తెదేపా శ్రేణులపై దాడి జరుగుతుంటే..పోలీసులేం చేస్తున్నారు?

తెదేపా అధినేత చంద్రబాబు ధ్వజం

ఈనాడు, అమరావతి: తెదేపా కార్యకర్తల అరెస్టుపై నిరసనలు తెలియజేసే వారిపై పోలీసులతో దాడి చేస్తారా అని తెదేపా అధినేత చంద్రబాబునాయుడు ధ్వజమెత్తారు. వైకాపా కార్యకర్తల దాడిలో గాయపడి ఆసుపత్రిలో చికిత్స పొందుతున్న గుంటూరు జిల్లా నరసరావుపేట తెదేపా ఇన్‌ఛార్జి డాక్టర్‌ చదలవాడ అరవిందబాబు ఆరోగ్య పరిస్థితిపై ఆయన తెదేపా నేతలతో మాట్లాడారు.ఆసుపత్రిలో ఉన్న బాధితుడితో ఆదివారం చంద్రబాబు ఫోన్‌లో మాట్లాడారు. ‘అక్రమ అరెస్టులపై ప్రశ్నించిన అరవిందబాబు, ఇతర నేతలపై పోలీసులే దౌర్జన్యం చేయడం వారి వైఖరికి అద్దం పడుతోంది. అస్వస్థతకు గురైన నాయకులను తరలించే అంబులెన్స్‌పైనా దాడికి దిగడం వైకాపా అరాచకానికి నిదర్శనం. ఇంత జరుగుతుంటే పోలీసులేం చేస్తున్నారు. ఇది వారి వైఫల్యం కాదా’ అని విమర్శించారు. ఘర్షణకు కారణమైన వైకాపా కార్యకర్తలతోపాటు పోలీసులపైనా చర్యలు తీసుకోవాలని చంద్రబాబు డిమాండు చేశారు.