స్మార్ట్‌వాచీలతో ఒత్తిడి మాయం

జేబులో సెల్‌ఫోన్‌లాగే.. చేతికి స్మార్ట్‌వాచీ ఈ కాలం కుర్రకారుకి కామన్‌ అవుతోంది. ఈ గ్యాడ్జెట్లు.. మనం ఎంత దూరం నడిచాం? గుండె ఎంత వేగంగా కొట్టుకుంటోందీ..? ఒంట్లో ఎన్ని కేలరీలు కరిగాయో.. చెప్పడమేకాదు.. ఒత్తిడినీ దూరం చేస్తాయంటోంది ఓ తాజా అధ్యయనం. ఎలాగంటే.. స్మార్ట్‌వాచీలు, రిస్ట్‌బ్యాండ్‌లు ధరించేవాళ్లలో మానసిక ఒత్తిడి తాలూకు లక్షణాలు కనిపించగానే అవి యూజర్లను అప్రమత్తం చేస్తాయి. స్మార్ట్‌ఫోన్‌కి సందేశాలు పంపిస్తుంటాయి. దాంతో అప్రమత్తమై అత్యధికులు ఆ ప్రభావం నుంచి బయటపడేలా ప్రయత్నాలు చేస్తారట. వీటితోపాటు నిద్ర కరవైనా, గుండె కొట్టుకునే వేగంలో తేడాలు గమనించినా ఆటోమేటిగ్గా నోటిఫికేషన్లు వస్తుంటాయి కదా! వీటినీ పట్టించుకోవడం సహజమే కదా. ఇలా అప్రమత్తం కావడం.. దీర్ఘకాలంలో ఒత్తిడి దూరం అయ్యేలా చేస్తాయట. మసాచ్యుసెట్స్‌ జనరల్‌ హాస్పిటల్‌లోని వైద్య నిపుణులు ఇలాంటి పరికరాలు వాడే కొందరిపై అధ్యయనం చేశాక ఈ ఫలితాల్ని వెల్లడించారు. అధ్యయన వివరాల్ని న్యూ ఇంగ్లండ్‌ జర్నల్‌ ఆఫ్‌ మెడిసిన్‌లో ప్రచురించారు. సో.. ఆరోగ్యాన్ని పెద్దగా పట్టించుకోని కుర్రాళ్లూ.. మిమ్మల్ని పట్టించుకునే స్మార్ట్‌వాచీలను ఎంచక్కా ధరించండి మరి!