచ్చినట్లు తెలుస్తోంది. మరికాసేపట్లో ఆస్పత్రి వద్దకు సీబీఐ అధికారులు చేరుకోనున్నట్లు సమాచారం. ఎస్పీ కార్యాలయం దగ్గర పోలీస్ ఫోర్స్ కోసం సీబీఐ అధికారులు వేచిచూస్తున్నట్లు తెలుస్తోంది. మరోవైపు ఆస్పత్రి చుట్టూ ఎంపీ అవినాష్‌రెడ్డి అనుచరులు పెద్ద ఎత్తున చేరుకోవడంతో ఎప్పుడు ఏం జరుగుతుందో తెలియక టెన్షన్‌ వాతావరణం నెలకొంది.

22/05/2023 11:04(IST)

ప్రెస్‌నోట్‌ విడుదల చేసిన విశ్వభారతి ఆస్పత్రి వర్గాలు

కడప ఎంపీ వైఎస్‌ అవినాష్‌రెడ్డి తల్లి శ్రీలక్ష్మి ఆరోగ్య పరిస్థితి ఆందోళనకరంగా ఉందని కర్నూలు విశ్వభారతి ఆస్పత్రి వర్గాలు వెల్లడించాయి. గత నాలుగు రోజులుగా కర్నూలులోని విశ్వభారతి ఆస్పత్రిలో ఆమె చికిత్స పొందుతున్నారు. తాజాగా ఆమె ఆరోగ్య పరిస్థితిపై ఆస్పత్రి యాజమాన్యం ప్రెస్‌ నోట్‌ విడుదల చేసింది. ‘‘అవినాష్ రెడ్డి తల్లి శ్రీలక్ష్మి ఆరోగ్య పరిస్థితి ఆందోళనకరంగా ఉంది. ఆమె నాన్‌ఎస్‌టీ ఎలివేషన్ మయోకార్డియల్ ఇన్‌ఫ్రాక్షన్‌ (హార్ట్ అటాక్)కు గురయ్యారు. యాంజియోగ్రామ్ చేశాక.. ఆమె డబుల్ నాళాల వ్యాధితో బాధపడుతున్నట్లు తేలింది. ప్రస్తుతం సీసీయూలో ఉన్న ఆమెను ఒక ప్రత్యేక వైద్యుల బృందం పర్యవేక్షిస్తోంది. రక్తపోటు ఇప్పటికీ తక్కువగా ఉంది. ఆమె అయానోట్రోపిక్ సపోర్ట్‌పై ఉన్నారు. ప్రస్తుతం ఆమెకు వాంతులు అవుతున్నాయి. వాంతులు ఇలాగే కొనసాగితే ఆల్ట్రాసౌండ్ స్కాన్‌, మెదడుకు ఇమేజింగ్ స్కాన్‌ చేసేందుకు ఏర్పాట్లు చేశాం. ఆమెకు లోబీపీ ఉన్నందున మరికొన్ని రోజులు సీసీయూలో ఉంచాల్సిన అవసరం ఉంది’’ అని ఆస్పత్రి వర్గాలు వెల్లడించాయి.

22/05/2023 11:03(IST)

అవినాష్‌ను లొంగిపోమనండి..

ఈ నెల 22న విచారణకు హాజరుకావాలంటూ సీబీఐ నోటీసులు పంపగా, తాను సోమవారం విచారణకు రాలేనంటూ అధికారులకు లేఖ రాశారు. ఈ నేపథ్యంలో సీబీఐ అధికారులు కర్నూలు ఎస్పీతో చర్చలు జరిపారు. లొంగిపోవాలని ఎంపీ అవినాష్‌కు చెప్పాలంటూ సీబీఐ అధికారులు ఎస్పీని కోరినట్లు తెలుస్తోంది. సీబీఐ అధికారుల విజ్ఞప్తిపై ఎస్పీ ఎలా స్పందిస్తారనేది ఆసక్తికరంగా మారింది.

22/05/2023 11:00(IST)

ఎంపీ అవినాష్‌ రెడ్డి అనుచరుల వీరంగం

కర్నూలు నగరంలో ఎంపీ అవినాష్‌రెడ్డి అనుచరులు ఆదివారం రాత్రి 10.30 గంటల సమయంలో వీరంగం సృష్టించారు. గాయత్రి ఎస్టేట్‌ ప్రాంతంలోని విశ్వభారతి ఆసుపత్రి వద్ద విధి నిర్వహణలో ఉన్న పలువురు మీడియా ప్రతినిధుల పట్ల దౌర్జన్యంగా వ్యవహరించారు. ఇక్కడ ఉంటే ఉపేక్షించేది లేదంటూ నానా దుర్భాషలాడారు. రాత్రి వేళ మీకు ఇక్కడేం పని అంటూ తొలుత ఆర్‌టీవీ ప్రతినిధులు, ఆంధ్రజ్యోతి రిపోర్టర్‌ వెంకటేశ్వర్లుపై దాడి చేశారు. దీంతో మిగిలిన మీడియా ప్రతినిధులు అక్కడి నుంచి పరుగులు తీయాల్సి వచ్చింది. కొందరు మీడియా ప్రతినిధుల చేతుల్లోని కెమెరాలు లాక్కొని ధ్వంసం చేశారు. ఈటీవీ ప్రతినిధి రామకృష్ణారెడ్డి సమీపంలోని ఓ హోటల్లోకి వెళ్లగా.. ఆయన్ను వెంబడించారు. హోటల్‌ షట్టర్లు వేసి దాడి చేయబోయారు. ఆయన బ్యాగ్‌లో ఉన్న ‘ఈటీవీ’ లోగో చూసి వదిలేశారు.

పూర్తి వార్త కోసం క్లిక్‌ చేయండి

22/05/2023 10:58(IST)

అమ్మ బారోగ్యం బాలేదు.. ఈసారీ విచారణకు రాలేను: అవినాష్ రెడ్డి

మాజీ మంత్రి వివేకా హత్య కేసులో సహనిందితుడైన కడప ఎంపీ వైఎస్‌ అవినాష్‌రెడ్డి సోమవారం విచారణకు రాలేనంటూ సీబీఐకి ఆదివారం లేఖ రాశారు. ఈ నెల 22న విచారణకు హాజరు కావాలంటూ సీబీఐ శనివారం ఇచ్చిన నోటీసుకు బదులుగా ఎంపీ లేఖ రాశారు. తన తల్లి అనారోగ్యం దృష్ట్యా గడువు మేరకు విచారణకు హాజరు కాలేనని.. మరింత సమయం కావాలని లేఖలో కోరారు. ప్రస్తుతం తన తల్లి ఛాతీ నొప్పితో ఆసుపత్రిలో చికిత్స పొందుతున్నారని.. కోలుకుని డిశ్ఛార్జి అయ్యే వరకు విచారణకు రాలేనని లేఖలో వివరించారు. ఆసుపత్రిలో తల్లితో పాటే ఉన్నానని.. ఇలాంటి క్లిష్ట పరిస్థితిలో ఆమెను వదిలి రాలేనన్నారు. తల్లి కోలుకోవడానికి దాదాపు పది రోజుల సమయం పట్టే అవకాశం ఉందని లేఖలో వివరించారు.

పూర్తి వార్త కోసం క్లిక్‌ చేయండి