Breaking | Feedback | ePratibha | E-PAPER | Pratibha

Karnataka Results: కాంగ్రెస్‌ వ్యూహాన్ని ఛేదించలేకపోయాం..: బొమ్మై

కర్ణాటక అసెంబ్లీ ఎన్నికల (Karnataka Elections) కౌంటింగ్‌ ప్రక్రియ ముగిసింది. రాష్ట్రంలోని 224 స్థానాల్లో 136 సీట్లను కైవసం చేసుకుని కాంగ్రెస్‌ అధికారం చేపట్టేందుకు సిద్ధమైంది. మరోవైపు.. భాజపా 65 స్థానాలకే పరిమితమైంది. జేడీఎస్‌ 19, ఇతరులు నాలుగు చోట్ల గెలుపొందారు. తదుపరి పరిణామాల లైవ్‌ అప్‌డేట్స్‌ మీ కోసం..

Updated : 14 May 2023 16:50 IST

13/05/2023 22:23(IST)

భాజపాకు చెంపదెబ్బలాంటి తీర్పు: వేముల ప్రశాంత్‌రెడ్డి

అభివృద్ధి మర్చిపోయి మతాల పేరుతో రాజకీయాలు చేస్తోన్న భాజపా పట్ల యావత్ దేశ ప్రజలు విసుగు చెందారనేందుకు కర్ణాటక ఎన్నికల ఫలితాలే నిదర్శనమని తెలంగాణ మంత్రి వేముల ప్రశాంత్ రెడ్డి అన్నారు. డబుల్ ఇంజిన్ ప్రభుత్వాన్ని తిరస్కరించిన కర్ణాటక ప్రజలు.. భాజపాకి చెంపదెబ్బలాంటి తీర్పునిచ్చారన్నారు. ‘‘అక్రమంగా వచ్చిన సొమ్ముతో ప్రభుత్వాలను కూల్చేస్తూ నీచ రాజకీయాలకు ఒడిగట్టారు. కర్ణాటకలో గెలుపు చూసి తెలంగాణలో ఏమో చేస్తామని ఇక్కడి కాంగ్రెస్‌ నేతలు కలలు కంటున్నారు. కర్ణాటక ఎన్నికల ఫలితాల ప్రభావం తెలంగాణపై ఉండదు. కర్ణాటక ప్రజలకు కొత్త ప్రభుత్వం ద్వారా మేలు జరగాలి. వారు కోరుకుంటున్న అభివృద్ధి జరగాలి’’ అని మంత్రి ఆకాంక్షించారు.

13/05/2023 21:49(IST)

కాంగ్రెస్‌ వ్యూహాన్ని ఛేదించలేకపోయాం.. పూర్తి బాధ్యత నాదే: బొమ్మై

షిగ్గాన్‌: కర్ణాటక అసెంబ్లీ ఎన్నికల్లో భాజపా ఓటమికి పూర్తి బాధ్యత వహిస్తున్నట్లు ముఖ్యమంత్రి బసవరాజ్‌ బొమ్మై వెల్లడించారు. ఓడిపోవడానికి గల కారణాలను విశ్లేషించుకొని, 2024 లోక్‌సభ ఎన్నికలకు సిద్ధమవుతామని, ప్రజా ప్రయోజనాల కోసం ప్రతిపక్ష పార్టీగా బాధ్యతాయుతంగా పోరాటం చేస్తామని అన్నారు. అసెంబ్లీ ఎన్నికల్లో కాంగ్రెస్‌ పార్టీ పక్కా ప్రణాళికతో వ్యవస్థీకృతంగా వ్యవహరించిందని, వాటిని ఛేదించడంలో భాజపా నేతలు విఫలమయ్యారని బొమ్మై పేర్కొన్నారు.

పూర్తి వార్త కథనం కోసం క్లిక్‌ చేయండి

13/05/2023 21:42(IST)

ప్రధానికి ఈ ఫలితాలు చెంపపెట్టులాంటివి: కూనంనేని

భాజపా రూపంలో ఉన్న చెడును కర్ణాటక ప్రజలు ఓడించారని సీపీఐ తెలంగాణ రాష్ట్ర కార్యదర్శి కూనంనేని సాంబశివరావు వ్యాఖ్యానించారు. కర్ణాటక శాసనసభ ఎన్నికల ఫలితాలు దక్షిణ భారతదేశానికే కాకుండా యావత్‌ దేశానికే మార్గదర్శకంగా నిలిచాయన్నారు. అత్యున్నత పదవిలో ఉంటూ.. మతాల పేరుతో ఓట్లు సంపాదించాలని దిగజారి మాట్లాడిన ప్రధానికి ఈ ఫలితాలు చెంపపెట్టులాంటివని పేర్కొన్నారు. ‘‘కర్ణాటకలో ఎక్కడా లేనివిధంగా అవినీతి జరిగితే భాజపా ప్రభుత్వం ఎలాంటి చర్యలు తీసుకొలేదు. మహిళలను లైంగికంగా వేధింపులకు గురిచేసేవారు పెద్ద పెద్ద పదవుల్లో ఉన్నారు. అసమానతలను గుర్తించిన కర్ణాటక ప్రజలు తగిన తీర్పు ఇచ్చారు’’ అని కూనంనేని వ్యాఖ్యానించారు.

13/05/2023 21:20(IST)

ప్రధాని మోదీ.. ఓట్ల కోసం కక్కుర్తి పడ్డారు: నారాయణ

కర్ణాటకలో భాజపా ఓటమి ప్రధాని మోదీని నైతికంగా ఓడించిందని సీపీఐ జాతీయ కార్యదర్శి నారాయణ అన్నారు. ‘‘ఇప్పటివరకు అనేక మంది ప్రధానులు ఎన్నికల ప్రచారం చేశారు. కానీ కర్ణాటక ఎన్నికల ప్రచారంలో కులమతాలను రెచ్చగొట్టేలా ప్రధాని మోదీ ప్రసంగాలు చేశారు. రాజ్యాంగంలోని లౌకికవాదానికి కట్టుబడి ఉండాల్సిన ప్రధాని.. ఓట్ల కోసం కక్కుర్తిపడ్డారు. రాహుల్ గాంధీపై చేసిన కక్ష సాధింపు చర్యలు కాంగ్రెస్‌కు కలిసొచ్చింది. పెరిగిన గ్యాస్, పెట్రోలు ధరలు.. భాజపా ఓటమికి ఒక కారణంగా చెప్పొచ్చు. కర్ణాటకలో భాజపా ఓటమి దేశవ్యాప్తంగా ప్రభావం చూపుతుంది’’ అని నారాయణ అన్నారు.

13/05/2023 20:16(IST)

ప్రభుత్వ ఏర్పాటుపై కాంగ్రెస్‌ దృష్టి.. రేపు శాసనసభాపక్షం భేటీ

కర్ణాటకలో అఖండ విజయం సాధించిన కాంగ్రెస్‌ అక్కడ ప్రభుత్వ ఏర్పాటుపై దృష్టి పెట్టింది. ఇందులో భాగంగా ఆదివారం సాయంత్రం 5.30గంటలకు బెంగళూరులో కాంగ్రెస్‌ శాసనసభాపక్షం భేటీ కానుంది. ఈ సమావేశంలో సీఎం అభ్యర్థి ఎన్నికపై ఎమ్మెల్యేలు చర్చించనున్నారు.

13/05/2023 19:53(IST)

అహం ఎంతో కాలం ఉండదు.. ప్రజల మాట వినాల్సిందే: ఖర్గే

కాంగ్రెస్‌కు ఇదో అపూర్వ విజయని కాంగ్రెస్‌ జాతీయ అధ్యక్షుడు మల్లిఖార్జున ఖర్గే అన్నారు. ఈ విజయం వల్ల దేశంలోనే కొత్త శక్తి ఉద్భవించిందన్నారు. బెంగళూరులో నిర్వహించిన విజయోత్సవ సభలో ఆయన ప్రసంగించారు. కాంగ్రెస్‌ ముక్తభారత్‌ చేస్తామంటూ భాజపా ఎప్పుడూ తమను అంటుండేదన్న ఆయన.. కానీ ఇప్పుడు భాజపాముక్త సౌత్‌ఇండియా నిజమైందన్నారు. అహం అనేది ఎక్కువ కాలం నిలిచి ఉండదన్నారు. ఇది ప్రజాస్వామ్యమని.. మనం ప్రజల మాట వినాలన్నారు. సరైన మార్గం చూపే ప్రజల ముందు తల వంచాల్సిందేనని చెప్పారు. ఈ విజయం కర్ణాటక రాష్ట్ర ప్రజలదని.. వాళ్లే డిసైడ్‌ అయ్యి తమను ఎంచుకున్నారన్నారు. అందువల్లే కాంగ్రెస్‌కు 36 ఏళ్ల తర్వాత రాష్ట్రంలో 136 సీట్లు వచ్చాయని చెప్పారు.

13/05/2023 19:31(IST)

కాంగ్రెస్‌ చరిత్రలో ఇదో చిరస్మరణీయమైన రోజు.. సూర్జేవాలా

కాంగ్రెస్‌ పార్టీ చరిత్రలో ఈరోజు చిరస్మరణీయమైనదని కాంగ్రెస్‌ సీనియర్‌ నేత రణ్‌దీప్‌ సూర్జేవాలా అన్నారు. ఈ విజయం కర్ణాటక ప్రజలదన్నారు. తమ పార్టీని గెలిపించిన కర్ణాటక ప్రజలకు కృతజ్ఞతలు తెలిపారు. పార్టీ గెలుపునకు కృషిచేసిన ప్రతి ఒక్కరికీ ధన్యవాదాలు తెలిపారు. ఇది ఒ క్క కాంగ్రెస్‌ విజయం కాదు.. కర్ణాటక ప్రజలందరిదీ అన్నారు. రాహుల్భారత్‌ జోడో యాత్ర తమ పార్టీ విజయానికి కలిసొచ్చిందని పేర్కొన్నారు.

13/05/2023 19:25(IST)

భాజపా పతనం దక్షిణాది నుంచే మొదలైంది.. : హరీశ్‌రావు

దక్షిణాది నుంచే భాజపా పతనం ప్రారంభమైందని, అన్నిచోట్లా ఆ పార్టీ ఖాతా ముగుస్తుందని తెలంగాణ మంత్రి హరీశ్‌రావు అన్నారు. తెలంగాణలో భాజపాకు కనీసం డిపాజిట్లు కూడా దక్కవని వ్యాఖ్యానించారు. కర్ణాటక తీర్పుతో భాజపా నుంచి దక్షిణ భారతదేశానికి విముక్తి లభించిందన్న హరీశ్‌రావు.. ఈ చరిత్ర కొనసాగుతుందని ట్వీట్‌ చేశారు. కర్ణాటకలో కొలువుదీరనున్న కొత్త ప్రభుత్వానికి అభినందనలు తెలిపారు.

