బజ్‌ కట్‌.. ఐబ్రో స్లిట్‌ కలిపి కొట్టు

అయితే ఆటతో.. లేదంటే స్టైల్‌తో సదా అభిమానులకు దగ్గరయ్యే సెలెబ్రిటీ విరాట్‌ కోహ్లి. ఈసారి ఓ సరికొత్త స్టైల్‌తో అంతర్జాలంలో మంటలు రేపుతున్నాడు. అదే ఐబ్రో స్లిట్‌ స్టైల్‌. దాంతోపాటు ట్రిమ్డ్‌ గెడ్డం.. చెవికి పియర్సింగ్‌లతో కొత్త లుక్‌లో దర్శనమిస్తున్నాడు. కొన్నాళ్లుగా బెటర్‌హాఫ్‌ అనుష్కతో లండన్‌లో మకాం వేసిన కోహ్లి.. ఈ కొత్త రకం స్టైల్‌తో అభిమానులను అలరిస్తున్నాడు. అతగాడిని అలా తీర్చిదిద్దింది పాపులర్‌ సెలెబ్రిటీ హెయిర్‌ స్టైలిస్ట్‌ ఆలీం హకీం. 80, 90వ దశకంలో ఈ ట్రెండ్‌ కుర్రకారులో బాగా పాపులర్‌. హిప్‌హాప్‌ కళాకారులు ఎక్కువగా అనుసరించేవారు. తర్వాత క్రీడాకారులు.. అనంతరం సామాన్య కుర్రాళ్లదాకా చేరింది. కనుబొమ్మలపై కత్తెరతో నిలువు గీతలు పెట్టుకోవడం.. జుత్తులోని పక్కలకు నున్నగా క్రాఫ్‌ చేయడం ఈ స్టైల్‌ తీరు. దాంతోపాటు మరింత స్టైల్‌గా కనిపించాలనుకుంటే.. చెవులకు పియర్సింగ్‌ కూడా చేయించుకుంటారు. అప్పట్లో పాప్‌సింగర్‌ జయేన్‌ మాలిక్‌ ఈ ట్రెండ్‌కి బ్రాండ్‌ అంబాసిడర్‌లా ఉండేవాడు. ఈ ఐబ్రో స్లిట్‌కి.. బజ్‌కట్‌ కాంబినేషన్‌ జోడించడం ఇప్పుడు కొత్తరకం ఫ్యాషన్‌గా చలామణిలోకి వచ్చింది. అన్నట్టు ఇది చూడటానికి బాగా స్టైలిష్‌గా ఉండటమే కాదు.. వేసవికి కూల్‌కూల్‌గా సౌకర్యంగానూ ఉంటుంది. అందుకే తారలు జై కొడుతున్నారు. వాళ్లని అనుసరించే కుర్రకారు మాత్రం ఊరుకుంటారా?