పెదాల కోసం రూ.20లక్షలు

రికార్డులు సృష్టించడం అంటే చాలామందికి సరదా! బల్గేరియా కుర్రది ఆండ్రియా ఇవనోవా సైతం అదే రకం. తనవి ఇప్పుడు ప్రపంచంలోనే అతి పెద్ద పెదాలు. దానికోసం అష్టకష్టాలు పడి ఏకంగా రూ.20లక్షలు కూడా ఖర్చు చేసింది

 పెదాలకు అంత డబ్బు పోయాలా? అసలు అదేం తెలివి తక్కువ ఆలోచన? అంటారా. కానీ సోఫియా తెలివైన అమ్మాయే! జర్మన్‌ ఫిలాసఫీ చదివింది. నాలుగు భాషల్లో అనర్గళంగా మాట్లాడుతుంది. చదువులో టాపర్‌. యూనివర్సిటీలో ఉండగా ఒక లావు పెదాల అమ్మాయిని చూసి తనకి ఈ ఆలోచన వచ్చిందట. కోరిక అమ్మడిని కుదురుగా ఉండనీయలేదు. 2018లో మొదటిసారి 22 ఏళ్ల వయసులో లిప్‌ సర్జరీ చేయించుకుంది. అది మొదలు ఆ సంఖ్య 26కి చేరింది. దీనికోసం యూరోప్‌ మొత్తం తిరిగిందట.

దొండపండులాంటి పెదాలు ఉంటే చాలానుకుంటుంది ఏ అమ్మాయైనా. కానీ ఏకంగా పనస పండు అంత కావాలనుకుంది సోఫియా. మొత్తానికి ఆపసోపాలు పడి, రూ.20లక్షలకు పైగా ఖర్చు పెట్టి ఈమధ్యే అనుకున్న రికార్డు కొట్టేసింది. అయినా అంతటితో ఆగిపోదట. ప్రపంచంలోనే అతిపెద్ద చెక్కిళ్లు ఉన్న అమ్మాయిగా నిలవాలనే కార్యక్రమానికీ శ్రీకారం చుట్టింది. ఇంట్లో వాళ్లు ‘ఇలాంటివి వద్దు.. మొహమంతా మారిపోతోంది మొర్రో’ అని ఎంత మొత్తుకున్నా.. తగ్గేదేలే అంటూ ముందుకెళ్తోంది.