13/05/2023 19:17(IST)

ప్రజా తీర్పును సవినయంగా అంగీకరిస్తున్నాం.. యడియూరప్ప

‘‘కర్ణాటక ప్రజల తీర్పును సవినయంగా అంగీకరిస్తున్నాం. మాకు మద్దతుగా నిలిచిన ఓటర్లకు కృతజ్ఞతలు. గెలిచిన అభ్యర్థులందరికీ అభినందనలు. ఈ ఎన్నికల్లో భాజపాను గెలిపించడానికి కష్టపడిన కార్యకర్తలందరికీ మనస్ఫూర్తిగా కృతజ్ఞతలు. భాజపా ప్రజల గొంతుకగా కొనసాగుతుంది.. పార్టీని బలోపేతం చేసేందుకు కృషిచేస్తాం’’ అని మాజీ సీఎం యడియూరప్ప ట్వీట్‌ చేశారు.

13/05/2023 18:54(IST)

కర్ణాటక ఫలితాల్లో జేడీఎస్‌కు ఊహించని షాక్‌!

కర్ణాటక ఎన్నికల ఫలితాల్లో జేడీఎస్‌కు ఊహించిన పరాభవం ఎదురైంది. మైసూరు ప్రాంతం మినహా ఎక్కడా ఆ పార్టీ ప్రభావం కనబడలేదు. తాము కింగ్‌ మేకర్‌ కాదు.. కింగ్‌ అవుతామంటూ ఆ పార్టీ చీఫ్‌ కుమారస్వామి చెప్పినప్పటికీ కేవలం 19 సీట్లతోనే సరిపెట్టుకోవాల్సి వచ్చింది. మైసూరు ప్రాంతంలో జేడీఎస్‌ 14 సీట్లు గెలుచుకోగా.. హైదరాబాద్‌ కర్ణాటక ప్రాంతంలో 3, మధ్య కర్ణాటక, బాంబే కర్ణాటక ప్రాంతాల్లో ఒక్కొక్క సీటు చొప్పున గెలుచుకోగలిగింది.

13/05/2023 18:46(IST)

కాంగ్రెస్‌కు సీఎం నీతీశ్‌ కంగ్రాట్స్‌!

కర్ణాటక అసెంబ్లీ ఎన్నికల్లో స్పష్టమైన మెజార్టీతో విజయం సాధించిన కాంగ్రెస్‌ పార్టీకి బిహార్‌ సీఎం, జేడీయూ అధినేత నీతీశ్‌ కుమార్‌ శుభాకాంక్షలు చెప్పారు. ఈ మేరకు ఆయన ట్వీట్‌ చేశారు.

13/05/2023 18:42(IST)

భారత్‌ జోడో యాత్ర కలిసొచ్చింది: ప్రియాంక గాంధీ

కర్ణాటక ఎన్నికల్లో అపూర్వ విజయాన్ని సొంతం చేసుకున్న కాంగ్రెస్‌ను ప్రజలు ఆశీర్వదించారని పార్టీ అగ్రనేత, ఏఐసీసీ కార్యదర్శి ప్రియాంక గాంధీ తెలిపారు. కర్ణాటకలో పార్టీని గెలిపించిన ప్రజలకు ఆమె కృతజ్ఞతలు తెలిపారు. కాంగ్రెస్‌ న్యాయం చేస్తుందని ప్రజలు నమ్మారని.. రాహుల్‌ చేపట్టిన భారత్‌ జోడో యాత్ర కలిసొచ్చిందన్నారు. ఈ సందర్భంగా డీకే శివకుమార్‌, సిద్ధరామయ్యకు ప్రియాంక అభినందనలు తెలిపారు.

13/05/2023 18:35(IST)

ఫలితాలపై అమిత్‌ షా ట్వీట్‌

‘‘భాజపాకు ఇన్నాళ్లు సేవ చేసే అవకాశం ఇచ్చినందుకు కర్ణాటక ప్రజలకు నా హృదయపూర్వక కృతజ్ఞతలు. ప్రధానమంత్రి మోదీ నాయకత్వంలోని భాజపా కర్ణాటక ప్రజల సంక్షేమం, అభివృద్ధి కోసం మరింత కృషి చేస్తుంది.’’

-కర్ణాటక ఫలితాలపై అమిత్‌ షా

13/05/2023 18:28(IST)

భాజపా ఓటు బ్యాంకు చెదరలేదు.. మత రాజకీయాలు చేసింది కాంగ్రెస్సే: బండి

కర్ణాటక ఎన్నికల ఫలితాలపై భాజపా తెలంగాణ రాష్ట్ర అధ్యక్షుడు బండి సంజయ్‌ స్పందించారు. అక్కడ భాజపా ఓటు బ్యాంకు చెక్కు చెదరలేదన్నారు. కర్ణాటక ప్రభావం వేరే రాష్ట్రంపై ఉంటుందనుకోవడం సరికాదని అభిప్రాయపడ్డారు. మత రాజకీయాలు చేసింది కాంగ్రెస్సేనని.. కర్ణాటకలో కాంగ్రెస్‌కు కేసీఆర్‌ మద్దతు ఇచ్చారని విమర్శించారు. ఒక్క రాష్ట్రంలో గెలవగానే కేంద్రంలో అధికారంలోకి వస్తారా? అని ప్రశ్నించారు. తెలంగాణలో కేసీఆర్‌కు భాజపానే ప్రయత్నామ్నాయం అన్నారు. తెలంగాణలో డబుల్‌ ఇంజిన్‌ సర్కార్‌ రావడం ఖాయమన్నారు. వచ్చే ఎన్నికల్లో కాంగ్రెస్‌, భారాస కలిసి పోటీ చేస్తాయని.. కర్ణాటకలో కాంగ్రెస్‌కు కేసీఆర్‌ డబ్బులిచ్చారని ఆరోపించారు. భాజపా ఓడిపోవాలని కేసీఆర్‌ కోరుకున్నారన్నారు.

13/05/2023 17:29(IST)

‘చామరాజనగర్‌’ సెంటిమెంట్‌.. ఆనవాయితీ రిపీట్‌

కన్నడనాట రాజకీయ ఆనవాయితీ పునరావృతమైంది. అసెంబ్లీ ఎన్నికల ఫలితాల్లో కాంగ్రెస్‌ అఖండ విజయం సాధించింది. కర్ణాటక ఎన్నికల్లో ఓ పార్టీ ఈ స్థాయిలో మెజార్టీ దక్కించుకోవడం దాదాపు 34 ఏళ్ల తర్వాత మళ్లీ ఇప్పుడే కావడం విశేషం. ఈ సందర్భంగా తాజా ఫలితాల్లో కొన్ని ప్రత్యేకతలివే..

పూర్తి కథనం కోసం క్లిక్‌ చేయండి

13/05/2023 17:23(IST)

5 శాతం అధిక ఓట్లతో మరో 56 స్థానాలు ‘హస్త’గతం!

2018 ఎన్నికలతో పోలిస్తే.. ఈ ఎన్నికల్లో 5 శాతం అధిక ఓట్లతో కాంగ్రెస్‌ పార్టీ 56 స్థానాలు అధికంగా సాధించింది. అదే విధంగా జేడీఎస్‌.. 5 శాతం ఓట్లు కోల్పోయింది. మధ్య కర్ణాటక, హైదరాబాద్‌ కర్ణాటక, మైసూరు, బాంబే కర్ణాటక ప్రాంతాల్లో కాంగ్రెస్‌ సత్తా చాటింది. ఓడిపోయినా.. బెంగళూరు, కోస్తా కర్ణాటకలో భాజపా పట్టునిలుపుకొంది. జేడీఎస్‌కు మాత్రం ఊహించని పరాభవం ఎదురైంది. మైసూరు మినహా ఎక్కడ ప్రభావం చూపలేకపోయింది.

13/05/2023 17:19(IST)

కర్ణాటక ప్రాంతాల వారీగా ఫలితాలు..

* బెంగళూరు ప్రాంతం: కాంగ్రెస్‌ 13, భాజపా 15, జేడీఎస్‌ 00

* హైదరాబాద్‌ కర్ణాటక: కాంగ్రెస్‌ 26, భాజపా 10, జేడీఎస్‌ 03

* బాంబే కర్ణాటక: కాంగ్రెస్‌ 33, భాజపా 16, జేడీఎస్‌ 01

* మైసూరు ప్రాంతం: కాంగ్రెస్‌ 39, భాజపా 06, జేడీఎస్‌ 14

* కోస్తా కర్ణాటక: కాంగ్రెస్‌ 06, భాజపా 13, జేడీఎస్‌ 00

* మధ్య కర్ణాటక: కాంగ్రెస్‌ 19, భాజపా 05, జేడీఎస్‌ 01

13/05/2023 17:05(IST)

ఎవరెవరు గెలిచారు.. ఎవరు ఓడారు..?

కర్ణాటక ఎన్నికల్లో ప్రముఖుల్లో కొందరు విజయం సాధిస్తే.. మంత్రులు సహా కొందరు సీనియర్ నేతలకు పరాభవం తప్పలేదు. షిగ్గావ్ స్థానంలో ముఖ్యమంత్రి బసవరాజ్ బొమ్మై దాదాపు 22 వేల ఓట్ల తేడాతో గెలుపొందారు. కర్ణాటక పీసీసీ అధ్యక్షుడు డీకే శివకుమార్ కనకపురా స్థానంలో హోంమంత్రి ఆర్.అశోకపై గెలిచారు. ఇంకా ఎవరెవరు గెలిచారు.. ఓడారో.. పరిశీలిస్తే..

13/05/2023 17:01(IST)

రానున్న ఆయా ఎన్నికల్లోనూ భాజపాకు గుణపాఠం చెబుతారు.. గహ్లోత్‌

కర్ణాటకలో కాంగ్రెస్‌ విజయంపై ఆ పార్టీ నేత, రాజస్థాన్‌ ముఖ్యమంత్రి అశోక్‌ గహ్లోత్‌ స్పందించారు. రానున్న ఆయా రాష్ట్రాల ఎన్నికల్లోనూ భాజపాకు ప్రజలు గుణపాఠం చెబుతారని వ్యాఖ్యానించారు. ఛత్తీస్‌గఢ్, మధ్యప్రదేశ్, రాజస్థాన్‌లలో భాజపాకు ఓటమి తప్పదన్నారు.

