అందమంటే నీదే!

లల్లి: పక్షులు అందంగా ఉంటాయి కదూ!
లిల్లి: చాలా బాగుంటాయి. ప్రత్యేకంగా అడుగుతున్నావ్‌ ఎందుకు లల్లీ.
లల్లి: ఏం లేదు. మనాకిన్‌ అనే పక్షి అద్భుతంగా ఉంటుంది తెలుసా?
లిల్లి: అవునా.. మనాకిన్‌ పేరుతో పక్షి కూడా ఉందా?
లల్లి: ఉంది.. దక్షిణ అమెరికా దాని పుట్టినిల్లు. రంగులతో భలేగా ఉంటుంది. వీటిలో దాదాపు 60 రకాలున్నాయి.
లిల్లి: ఇంతకీ పక్షి ఎంత బరువు ఉంటుంది?
లల్లి: ఇది చాలా చిన్న పక్షి. 7 నుంచి 15 సెంటీమీటర్ల వరకు పెరుగుతుంది అంతే! బరువేమో 8 నుంచి 30 గ్రాముల వరకు ఉంటుంది. చిన్న చిన్న పండ్లు, పురుగుల్ని తింటాయి. వీటిలో ఆడవి రెండు గుడ్లు పెడతాయి. వీటిని పొదగడానికి 18 నుంచి 21 రోజులు పడుతుంది.
లిల్లి: తర్వాత?
లల్లి: తర్వాత ఇంకేముంది.. వాటిలోంచి పిల్లలు బయటకు వస్తాయి. వాటిని తల్లి పక్షి అల్లారుముద్దుగా చూసుకుంటుంది.
లిల్లి: సరే లల్లీ.. మా అమ్మ పిలుస్తోంది బైబై!