శ్వాసకు మత్స్యాసనం!

కొన్ని ఆసనాలు కొన్ని జబ్బుల ఉపశమనానికి తోడ్పడతాయి. మత్స్యాసనం ఇలాంటిదే. గాఢంగా ఊపిరి తీసుకునేలా చేసే ఇది శ్వాసకోశ జబ్బుల లక్షణాలు తగ్గటానికి సాయం చేస్తుంది. అంతేకాదు, పీయూష గ్రంథినీ ఉత్తేజితం చేస్తుంది. ఛాతీ, మెడను సాగదీస్తుంది. మెడ, భుజాల్లో ఒత్తిడిని తగ్గిస్తుంది. మరి దీన్నెలా వేయాలి?

• వెల్లకిలా పడుకోవాలి. పాదాలు తాకించి ఉంచాలి. చేతులను రెండు పక్కలా తిన్నగా చాచాలి.
• చేతులను పిరుదుల కిందికి తేవాలి. అరచేతులు నేలకు తాకేలా చూసుకోవాలి. మోచేతులు శరీరానికి అంటి ఉండాలి.
• శ్వాస తీసుకొని తల, ఛాతీని పైకి లేపాలి.
• ఛాతీని పైకెత్తుతూ తలను వెనక్కు వంచి, నేలకు తాకించాలి.
• మోచేతులతో నేలను గట్టిగా అదుముతూ తల మీద ఎక్కువ భారం పడకుండా చూడాలి. తొడలు, కాళ్లతో నేలను నొక్కుతూ ఛాతీని పైకి లేపాలి.
• వీలైనంత సేపు అలాగే ఉండాలి. నెమ్మదిగా గాఢంగా శ్వాస తీసుకొని, వదలాలి.
• తర్వాత తలను పైకి లేపి, ఛాతీని కిందికి దించాలి. యథాస్థితికి రావాలి. కాసేపు విశ్రాంతి తీసుకోవాలి.

జాగ్రత్త: అధిక రక్తపోటు, రక్తపోటు పడిపోవటం, పార్శ్వనొప్పి, నిద్రలేమి, మెడ నొప్పి, నడుం నొప్పితో బాధపడేవారు దీన్ని చేయరాదు.