13/05/2023 16:54(IST)

నిరంకుశ రాజకీయాలు ఓడిపోయాయి.. దీదీ

మార్పు దిశగా నిర్ణయాత్మక తీర్పు వెలువరించిన కర్ణాటక ప్రజలకు సెల్యూట్‌ అని పశ్చిమ బెంగాల్‌ ముఖ్యమంత్రి, టీఎంసీ అధినేత్రి మమతా బెనర్జీ ట్వీట్‌ చేశారు. ‘క్రూరమైన నిరంకుశ రాజకీయాలు ఓడిపోయాయి. ప్రజలు బహుళత్వం, ప్రజాస్వామ్యం గెలవాలని కోరుకున్నప్పుడు.. ఆధిపత్యం చెలాయించే ఏ శక్తి వారిని అణచివేయలేదు. ఇదే రేపటికి గుణపాఠం’ అని పేర్కొన్నారు.

13/05/2023 16:48(IST)

హీరో నిఖిల్‌కు మరో ఫ్లాప్‌.. గాలి కుటుంబానికి నిరాశ

కర్ణాటక విధాన సభ ఎన్నికల్లో కథానాయకుడు, మాజీ సీఎం కుమార స్వామి తనయుడు నిఖిల్‌ గౌడ ఓటమి పాలయ్యారు. అలాగే గాలి జనార్దన్‌రెడ్డి కుటుంబంలో ఆయన ఒక్కరే విజయం సాధించారు.

పూర్తి కథనం కోసం క్లిక్‌ చేయండి

13/05/2023 16:39(IST)

కాంగ్రెస్‌.. +56.. భాజపా -39

కర్ణాటక అసెంబ్లీ ఎన్నికల్లో కాంగ్రెస్‌ పార్టీ ఘన విజయం సాధించింది. 2018 ఎన్నికలతో పోలిస్తే కాంగ్రెస్‌ అదనంగా 56 స్థానాలు సంపాదించింది. అదే అధికార భాజపా.. 39 స్థానాలు కోల్పోయింది. జేడీఎస్‌ సైతం 2018 ఎన్నికలతో పోలిస్తే 18 సీట్లు కోల్పోయింది.

13/05/2023 16:27(IST)

ముగిసిన లెక్కింపు.. 136 స్థానాల్లో కాంగ్రెస్‌ గెలుపు

కర్ణాటక అసెంబ్లీ ఎన్నికల ఓట్ల లెక్కింపు ప్రక్రియ పూర్తయ్యింది. మొత్తం 224 స్థానాల్లో కాంగ్రెస్‌ అభ్యర్థులు 136, భాజపా 65, జేడీఎస్‌ 19, ఇతరులు 4 స్థానాల్లో గెలుపొందారు.

13/05/2023 16:26(IST)

సిద్ధా.. శివ.. ముఖ్యమంత్రి ఎవరు..?

కర్ణాటకలో కాంగ్రెస్‌కు ఓటర్లు విస్పష్టమైన మెజార్టీని అందించారు. దీంతో ముఖ్యమంత్రి స్థానానికి ఆ పార్టీలోని ఇద్దరు సీనియర్‌ నేతల మధ్య రేసు మొదలైంది. ఎన్నికల్లో విజయపథంలో నడిపిన వీరిద్దరిలో ఎవరి వైపు పార్టీ అధినాయకత్వం మొగ్గు చూపుతుందనేది ఆసక్తికరంగా మారింది.

పూర్తి కథనం కోసం క్లిక్‌ చేయండి

13/05/2023 16:12(IST)

గాలి జనార్దన్‌ రెడ్డి గెలుపు.. ఆయన సతీమణి ఓటమి

కల్యాణ రాజ్య ప్రగతి పక్ష పేరుతో నూతన రాజకీయ పార్టీని స్థాపించి.. ఎన్నికల బరిలో దిగిన గాలి జనార్దన్‌ రెడ్డి.. గంగావతి స్థానం నుంచి విజయం సాధించారు. అయితే, బళ్లారి సిటీ నుంచి పోటీ చేసిన ఆయన సతీమణి అరుణ లక్ష్మి ఓటమిపాలయ్యారు.

13/05/2023 16:04(IST)

భాజపా ఓటమికి నాదే బాధ్యత.. బొమ్మై

కర్ణాటక ఎన్నికల్లో భాజపా పరాజయానికి తానే బాధ్యత తీసుకుంటున్నట్లు సీఎం బసవరాజ్‌ బొమ్మై ప్రకటించారు. ఎన్నికల్లో ఓటమికి అనేక కారణాలున్నాయని తెలిపారు. వాటన్నింటిని తెలుసుకుని.. పార్లమెంటు ఎన్నికల నాటికి పార్టీని మరోసారి బలోపేతం చేస్తామని పేర్కొన్నారు.

13/05/2023 16:01(IST)

BJP: కర్ణాటకలో కమలం వాడిపోవడానికి కారణాలెన్నో..!

కర్ణాటక ఎన్నికల ఫలితాల్లో అధికార భాజపా చతికిలపడింది. గతంలో సాధించిన సీట్లలో దాదాపు 40కిపైగా ఈ సారి కోల్పోయింది. కేవలం కొన్ని సామాజిక వర్గాలపై ఆధారపడటం.. అవినీతి విషయంలో కఠిన చర్యలు తీసుకోకపోవడం.. రిజర్వేషన్ల తేనెతుట్టెను ఎన్నికలకు ముందు కదపడం వంటివి కమలం విజయావకాశాలను దెబ్బతీశాయి.

పూర్తి కథనం కోసం క్లిక్‌ చేయండి

13/05/2023 15:55(IST)

కన్నడనాట ఫలించిన ఉచిత వ్యూహం!

కర్ణాటక అసెంబ్లీ ఎన్నికల్లో కాంగ్రెస్‌ విజయానికి ఉచిత పథకాల హామీలు కూడా ఇతోధికంగా తోడ్పడ్డాయి. భాజపా, జేడీఎస్‌తో పోలిస్తే ఎన్నికల మేనిఫెస్టోలో కాంగ్రెస్ అనేక ఉచిత హామీలు ఇచ్చింది. ఉచిత కరెంటు, మహిళలకు ఆర్థిక సాయం, ఉచిత బియ్యం, నిరుద్యోగ భృతి వంటి నాలుగు హామీలను ప్రధానంగా అమలు చేస్తామని చెప్పింది. ఇలా ఈ ఎన్నికల్లో కాంగ్రెస్ పార్టీ అనుసరించిన ఉచిత హామీల వ్యూహం ఆ పార్టీకి అనుకూల ఫలితాలను ఇచ్చింది.

13/05/2023 15:50(IST)

ప్రజలకు ఈ విజయం అంకితం.. డీకేఎస్‌

కనకపురా స్థానం నుంచి గెలుపొందిన కర్ణాటక పీసీసీ చీఫ్‌ డీకే శివకుమార్‌.. ఎన్నికల అధికారుల నుంచి ధ్రువపత్రాన్ని అందుకున్నారు. తనపై నమ్మకం ఉంచిన ప్రజలకు ఈ విజయాన్ని అంకితం చేస్తున్నానని ఆయన పేర్కొన్నారు.

13/05/2023 15:40(IST)

ఆయా ఉపఎన్నికల ఫలితాలివి..

పంజాబ్‌, ఉత్తర్‌ప్రదేశ్‌, ఒడిశాలలో జరిగిన ఉప ఎన్నికల ఫలితాలూ విడుదలయ్యాయి.

* పంజాబ్‌లోని జలంధర్‌ ఎంపీ స్థానానికి నిర్వహించిన ఉప ఎన్నికలో ఆప్‌ అభ్యర్థి సుశీల్‌ కుమార్‌ రింకూ విజయం సాధించారు. కాంగ్రెస్‌ ఎంపీ సంతోష్‌ సింగ్‌ మరణంతో ఉప ఎన్నిక నిర్వహించారు.

* ఒడిశాలోని ఝార్సుగూడ అసెంబ్లీ ఉపఎన్నికలో అధికార బీజేడీ అభ్యర్థి దీపాలిదాస్‌ గెలుపొందారు. దీంతో బీజేడీ తన సిట్టింగ్‌ స్థానాన్ని నిలబెట్టుకున్నట్లయ్యింది.

* ఉత్తర్‌ప్రదేశ్‌లోని రెండు అసెంబ్లీ స్థానాల్లో (సువార్‌, ఛబే) అప్నాదళ్‌ (సోనేలాల్‌) అభ్యర్థులు విజయం సాధించారు. సువార్‌లో అహ్మద్‌ అన్సారీ, ఛబేలో రింకిలాల్‌ గెలిచారు.

13/05/2023 15:35(IST)

శ్రీనగర్‌లో కాంగ్రెస్‌ సంబరాలు..

కర్ణాటక ఎన్నికల్లో కాంగ్రెస్‌ విజయం సాధించడంతో దేశవ్యాప్తంగా ఆ పార్టీ శ్రేణుల్లో జోష్‌ నెలకొంది. జమ్మూ- కశ్మీర్‌లోని శ్రీనగర్‌లో కార్యకర్తలు ఆనందంతో నృత్యాలు చేశారు.

13/05/2023 15:32(IST)

మోదీ 20 సార్లు వచ్చి ప్రచారం చేసినా..: సిద్ధరామయ్య

డబ్బులతో ఎన్నికల్లో గెలవాలన్న భాజపా కుట్ర ఫలించలేదని కాంగ్రెస్‌ నేత సిద్ధరామయ్య అన్నారు. భాజపా పాలనలో ప్రజలు విసిగిపోయారు. కర్ణాటక ప్రజలు మార్పు కోరుకున్నారని పేర్కొన్నారు. ‘‘మోదీ 20 సార్లు వచ్చి ప్రచారం చేసినా ఫలితం లేదు. గతంలో ఏ ప్రధాని ఆ విధంగా ప్రచారం చేయలేదు. మేము 130కిపైగా స్థానాల్లో విజయం సాధించాం. కాంగ్రెస్‌ పార్టీకి ఇది చాలా పెద్ద విజయం’’ అని సిద్ధరామయ్య పేర్కొన్నారు.

