మహిళా రైతుల పైకి దూసుకెళ్లిన ట్రక్కు

టిక్రీలో ప్రమాదానికి కారణమైన ట్రక్కు

బహదుర్‌గఢ్‌: హరియాణాలో దారుణం జరిగింది. సాగు చట్టాల వ్యతిరేక నిరసన కార్యక్రమంలో పాల్గొని సొంత ఊరికి బయలుదేరిన మహిళా రైతులపైకి ఓ ట్రక్కు దూసుకెళ్లింది. ఈ ఘటనలో ముగ్గురు అక్కడికక్కడే మృతి చెందగా ఇద్దరికి తీవ్ర గాయాలయ్యాయి. గురువారం  తెల్లవారు జామున 5.30 గంటల సమయంలో ఈ ప్రమాదం చోటుచేసుకుంది. పంజాబ్‌లోని మన్సా జిల్లా ఖీవా ద్యాలువాలా గ్రామానికి చెందిన మహిళలు టిక్రీ సరిహద్దులో కొనసాగుతున్న రైతుల నిరసన కార్యక్రమాల్లో పాల్గొన్నారు. గురువారం స్వగ్రామానికి బయలుదేరారు. బహదుర్‌గఢ్‌ రైల్వేస్టేషన్‌కు వెళ్లేందుకు రహదారిపై ఆటో కోసం ఎదురుచూస్తున్నారు. అదే సమయంలో ఓ ట్రక్కు వీరి పైకి వేగంగా దూసుకురావడంతో ప్రమాదం జరిగింది. ట్రక్కు డ్రైవర్‌ పారిపోయాడని, వాహనాన్ని స్వాధీనం చేసుకొని దర్యాప్తు ప్రారంభించినట్లు ఎస్‌పీ వసీమ్‌ అక్రమ్‌ తెలిపారు.