Andhra News: రాష్ట్రంలో ఎక్కడా కరెంటు కోతలు లేవు: ఇంధనశాఖ కార్యదర్శి శ్రీకాంత్‌

అమరావతి: రాష్ట్రంలో ప్రస్తుతం ఎక్కడా కరెంటు కోతలు లేవని ఇంధనశాఖ కార్యదర్శి శ్రీకాంత్‌ స్పష్టం చేశారు. రోజుకు 204 మిలియన్‌ యూనిట్ల విద్యుత్‌ డిమాండ్‌ ఉందన్నారు. జెన్‌కో, కృష్ణపట్నం పోర్టు, సౌర, పవన విద్యుత్‌ కేంద్రాల నుంచి వచ్చే విద్యుత్‌ సరిపోక పోవడం వల్ల బహిరంగ మార్కెట్‌ నుంచి కొనుగోలు చేస్తు్న్నట్టు చెప్పారు. రాష్ట్రంలో 18 లక్షల వ్యవసాయ కనెక్షన్లకు పగటిపూట 9 గంటల ఉచిత విద్యుత్‌ ఇస్తున్నామని చెప్పారు. ఇందుకోసం రూ.7,700 కోట్ల ఖర్చు చేస్తున్నట్టు వివరించారు. 170 మిలియన్‌ యూనిట్ల వరకు లాంగ్‌ టర్మ్‌ కాంటాక్టులు ఉన్నాయని తెలిపారు. అధిక డిమాండ్‌ వేళల్లో మార్కెట్‌ నుంచి విద్యుత్‌ కొనుగోలు చేస్తున్నామని వెల్లడించారు. సాయంత్రం వేళ రూ.7 వరకు యూనిట్ ధర పెరుగుతోందన్నారు. అర్ధరాత్రి వేళ యూనిట్‌ ధర రూ.5లోపే ఉంటుందన్నారు. నాణ్యమైన విద్యుత్‌ ఇచ్చేందుకు ప్రభుత్వం కట్టుబడి ఉందని ఇంధనశాఖ కార్యదర్శి స్పష్టం చేశారు.