13/05/2023 15:19(IST)

కర్ణాటక ఫలితాలు తెలంగాణపై ప్రభావం చూపవు: మంత్రి కేటీఆర్‌

కేరళ స్టోరీ సినిమా పొరుగు రాష్ట్రమైన కర్ణాటక ప్రజలను ఆకట్టుకోవడంలో ఎలా విఫలమైందో.. అదే విధంగా కర్ణాటక రాష్ట్ర ఎన్నికల ఫలితాలు తెలంగాణపై ఎటువంటి ప్రభావం చూపబోవని మంత్రి కేటీఆర్‌ ట్వీట్‌ చేశారు. నీచమైన, విభజనవాద రాజకీయాలను తిరస్కరించిన కర్ణాటకవాసులకు థ్యాంక్స్‌ చెప్పారు. హైదరాబాద్‌, బెంగళూరుల మధ్య ఆరోగ్యకర పోటీ నెలకొనాలని ఆకాంక్షించారు. ఎన్నికల్లో విజయం సాధించిన కాంగ్రెస్‌కు ఈ సందర్భంగా శుభాకాంక్షలు తెలిపారు. కర్ణాటక ఎన్నికల ఫలితాలే రేపు తెలంగాణలో పునరావృతమవుతాయని టీపీసీసీ చీఫ్‌ రేవంత్‌రెడ్డి వ్యాఖ్యానించిన నేపథ్యంలో మంత్రి కేటీఆర్‌ ట్వీట్‌ ప్రాధాన్యం సంతరించుకుంది.

13/05/2023 15:14(IST)

సోనియాకు మాటిచ్చినట్టే..: ఉద్వేగానికి గురైన డీకే

కర్ణాటక అసెంబ్లీ ఎన్నికల్లో కాంగ్రెస్‌ విజయం సాధించింది. ఈ సందర్భంగా మీడియాతో మాట్లాడుతూ పార్టీ రాష్ట్ర చీఫ్ డీకే శివకుమార్ ఉద్వేగానికి గురయ్యారు. కర్ణాటకలో పార్టీని గెలిపిస్తానని సోనియాగాంధీకి మాట ఇచ్చానని చెప్పారు.

పూర్తి కథనం కోసం క్లిక్‌ చేయండి

13/05/2023 15:00(IST)

భాజపాకు గెలుపోటములు కొత్త కాదు.. యడియూరప్ప

కర్ణాటక ప్రజల తీర్పును గౌరవపూర్వకంగా అంగీకరిస్తున్నట్లు పార్టీ సీనియర్‌ నేత, మాజీ సీఎం యడియూరప్ప తెలిపారు. అయితే, భాజపాకు గెలుపోటములు కొత్త కాదని వ్యాఖ్యానించారు. తాజా ఫలితాలతో పార్టీ శ్రేణులు ఆందోళన చెందాల్సిన అవసరం లేదని పేర్కొన్నారు. పార్టీ ఓటమిపై ఆత్మపరిశీలన చేసుకుంటామని చెప్పారు.

13/05/2023 14:50(IST)

కన్నడనాట.. ‘హస్త’వాసిని మార్చిన ‘పంచ’తంత్రం

వరుస ఓటములతో అస్థిత్వాన్ని కోల్పోయే ప్రమాదం అంచు వరకు వెళ్లిన హస్తం పార్టీ.. తిరిగి బలంగా పుంజుకుంది. ఏడాది ఆరంభంలో హిమాచల్‌ప్రదేశ్‌ ఇచ్చిన విజయోత్సాహం.. కాంగ్రెస్‌ నేతల్లో బూస్ట్‌ నింపింది. అదే జోరుతో ఇప్పుడు దక్షిణాదిలో కీలక రాష్ట్రమైన కర్ణాటకను చేజిక్కించుకుంది. మరి మరి ‘హస్త’వారిని మార్చిన కాంగ్రెస్‌ ‘పంచ’తంత్రం ఏంటో చూద్దాం..!

పూర్తి కథనం కోసం క్లిక్‌ చేయండి

13/05/2023 14:45(IST)

ఇది అందరి విజయం.. కర్ణాటక ప్రజల విజయం: రాహుల్‌

కర్ణాటకలో కాంగ్రెస్‌ సాధించిన అపూర్వ విజయంపై ఆ పార్టీ అగ్రనేత రాహుల్ గాంధీ హర్షం ప్రకటించారు. ముందుగా కర్ణాటకలో తమ పార్టీని గెలిపించిన ప్రజలకు కృతజ్ఞతలు చెప్పారు. కాంగ్రెస్‌పై నమ్మకం ఉంచి గెలిపించిన ప్రతి ఒక్కరికీ థాంక్స్‌ చెప్పారు. కర్ణాటకలో పెత్తందార్లకు, పేదలకు మధ్య యుద్ధం జరిగిందన్న ఆయన.. కాంగ్రెస్‌ పేదల తరఫున పోరాడిందన్నారు. ఇది అందరి విజయం.. కర్ణాటక ప్రజల విజయంగా అభివర్ణించారు. ఎన్నికల్లో తాము ఇచ్చిన వాగ్దానాలను తొలి కేబినెట్‌లోనే నెరవేరుస్తామని స్పష్టంచేశారు. భవిష్యత్తు ఎన్నికల్లోనూ ఇవే ఫలితాలు వస్తాయని విశ్వాసం వ్యక్తంచేశారు.

13/05/2023 14:29(IST)

మ్యాజిక్‌ ఫిగర్‌ దాటిన కాంగ్రెస్‌

కర్ణాటకను కాంగ్రెస్‌ కైవసం చేసుకుంది. మ్యాజిక్‌ ఫిగర్‌ 113 స్థానాలు గెలుచుకొని.. మరో 19 స్థానాల్లో ఆధిక్యంలో దూసుకుపోతోంది. మొత్తం 224 సీట్లకు గాను 113 సీట్లు గెలుచుకుంది. భాజపా 70 స్థానాలు దాటకపోగా.. జేడీఎస్‌ సైతం పాతిక స్థానాలకు చేరలేకపోయింది.

13/05/2023 14:21(IST)

కన్నడ ప్రజలకు కృతజ్ఞతలు.. డీకే శివకుమార్‌

కాంగ్రెస్‌కు మద్దతు ఇచ్చిన కన్నడ ప్రజలకు కర్ణాటక కాంగ్రెస్‌ చీఫ్‌ డీకే శివకుమార్‌ కృతజ్ఞతలు చెప్పారు. కాంగ్రెస్‌ నేతలు, కార్యకర్తలు పూర్తిస్థాయిలో పార్టీ విజయం కోసం కృషిచేశారన్నారు. రాష్ట్రస్థాయి నుంచి బూత్‌ స్థాయి వరకు నేతలు ఎంతగానో శ్రమించారని తెలిపారు. సమష్టి కృషితోనే కర్ణాటక ఎన్నికల్లో గెలిచామన్నారు. ప్రజలు గాంధీ కుటుంబంపై విశ్వాసం ఉంచారని చెప్పారు.

13/05/2023 14:00(IST)

అందుకే కాంగ్రెస్‌కు అధికారమిచ్చారు.. సిద్ధరామయ్య

ఇది సెక్యులర్ పార్టీ విజయమని కాంగ్రెస్‌ నేత సిద్ధరామయ్య ట్వీట్‌ చేశారు. 40 శాతం కమీషన్‌పై.. నిజాయతీ గెలిచిందన్నారు. ‘కర్ణాటక ప్రజలు స్థిరమైన ప్రభుత్వాన్ని కోరుకున్నారు. అందుకే కాంగ్రెస్‌కు అధికారాన్ని కట్టబెట్టారు’ అని పేర్కొన్నారు. భాజపా అవినీతిని సమర్థంగా ఎండగట్టారని పేర్కొంటూ.. పార్టీ శ్రేణులకు ధన్యవాదాలు తెలిపారు.

13/05/2023 13:50(IST)

భాజపా అర్థ, అంగబలానికి ఎదురొడ్డి నిలిచారు.. చిదంబరం

‘నిర్ణయాత్మక తీర్పు వెలువరించిన కర్ణాటక ప్రజలకు ధన్యవాదాలు’ అని కాంగ్రెస్‌ సీనియర్‌ నేత పి.చిదంబరం ట్వీట్‌ చేశారు. ‘ఈ ఎన్నికలు అసెంబ్లీ ఎన్నికల కంటే ఎక్కువ. భారత రాజ్యాంగ విలువలను కాపాడుకోవడంతోపాటు ఆధిపత్య సిద్ధాంతాలు, పక్షపాత ధోరణి వల్ల వాటిల్లే నష్టాలను అరికట్టే ప్రయత్నం ఇది’ అని పేర్కొన్నారు. భాజపా అర్థ, అంగబలానికి కర్ణాటక ప్రజలు ఎదురొడ్డి నిలిచారన్నారు.

13/05/2023 13:36(IST)

కర్ణాటకలో ‘సింధియా’ లాంటివారు లేరు..!

‘ఆపరేషన్‌ కమలం’ కోసం.. రూ.కోట్లల్లో ఖర్చుకు భాజపా వెనుకాడదు. కానీ, కర్ణాటకలో కాంగ్రెస్‌కు సంపూర్ణ మెజారిటీ వస్తుంది. పైగా ఈ రాష్ట్రంలో ‘సింధియా’ లాంటి వ్యక్తులు లేరు. కర్ణాటకలో కాంగ్రెస్‌కు నమ్మకమైన మనుషులు ఉన్నారు. - దిగ్విజయ్‌ సింగ్‌, కాంగ్రెస్‌ నేత

మధ్యప్రదేశ్‌లో 2020లో జ్యోతిరాదిత్య సింధియాతోపాటు పలువురు ఎమ్మెల్యేలు కాంగ్రెస్‌ నుంచి వెళ్లిపోవడంతో కమల్‌నాథ్‌ ప్రభుత్వం కూలిపోయిన విషయం తెలిసిందే. అనంతరం భాజపా నేత శివరాజ్‌ సింగ్‌ ముఖ్యమంత్రి అయ్యారు.

13/05/2023 13:21(IST)

రాహుల్‌ గాంధీ పాదయాత్ర ఉపకరించింది.. సిద్ధరామయ్య

డబ్బుతో ఎన్నికల్లో గెలవాలన్న భాజపా శ్రమ ఫలించలేదని కాంగ్రెస్‌ సీనియర్‌ నేత, మాజీ సీఎం సిద్ధరామయ్య వ్యాఖ్యానించారు. ‘కాంగ్రెస్‌కు చాలా కీలకమైన ఎన్నికలు ఇవి. రాహుల్‌ పాదయాత్ర పార్టీకి ఉపకరించింది. భాజపా నేతలు ఎన్నికల్లో చాలా ఖర్చు చేశారు. 2018లోనూ ‘ఆపరేషన్‌ కమలం’ జరిగింది. డబ్బులిచ్చి నేతలను కొనుగోలు చేశారు. అయితే, విద్వేష రాజకీయాలను ప్రజలు ఉపేక్షించరు. ఏ పార్టీ.. దేశాన్ని రక్షిస్తుందో ప్రజలకు తెలుసు’ అని మాట్లాడారు.

13/05/2023 13:11(IST)

గాంధీ కుటుంబంపై విశ్వాసం ఉంచారు.. డీకేఎస్‌

కాంగ్రెస్‌ పార్టీ సత్తా చాటడంపై ఆ పార్టీ కర్ణాటక అధ్యక్షుడు డీకే శివకుమార్‌ స్పందించారు. ‘ఎన్నికల్లో ప్రజలు కాంగ్రెస్‌కు మద్దతు ఇచ్చారు. వారికి ధన్యవాదాలు. రాష్ట్రస్థాయి నుంచి బూత్‌ స్థాయివరకు నేతలు శ్రమించారు. సమష్టి కృషితో ఎన్నికల్లో గెలిచాం. గాంధీ కుటుంబంపై ప్రజలు విశ్వాసం ఉంచారు’ అని మాట్లాడారు.

13/05/2023 13:06(IST)

ఇది ప్రజా విజయం.. కాంగ్రెస్‌ అధ్యక్షుడు ఖర్గే

కర్ణాటకలో కాంగ్రెస్‌ ఆధిక్యత.. ప్రజా విజయమేనని కాంగ్రెస్‌ అధ్యక్షుడు మల్లికార్జున ఖర్గే వ్యాఖ్యానించారు. ఇప్పటివరకు కాంగ్రెస్‌ పార్టీ 53 స్థానాల్లో విజయం సాధించింది. 48 స్థానాల్లో ముందంజలో ఉంది.

13/05/2023 13:01(IST)

కాంగ్రెస్‌ శ్రేణుల సంబరాలు.. ట్రాఫిక్‌లో చిక్కుకుపోయిన బొమ్మై కాన్వాయ్‌

హవేరిలో కాంగ్రెస్‌ శ్రేణుల సంబరాలు జోరుగా సాగాయి. ఈ క్రమంలోనే ఏర్పడిన ట్రాఫిక్‌లో సీఎం బసవరాజ్‌ బొమ్మై కాన్వాయ్‌ చిక్కుకుపోయింది. దీంతో ఆయన వాహనంలోంచే పలువురిని పలకరించారు. ఇదిలా ఉండగా.. షిగ్గావ్ నియోజకవర్గం నుంచి బొమ్మై గెలుపొందిన విషయం తెలిసిందే.

13/05/2023 12:56(IST)

ప్రధాని నరేంద్ర మోదీ ఓడిపోయారు.. జైరాం రమేశ్‌

క‌ర్ణాట‌క‌లో ఎన్నికల ఫలితాలను బట్టి కాంగ్రెస్‌ పార్టీ గెలిచింది.. ప్రధాన మంత్రి నరేంద్ర మోదీ ఓడిపోయినట్లు తెలుస్తోందని కాంగ్రెస్‌ సీనియర్‌ నేత జైరాం రమేశ్‌ వ్యాఖ్యానించారు. ఈ మేరకు ఆయన ఓ ట్వీట్‌ చేశారు.

‘కాంగ్రెస్ పార్టీ.. స్థానిక సమస్యలైన జీవనోపాధి, ఆహార భద్రత, ధరల పెరుగుదల, రైతు కష్టాలు, విద్యుత్ సరఫరా, నిరుద్యోగం, అవినీతిపై పోరాడింది. ప్రధాని మోదీ మాత్రం విభజనవాదాన్ని ప్రచారం చేశారు’ అని పేర్కొన్నారు.

13/05/2023 12:50(IST)

తమిళనాడు సీఎంతో హస్తం పార్టీ చర్చలు..?

‘ఆపరేషన్‌ కమలం’ ప్రభావం తమపై పడకుండా ఉండేందుకు కాంగ్రెస్ అధిష్ఠానం ముందస్తు చర్యలు తీసుకుంటున్నట్లు తెలుస్తోంది. తమ ఎమ్మెల్యేలను రక్షించుకోవడానికి ఏర్పాట్లు చేస్తోంది. గెలుపొందిన ఎమ్మెల్యేలను తమిళనాడు తరలించేందుకు యోచిస్తున్నట్లు సమాచారం.

పూర్తి కథనం కోసం క్లిక్‌ చేయండి

13/05/2023 12:44(IST)

మెజారిటీ మార్కు చేరుకోవడంలో విఫలమయ్యాం: బొమ్మై

మెజారిటీ మార్కు చేరుకోవడంలో విఫలమయ్యామని సీఎం, భాజపా నేత బసవరాజ్‌ బొమ్మై వ్యాఖ్యానించారు. ఫలితాలు వచ్చాక సమగ్రంగా విశ్లేషించుకుంటామని తెలిపారు. వివిధ స్థాయిల్లో లోటుపాట్లు తదితర అంశాలపై చర్చించి, వాటిని అధిగమిస్తూ ముందుకు సాగుతామని పేర్కొన్నారు.

13/05/2023 12:41(IST)

కర్ణాటక ఫలితాలే రేపు తెలంగాణలో.. రేవంత్‌ రెడ్డి

కర్ణాటకలో కాంగ్రెస్‌ పార్టీ ఆధిక్యంలో ఉంది. ఇక్కడి ఫలితాలే రేపు తెలంగాణలో పునరావృతమవుతాయని టీపీసీసీ చీఫ్‌ రేవంత్‌రెడ్డి వ్యాఖ్యానించారు. విద్వేష విభజన రాజకీయాలకు కన్నడ ప్రజలు బుద్ధి చెప్పారని పేర్కొన్నారు.

13/05/2023 12:35(IST)

కాంగ్రెస్‌ 35.. భాజపా 14..

మధ్యాహ్నం 12.30 నాటికి కాంగ్రెస్‌ పార్టీ 35 స్థానాల్లో విజయం సాధించింది. భాజపా 14, జేడీఎస్‌ రెండు చోట్ల గెలుపొందాయి. ఇతరులు రెండు సీట్లు దక్కించుకున్నారు. కాంగ్రెస్‌ 88, భాజపా 57, జేడీఎస్‌ 23, ఇతరులు 4 స్థానాల్లో ముందంజలో ఉన్నాయి.

13/05/2023 12:30(IST)

రేపు సీఎల్పీ సమావేశం.. సీఎం పదవిపై నిర్ణయం!

కర్ణాటకలో కాంగ్రెస్‌ పార్టీ మెజారిటీ దిశగా సాగుతోంది. ఈ క్రమంలోనే రేపు ఉదయం బెంగళూరులో రాష్ట్ర సీఎల్పీ సమావేశం నిర్వహించనున్నట్లు సమాచారం. సీఎల్పీ భేటీలో సీఎం అభ్యర్థిని ఎన్నుకోనున్నట్లు తెలుస్తోంది.

13/05/2023 12:23(IST)

మాజీ సీఎం జగదీశ్‌ షెట్టర్‌కు చుక్కెదురు

హుబ్లీ- ధార్వాడ్ సెంట్రల్ నుంచి బరిలో దిగిన కాంగ్రెస్ అభ్యర్థి జగదీశ్‌ షెట్టర్ ఓటమి పాలయ్యారు. మొదటి నుంచి ఆయన వెనుకంజలోనే ఉన్నారు. మాజీ ముఖ్యమంత్రి అయిన షెట్టర్‌కు భాజపా టికెట్‌ నిరాకరించడంతో కాంగ్రెస్‌ నుంచి పోటీ చేశారు.

13/05/2023 12:22(IST)

భాజపా అభ్యర్థి శ్రీరాములు ఓటమి

బళ్లారి (ఎస్‌టీ) స్థానంలో భాజపా అభ్యర్థి శ్రీరాములు ఓటమి పాలయ్యారు. కాంగ్రెస్‌ అభ్యర్థి నాగేంద్ర ఆయనపై విజయం సాధించారు. శ్రీరాములు గతంలో.. ఐదు సార్లు శాసనసభ్యుడిగా, ఒకసారి లోక్‌సభ సభ్యుడిగా గెలుపొందారు.

13/05/2023 12:20(IST)

అటు కాంగ్రెస్‌ జోరు.. ఇటు రేవంత్‌ రెడ్డి పూజలు

కర్ణాటక ఎన్నికల్లో కాంగ్రెస్‌ సత్తా చాటుతోంది. ఈ క్రమంలోనే పార్టీ తెలంగాణ అధ్యక్షుడు రేవంత్‌ రెడ్డి.. రెడ్‌హిల్స్ హనుమాన్ దేవాలయంలో ప్రత్యేక పూజలు నిర్వహించారు. ఈ సందర్భంగా ఆయనకు గద బహూకరించారు. అనంతరం రేవంత్‌ రెడ్డి మాట్లాడుతూ.. విద్వేష విభజన రాజకీయాలకు కన్నడ ప్రజలు బుద్ధి చెప్పారని వ్యాఖ్యానించారు.

13/05/2023 12:09(IST)

కాంగ్రెస్‌కు 18.. భాజపాకు 5

ఎన్నికల ఫలితాల్లో కాంగ్రెస్‌ పార్టీ స్పష్టమైన ఆధిక్యం కనబర్చుతోంది. ఇప్పటివరకు 18 స్థానాల్లో గెలుపొందింది. భాజపా 5, జేడీఎస్‌ ఒక స్థానంలో విజయం సాధించింది. 105 స్థానాల్లో కాంగ్రెస్‌, 64.. భాజపా, 25.. జేడీఎస్‌, ఏడింట ఇతరులు ముందంజలో ఉన్నారు.

13/05/2023 11:59(IST)

‘ప్రధాని మోదీ వచ్చినా.. ఏం మారలేదు..’

ప్రధాని నరేంద్ర మోదీ వచ్చినా.. కర్ణాటకలో భాజపాకు లాభం ఏమీ ఉండదని చెప్పాం. ఇప్పుడు ఇదే జరిగింది. మేం 120 స్థానాల్లో ఆధిక్యంలో ఉన్నాం. మెజారిటీ సాధిస్తామనే నమ్మకం ఉంది. - సిద్ధరామయ్య, కాంగ్రెస్‌ నేత

13/05/2023 11:44(IST)

కనకపురాలో డీకే శివకుమార్‌ గెలుపు..

కనకపురా నుంచి బరిలో దిగిన కాంగ్రెస్‌ రాష్ట్ర అధ్యక్షుడు డీకే శివకుమార్‌ విజయం సాధించారు. 70 శాతానికి పైగా ఓట్లతో ఆయన గెలుపొందారు. భాజపా అభ్యర్థి అశోక్, జేడీఎస్ నేత బి.నాగరాజులు తర్వాతి స్థానాలకు పరిమితమయ్యారు. డీకేఎస్‌.. కాంగ్రెస్‌ నుంచి ముఖ్యమంత్రి పదవికి ఆశావహుడిగా ఉన్న విషయం తెలిసిందే.

13/05/2023 11:43(IST)

కర్ణాటకలో మాదే ప్రభుత్వం.. కమల్‌నాథ్‌

కర్ణాటకలో కాంగ్రెస్ ప్రభుత్వాన్ని ఏర్పాటు చేయడం ఖాయమని పార్టీ సీనియర్‌ నేత కమల్‌నాథ్‌ ధీమా వ్యక్తం చేశారు. ఇతర పార్టీల ఎమ్మెల్యేలు, స్వతంత్ర అభ్యర్థులతో ఒప్పందం కుదుర్చుకునేందుకు భాజపా ప్రయత్నాలు చేస్తుందని ఆరోపించారు.

13/05/2023 11:36(IST)

కాంగ్రెస్‌ విజయపరంపర మొదలు..

కాంగ్రెస్‌ విజయపరంపర మొదలైంది. ఇప్పటికే మూడు స్థానాల్లో విజయం సాధించింది. భాజపా, జేడీఎస్‌లు ఒక్కో స్థానంలో గెలుపొందాయి. మరోవైపు కాంగ్రెస్‌ 117, భాజపా 68, జేడీఎస్‌ 27 స్థానాల్లో ఆధిక్యంలో ఉన్నాయి.

13/05/2023 11:13(IST)

నిఖిల్‌ కుమారస్వామి వెనుకంజ..

మొదట్లో ఆధిక్యం కనబర్చిన జేడీఎస్‌ నేత, మాజీ సీఎం కుమారస్వామి తనయుడు నిఖిల్‌ కుమారస్వామి.. ఇప్పుడు వెనుకంజలో ఉన్నారు. రామనగర స్థానం నుంచి ఆయన పోటీలో ఉన్నారు. కొరటగెరె నుంచి కాంగ్రెస్‌ తరఫున బరిలో దిగిన జి.పరమేశ్వర, బళ్లారి (ఎస్‌టీ) నుంచి శ్రీరాములు (భాజపా), హుబ్బళ్లి ధార్వాడ్‌ సెంట్రల్‌ నుంచి జగదీశ్‌ షెట్టార్‌ (కాంగ్రెస్‌), చిక్కమగళూరు స్థానంలో సీటీ రవి (భాజపా)లు వెనుకంజలో ఉన్నారు.

13/05/2023 11:05(IST)

దిల్లీలో కాంగ్రెస్‌ శ్రేణుల సంబరాలు

కర్ణాటక అసెంబ్లీ ఎన్నికల ఫలితాల్లో కాంగ్రెస్‌ ముందంజలో ఉండటంతో పార్టీ శ్రేణులు సంబరాల్లో మునిగిపోయాయి. దిల్లీలోని ఏఐసీసీ ప్రధాన కార్యాలయం వద్ద బాణాసంచా కాల్చి, మిఠాయిలు పంచుకుని వేడుకలు చేసుకుంటున్నారు. ఇటు బెంగళూరులో కాంగ్రెస్‌ రాష్ట్ర అధ్యక్షుడు డీకే శివకుమార్‌ ఇంటి బయట కాంగ్రెస్‌ కార్యకర్తలు స్వీట్లు పంచిపెట్టారు.

13/05/2023 10:56(IST)

ఉత్తర కర్ణాటకలో కాంగ్రెస్‌దే పైచేయి

ఉత్తర కర్ణాటకలో భాజపాను కాంగ్రెస్‌ దెబ్బతీసినట్లు తెలుస్తోంది. ఇక్కడ 50 స్థానాల్లో 31 చోట్ల హస్తం పార్టీదే హవా. ఇటు జేడీఎస్‌ ప్రాబల్యం ఉన్న పాత మైసూరులోనూ కాంగ్రెస్‌ ఆధిపత్యాన్ని సాధిస్తోంది. ఈ ప్రాంతంలో భాజపా మూడో స్థానానికి పరిమితమైంది. నగరాలు, పట్టణ, కోస్తా ప్రాంతాలు భాజపాపైపు మొగ్గు చూపగా, గ్రామీణ ప్రాంతాలు కాంగ్రెస్‌ వైపు మళ్లినట్లు తెలుస్తోంది.

13/05/2023 10:48(IST)

ఆధిక్యంలో 120 స్థానాలు దాటేసిన కాంగ్రెస్‌

ఓట్ల లెక్కింపు క్రమంలో కాంగ్రెస్‌ పార్టీ.. రాష్ట్రంలో ప్రభుత్వ ఏర్పాటుకు కావాల్సిన స్థానాల(113) మార్కును దాటేసింది. ఎన్నికల సంఘం వివరాల ప్రకారం 120కిపైగా స్థానాల్లో కాంగ్రెస్‌ లీడ్‌లో ఉంది. భాజపా 73, జేడీఎస్‌ 29 స్థానాల్లో ముందంజలో ఉన్నాయి.

13/05/2023 10:32(IST)

ప్రస్తుతానికి ఆధిక్యంలో ఉన్న నేతలు..

ప్రియాంక్‌ ఖర్గే - కాంగ్రెస్‌ - చిత్తాపూర్‌
విజయేంద్ర - భాజపా - శికారిపుర
జి.పరమేశ్వర - కాంగ్రెస్‌ - కొరటగెరె
నిఖిల్‌ కుమారస్వామి - జేడీఎస్‌- రామనగర
గాలి జనార్దనరెడ్డి - కేఆర్‌పీపీ - గంగావతి

13/05/2023 10:16(IST)

మద్దతు మాకే ఉంది..! చామరాజపేట భాజపా అభ్యర్థి

ప్రజల మద్దతు తమకే ఉందన్న నమ్మకం ఉందని చామరాజ్‌పేట నియోజకవర్గ భాజపా అభ్యర్థి భాస్కర్‌రావు తెలిపారు. ఈయన బెంగళూరు మాజీ పోలీసు కమిషనర్. ఇక్కడ కాంగ్రెస్‌ అభ్యర్థి జమీర్‌ అహ్మద్‌ ముందంజలో కొనసాగుతోన్నారు.

13/05/2023 10:12(IST)

కాంగ్రెస్‌ అభ్యర్థి గెలుస్తారంటూ.. రెండెకరాల పందెం

హొన్నాళిలో కాంగ్రెస్‌ అభ్యర్థి శాంతనగౌడ గెలుస్తారని- భాజపా ఎమ్మెల్యే ఎంపీ రేణుకాచార్యదే విజయమంటూ పందేలు జోరుగా కొనసాగుతున్నాయి. శాంతనగౌడ గెలుస్తారని నాగణ్ణ అనే వ్యక్తి తన రెండెకరాల పొలాన్ని పందేనికి ఉంచారు. ఎవరైనా పందెం కాసేవారు ఉంటే.. రావాలంటూ గ్రామంలో చాటింపు వేయించారు.

13/05/2023 10:01(IST)

మాజీ సీఎం జగదీశ్‌ షెట్టర్‌ వెనుకంజ..!

హుబ్లీ- ధార్వాడ్ సెంట్రల్ నుంచి బరిలో ఉన్న కాంగ్రెస్ అభ్యర్థి జగదీశ్‌ షెట్టర్ వెనుకంజలో ఉన్నారు. మాజీ ముఖ్యమంత్రి అయిన షెట్టర్‌కు భాజపా టికెట్‌ నిరాకరించడంతో కాంగ్రెస్‌ నుంచి బరిలోకి దిగిన విషయం తెలిసిందే.

13/05/2023 09:40(IST)

ప్రియాంక గాంధీ ప్రత్యేక పూజలు

కర్ణాటక ఎన్నికల ఫలితాల నేపథ్యంలో కాంగ్రెస్‌ నేత ప్రియాంక గాంధీ శిమ్లాలోని హనుమాన్‌ మందిరంలో ప్రత్యేక పూజలు నిర్వహించారు. ప్రస్తుతానికి కర్ణాటకలో కాంగ్రెస్‌ పార్టీ ఆధిక్యంలో ఉన్న విషయం తెలిసిందే.

13/05/2023 09:33(IST)

ఓట్ల లెక్కింపు జోరు.. కుమారస్వామి వెనుకంజ

కర్ణాటక ఓట్ల లెక్కింపు సాగుతోంది. ఇప్పటివరకు లెక్కింపు సరళి చూస్తే..

ఆధిక్యం

బసవరాజ్‌ బొమ్మై (షిగ్గావ్‌, భాజపా), సిద్ధరామయ్య, డీకే శివకుమార్‌ (కనకపురా, కాంగ్రెస్‌), గాలి జనార్దనరెడ్డి (గంగావతి, కేఆర్‌పీపీ)

వెనుకంజ

కుమారస్వామి (చెన్నపట్టణ, జేడీఎస్‌) కుమార బంగారప్ప (సొరబ, భాజపా)

13/05/2023 09:00(IST)

మేమే ప్రభుత్వం ఏర్పాటు చేస్తాం: భాజపా

కర్ణాటక ప్రాథమిక ఫలితాలపై భాజపా అధికార ప్రతినిధి సయ్యద్‌ జాఫర్‌ ఇస్లామ్‌ స్పందించారు. ప్రస్తుతం ఫలితాల ట్రెండ్‌ పోటాపోటీగా ఉందని, అయితే ఆఖరుగా విజయం తమదే అని స్పష్టం చేశారు. ప్రభుత్వం ఏర్పాటు కోసం జేడీఎస్‌తో కలసి వెళ్తారా అనే ప్రశ్నకు.. భాజపా సొంతంగా ప్రభుత్వం ఏర్పాటు చేస్తుందని నమ్మకం ఉందన్నారు. మరీ అవసరమైతే తమ ఆలోచనలకు దగ్గరగా ఉన్న పార్టీతో కలసి వెళ్తాం అని చెప్పారు.

13/05/2023 08:54(IST)

మెజారిటీ రాకపోతే.. ఏం చేయాలో అధిష్ఠానం చెబుతుంది: యతీంద్ర

భాజపాకు అధికారం దక్కుండా ఉండటానికి తాము ఏం చేయడానికైనా సిద్ధమే అని కాంగ్రెస్‌ నాయకుడు, సీనియర్‌ నాయకుడు సిద్ధరామయ్య తనయుడు యతీంద్ర అన్నారు. కర్ణాటకలో అసెంబ్లీ ఎన్నికల కౌంటింగ్‌ జరుగుతున్న నేపథ్యంలో ఆయన మీడియాతో మాట్లాడారు. తమ పార్టీ పూర్తి స్థాయి మెజారిటీ సాధిస్తుందని ఆశాభావం వ్యక్తం చేశారు. ఒకవేళ కావాల్సినంత మెజారిటీ రాకపోతే ఏం చేయాలి అనేది తమ అధిష్ఠానం నిర్ణయిస్తుందని తెలిపారు.

13/05/2023 08:32(IST)

పోస్టల్‌ బ్యాలెట్‌ కౌంటింగ్‌.. భాజపా, కాంగ్రెస్‌ దాదాపు సమానంగా

పోస్టల్‌ బ్యాలెట్‌ ఓట్ల లెక్కింపు కొనసాగుతోంది. ఇప్పటివరకు వచ్చిన ఫలితాల ప్రకారం చూస్తే భాజపా, కాంగ్రెస్‌ పోటాపోటీగా ఆధిక్యంలోకి వస్తున్నాయి. 8.30 గంటల వరకు భాజపా 39, కాంగ్రెస్‌ 42, జేడీఎస్‌ 11, ఇతరులు 5 చోట్ల ఆధిక్యంలో ఉన్నారు.

13/05/2023 08:10(IST)

మాకు డిమాండ్లు లేవు: కుమారస్వామి

మాది చిన్న పార్టీ.. మాకు ఎలాంటి డిమాండ్లు లేవు అని జేడీఎస్‌ నేత, మాజీ సీఎం కుమారస్వామి వ్యాఖ్యానించారు. ఈ రోజు కౌంటింగ్‌ జరుగుతున్న నేపథ్యంలో ఆయన రాష్ట్ర రాజకీయ పరిస్థితి గురించి మాట్లాడారు. ‘‘మరో రెండు, మూడు గంటల్లో ఫలితం తేలిపోతుంది. రెండు జాతీయ పార్టీలకు అధిక స్థానాలు వస్తాయని ఎగ్జిట్‌ పోల్స్‌లో తేలింది. జేడీఎస్‌ 30 నుంచి 32 స్థానాల్లో విజయం సాధిస్తుందని ఎగ్జిట్‌పోల్స్‌ బట్టి తెలుస్తోంది’’ అని వివరించారు.

13/05/2023 08:03(IST)

ఓట్ల లెక్కింపు ప్రారంభం

కర్ణాటక అసెంబ్లీ ఎన్నికల ఓట్ల లెక్కింపు ప్రారంభమైంది. మధ్యాహ్నం నాటికి ఫలితాల్లో స్పష్టత రావచ్చని సమాచారం. 224 నియోజకవర్గాలకు నిర్వహించిన ఎన్నికల్లో 73.19 శాతం రికార్డుస్థాయి పోలింగ్‌ నమోదయ్యింది. దీంతో ఏదో ఒక పార్టీకి స్పష్టమైన మెజార్టీ వస్తుందన్న అంచనా మొదలైంది.

13/05/2023 06:53(IST)

టిక్‌..టిక్‌..టిక్‌..!

జిల్లాలోని ఐదు విధానసభ క్షేత్రాల్లో ఫలితాలపై సర్వత్రా ఆసక్తి నెలకొంది. అభ్యర్థులతోపాటు ఓటర్లు, దేశవ్యాప్తంగా తీవ్ర ఉత్కంఠను రేకెత్తిస్తున్న కర్ణాటక విధానసభ ఎన్నికల ఫలితాలు మరికొన్ని గంటల్లో వెలువడనున్నాయి. ఈనేపథ్యంలో ఆయా నియోజకవర్గాల్లో తాజా పరిస్థితిపై విశ్లేషణాత్మక కథనం. బళ్లారి గ్రామీణ, సిరుగుప్ప, కంప్లి, సండూరు విధాన క్షేత్రాల్లో కాంగ్రెస్‌- భాజపా అభ్యర్థుల మధ్య నువ్వా-నేనా అన్న విధంగా పోటీ నెలకొంది. పూర్తి కథనం కోసం క్లిక్‌ చేయండి

13/05/2023 06:44(IST)

నగరం.. అష్టదిగ్బంధం

బెంగళూరు పోలీసు కమిషనరేట్‌, బెంగళూరు నగర జిల్లా పరిధిలోని 32 విధానసభ స్థానాల ఎన్నికల ఓట్ల లెక్కింపు ఐదు ప్రదేశాల్లో శనివారం ఉదయం ప్రారంభం కానుంది. ప్రతి లెక్కింపు కేంద్రం భద్రత బాధ్యతలను ఇద్దరు డీసీపీలకు అప్పగించారు. అధికారులతో పాటు 1500 వందల మంది బందోబస్తు కోసం వినియోగించనున్నట్లు పోలీసు కమిషనర్‌ ప్రతాప్‌రెడ్డి తెలిపారు. శాంతిభద్రతలకు ఎలాంటి ముప్పు కలగకుండా కట్టుదిట్టమైన భద్రత ఏర్పాటు చేశామని ఆయన వివరించారు. పూర్తి వార్త కోసం క్లిక్‌ చేయండి

13/05/2023 06:43(IST)

లెక్కింపు ప్రాంతాలు ఎక్కడెక్కడంటే?

వసంతనగర మౌంట్‌ కార్మల్‌ కళాశాలలో కె.ఆర్‌.పురం, మహాలక్ష్మీలేఔట్‌, మల్లేశ్వరం, హెబ్బాళ్‌, పులికేశినగర, సర్వజ్ఞనగర, సీవీరామన్‌నగర విధానసభ స్థానాల ఓట్లు లెక్కిస్తారు. కేంద్ర, తూర్పు విభాగాల డీసీపీలకు భద్రత బాధ్యతలను అప్పగించారు.
సెయింట్‌ జోసెఫ్‌ ఇండియన్‌ హైస్కూల్‌లో ఆనేకల్‌, బెంగళూరు దక్షిణ, మహదేవపుర, బ్యాటరాయనపుర, యలహంక, దాసరహళ్లి విధానసభ స్థానాల ఓట్లను లెక్కిస్తారు. వైట్‌ఫీల్డ్‌, సీసీబీ విభాగం డీసీపీలకు భద్రత ఏర్పాట్లను పర్వేక్షిస్తారు.
బసవనగుడి బీఎంఎస్‌ మహిళ కళాశాలలో శాంతినగర, గాంధీనగర, రాజాజినగర, చిక్కపేట, చామరాజపేట, ఆర్‌ఆర్‌నగర, శివాజీనగర విధానసభ స్థానాల ఓట్లను లెక్కిస్తారు. దక్షిణ విభాగం, కమాండ్‌ సెంటర్‌ డీసీపీలు భద్రత బాధ్యతలను అప్పగించారు.తిలక్‌నగర్‌ ఎస్‌ఎస్‌ఎంఆర్‌వీ కళాశాలలో పద్మనాభనగర, గోవిందరాజనగర, విజయనగర, జయనగర, బీటీఎంలేఔట్‌, బొమ్మనహళ్లి, బసవనగుడి విధానసభ స్థానాల ఓట్లను లెక్కిస్తారు. ఆగ్నేయ, సీఏఆర్‌ విభాగాల ఇద్దరు డీసీపీలు బందోబస్తు ఏర్పాట్లను పర్వేక్షిస్తారు.

13/05/2023 06:42(IST)

ఊరేగింపులు నిషేధం

ఎప్పుడెప్పుడా అని ప్రజలు ఉత్కంఠగా ఎదురుచూస్తున్న ఎన్నికల ఓట్ల లెక్కింపు శనివారం ఉదయం ఎనిమిది గంటలకే రాష్ట్ర వ్యాప్తంగా 34 కేంద్రాలలో ప్రారంభం కానుంది. మధ్యాహ్నం రెండు గంటలకు ఫలితాలపై స్పష్టత రానుంది. పదహారో విధానసభలో అడుగు పెట్టేందుకు 2615 మంది అభ్యర్థులు పోటీలో నిలిచారు. అతిరథ మహారథుల్లో ఎవరు గెలుస్తారో నేటి మధ్యాహ్నానికి తేటతెల్లం కానుంది. పూర్తి వార్త కోసం క్లిక్‌ చేయండి

13/05/2023 06:41(IST)

కాంగ్రెస్‌కు అంత లేదు..: బసవరాజ బొమ్మై

కాంగ్రెస్‌ పార్టీకి ఎట్టి పరిస్థితుల్లో పూర్తి మెజార్టీ రాదని ముఖ్యమంత్రి బసవరాజ బొమ్మై పేర్కొన్నారు. సొంత పార్టీ ఎమ్మెల్యేల విజయంపై నమ్మకం లేకపోవడంతోనే, ఇతర పార్టీలతో కాంగ్రెస్‌ చర్చలు జరుపుతున్నట్లు తప్పుపట్టారు. ఆర్‌టీ నగరలోని తన నివాసం వద్ద ఆయన శుక్రవారం విలేకరులతో మాట్లాడారు. భాజపాకు పూర్తి మెజార్టీ వస్తుందని, ఎవరి మద్దతూ అవసరం లేకుండానే ప్రభుత్వాన్ని ఏర్పాటు చేస్తామని ధీమా వ్యక్తం చేశారు.

13/05/2023 06:40(IST)

రెండెకరాల పందెం

13/05/2023 06:36(IST)

ఏం చేయాలో నెంబర్లే నిర్ణయిస్తాయ్‌..: ఖర్గే

కర్ణాటక ఎన్నికల ఫలితాలకు (Karnataka Elections Results) ముందు రోజు కాంగ్రెస్‌ జాతీయ అధ్యక్షుడు మల్లికార్జున ఖర్గే (Mallikarjuna Kharge) కీలక వ్యాఖ్యలు చేశారు. ఒక వేళ హంగ్‌ ఏర్పడితే హెచ్‌డీ కుమారస్వామి నేతృత్వంలోని జేడీఎస్‌ (JDS) కింగ్‌ మేకర్ పాత్ర పోషిస్తుందన్న వార్తలను ఆయన కొట్టిపారేశారు. కాంగ్రెస్‌ పార్టీ భారీ మెజార్టీతో గెలవడం ఖాయమని ఆయన ధీమా వ్యక్తం చేశారు. శనివారం వెల్లడయ్యే ఫలితాల్లో ఎన్ని సీట్లు గెలుచుకున్నామన్న దాని బట్టి ఏం చేయాలో నిర్ణయించుకుంటామని అన్నారు. పూర్తి వార్త కోసం క్లిక్‌ చేయండి

13/05/2023 06:35(IST)

ఎవరితో కలవాలో తర్వాత ప్రకటిస్తాం: జేడీఎస్‌

జేడీఎస్‌ హంగ్‌ అసెంబ్లీపై ఆశలు పెట్టుకుంది. మద్దతు ప్రకటించాలంటే సీఎం పదవి కోసం ఆ పార్టీ డిమాండ్‌ చేసే అవకాశం ఉంది. ఎవరితో కలిసి ప్రభుత్వాన్ని ఏర్పాటు చేయాలో ఇప్పటికే నిర్ణయించుకున్నా సరైన సమయంలో దానిపై ప్రకటన చేస్తామని ఆ పార్టీ నేత తన్వీర్‌ అహ్మద్‌ చెప్పారు. మాజీ ప్రధాని దేవెగౌడ ఆకాంక్ష మేరకు కాంగ్రెస్‌కే జేడీఎస్‌ మద్దతు ఇస్తుందని చెబుతున్నారు. సింగపూర్‌ పర్యటన మాటున భాజపా కేంద్ర నాయకులతో కుమారస్వామి చర్చిస్తున్నారని వార్తలు వెలువడుతున్నాయి. దానికి తగ్గరీతిలోనే.. ఎన్నికల తర్వాత పొత్తులకు సిద్ధమని ఆయన ప్రకటించారు. మంత్రి ఆర్‌.అశోక్‌ మాట్లాడుతూ హంగ్‌ ఫలితం వచ్చినా కప్పు మాత్రం భాజపాదేననడం- జేడీఎస్‌తో పొత్తులకు సిద్ధమన్న వాదనకు మరింత బలాన్నిచ్చింది.

13/05/2023 06:34(IST)

విజేతలు బెంగళూరుకు రావాలని కాంగ్రెస్‌ పిలుపు

పార్టీ విజేతలంతా బెంగళూరుకు వచ్చేయాలని కాంగ్రెస్‌ సూచించింది. ‘ఆపరేషన్‌ కమల్‌’లో వారెవరూ చిక్కుకోకూడదని ఈ మేరకు జాగ్రత్త పడుతున్నట్లు తెలుస్తోంది. కనీసం 141 స్థానాలతో సొంతంగా తాము అధికారంలోకి వస్తామని కర్ణాటక పీసీసీ అధ్యక్షుడు డి.కె.శివకుమార్‌ ఘంటాపథంగా చెబుతున్నారు. శిబిర రాజకీయాలకు మళ్లాల్సిన అవసరమే రాదని చెప్పారు. ఎన్ని స్థానాలొచ్చినా అధికారాన్ని ఏర్పాటు చేస్తామన్న భాజపా వ్యాఖ్యలతో పరాజయాన్ని ఆ పార్టీ అంగీకరించినట్లేనని డీకే శివకుమార్‌, ఏఐసీసీ ప్రధాన కార్యదర్శి రణదీప్‌ సింగ్‌ సుర్జేవాలా చెప్పారు. ఏఐసీసీ అధ్యక్షుడు మల్లికార్జున ఖర్గేతో శివకుమార్‌ ప్రత్యేకంగా సమావేశమై రాజకీయ పరిణామాలపై చర్చించారు.

13/05/2023 06:34(IST)

పైకి ధీమా.. లోలోపల గుబులు

అధికారం తమకే దక్కుతుందని భాజపా, కాంగ్రెస్‌, జేడీఎస్‌లు బయటకు ధీమా కనపరుస్తున్నా లోలోపల ఎవరి ఆందోళన వారికి ఉంది. ఆధిక్యం రాకపోయినా ప్రత్యామ్నాయ ప్రణాళిక (ప్లాన్‌ బి) తమకు ఉందని భాజపా చెబుతోంది. ప్రభుత్వ ఏర్పాటుకు సరిపడా స్థానాలు రాకపోతే పార్టీ అధినాయకత్వం మార్గనిర్దేశంలో తమ ఆపరేషన్‌ ప్రారంభిస్తామని రాష్ట్రమంత్రి ఆర్‌.అశోక చేసిన ప్రకటన గమనార్హం. పార్టీ పార్లమెంటరీ మండలి సభ్యుడు బి.ఎస్‌.యడియూరప్ప నివాసంలో ముఖ్యమంత్రి బసవరాజ బొమ్మైతో పలువురు మంత్రులు శుక్రవారం సమావేశమయ్యారు. ఎగ్జిట్‌ పోల్స్‌ ఎలాఉన్నా ప్రభుత్వాన్ని ఏర్పాటు చేసేది తామేనని ముఖ్యమంత్రి ప్రకటించారు. ఇతర పార్టీల ఎమ్మెల్యేలతో చర్చించాల్సిన అవసరం తమకు రాబోదని ఆయన ఓ ప్రశ్నకు బదులిచ్చారు.

13/05/2023 06:34(IST)

గత ఎన్నికల్లో ఇలా..

2018 అసెంబ్లీ ఎన్నికల్లో భాజపా 104 స్థానాలు గెలుచుకుని అతిపెద్ద పార్టీగా ఆవిర్భవించింది. కాంగ్రెస్‌ 80, జేడీఎస్‌ 37 స్థానాల్లో నెగ్గాయి. ఎవరూ స్పష్టమైన ఆధిక్యం పొందలేకపోయారు. నాటకీయ పరిణామాల్లో తొలుత యడియూరప్ప సీఎంగా ప్రమాణం చేశారు. అది మూడురోజుల ముచ్చటగానే మిగిలింది. దాంతో ఆయన వైదొలగడం, కాంగ్రెస్‌-జేడీఎస్‌ కలిసి ప్రభుత్వాన్ని ఏర్పాటు చేయడం వరసగా జరిగాయి. కుమారస్వామి నేతృత్వంలోని ప్రభుత్వం 14 నెలలే కొనసాగింది. కొందరు ఎమ్మెల్యేలు భాజపావైపు చూడడంతో ఆ పార్టీ బలం 116కి చేరి, కమలనాథుల ప్రభుత్వం ఏర్పడింది.

13/05/2023 06:33(IST)

మధ్యాహ్నం నాటికి స్పష్టత

224 నియోజకవర్గాలకు నిర్వహించిన ఎన్నికల్లో 73.19 శాతం రికార్డుస్థాయి పోలింగ్‌ నమోదయ్యింది. దీంతో ఏదోఒక పార్టీకి స్పష్టమైన మెజార్టీ వస్తుందన్న అంచనా మొదలైంది. మధ్యాహ్నం నాటికి ఫలితాల్లో స్పష్టత రావచ్చని భావిస్తున్నారు.

13/05/2023 06:33(IST)

ఆనవాయితీ ఇదీ...

గత 38 ఏళ్లలో ఏ పార్టీ వరసగా రెండోసారి అధికారంలోకి రాకపోవడం కర్ణాటకలో ఆనవాయితీగా ఉంది. ఈసారి కాంగ్రెస్‌కే స్వల్పంగా మొగ్గు ఉంటుందని పలు ఎగ్జిట్‌పోల్స్‌ చెప్పడం, జేడీఎస్‌ది కీలకపాత్ర అవుతుందని అంచనా వేయడంతో పార్టీల నేతలు, ప్రజల్లో ఆసక్తి రెట్టింపు అవుతోంది.

13/05/2023 06:32(IST)

8 గంటలకు లెక్కింపు ప్రారంభం

కన్నడనాట రాజకీయ ఆనవాయితీ పునరావృతం అవుతుందా, లేదా ఈసారి ఓటర్లు దానికి భిన్నంగా అడుగులు వేశారా? అనేది మరికొన్ని గంటల్లో తేలబోతోంది. ప్రధాన పార్టీలకు ప్రతిష్ఠాత్మకంగా మారిన కర్ణాటక శాసనసభ ఎన్నికల ఫలితాలు శనివారం వెల్లడికానున్నాయి. ఉదయం 8 గంటలకు ఓట్ల లెక్కింపు ప్రారంభించేలా యంత్రాంగం ఏర్పాట్లు పూర్తిచేసింది. అవాంఛనీయ ఘటనలు జరగకుండా బందోబస్తు ప్రణాళిక రూపొందించారు.

12/05/2023 15:42(IST)

36 కేంద్రాల్లో ఓట్ల లెక్కింపు...

ఓట్ల లెక్కింపునకు సంబంధించి అధికారులు అన్ని ఏర్పాట్లు పూర్తి చేశారు. శనివారం ఉదయం 8 గంటలకు కౌంటింగ్ ప్రారంభం కానుంది. మొత్తం 36 కేంద్రాల్లో ఓట్ల లెక్కింపు జరగనుంది. మధ్యాహ్నం నాటికి స్పష్టమైన ఫలితం వచ్చే అవకాశం ఉంది.

12/05/2023 15:33(IST)

ఎన్నికల్లో ప్రముఖుల సంగతి చూస్తే..

కాంగ్రెస్‌లో నియోజకవర్గం నుంచి సిద్ధరామయ్య, కనకపుర నుంచి డీకే శివకుమార్‌, హుబ్బలి ధార్వాడ్‌ సెంట్రల్‌ నుంచి జగదీశ్‌ శెట్టర్‌ బరిలో ఉన్నారు. భాజపా నుంచి బస్వరాజ్‌ బొమ్మై (శిగ్గావి), సి.టి.రవి (చిక్‌మంగళూర్‌)... జేడీఎస్‌ నుంచి హెచ్‌డీ కుమారస్వామి (చన్నపట్న), నిఖిల్‌ కుమారస్వామి (రామనగర) బరిలో ఉన్నారు.

12/05/2023 15:33(IST)

73.19 శాతం పోలింగ్‌

కర్ణాటక అసెంబ్లీ ఎన్నికల్లో రికార్డు స్థాయి పోలింగ్‌ నమోదైంది. బుధవారం 73.19% ఓటర్లు తమ ఓటుహక్కును వినియోగించుకున్నారు. అత్యధికంగా చిక్కబళ్లాపురలో 85.56% పోలింగ్‌ నమోదైంది. తర్వాతి స్థానంలో బెంగళూరు గ్రామీణ (85.05%) నిలిచింది. కర్ణాటకలో ఓటర్ల సంఖ్య 5.31 కోట్లు. అందులో పురుషులు 2.67 కోట్లు, మహిళలు 2.62 కోట్లు.

App

Karnataka Results: కాంగ్రెస్‌ వ్యూహాన్ని ఛేదించలేకపోయాం..: బొమ్మై

తాజా వార్తలు (Latest News)

ఎంత దెబ్బకు అంత బ్యాండేజ్‌ కాదా!

‘మనీ లాండరింగ్‌’ బూచిని చూపి రూ.25 కోట్లకు టోకరా

వాట్సప్‌లో కేసుల లిస్టింగ్‌ సమాచారం

అర్ధరాత్రి రోడ్డు ప్రమాదం

సమయం దాటాక వచ్చారని అనుమతి నిరాకరణ

తితిదే వద్దనున్న రూ.2 వేల నోట్లు మార్పిడి!

సుఖీభవ

చదువు