మీటర్లు ఏర్పాటు చేసినా రైతులపై పైసా భారం ఉండదు

మంత్రి పెద్దిరెడ్డి

ఈనాడు, అమరావతి: వ్యవసాయ విద్యుత్‌ కనెక్షన్లకు నగదు బదిలీ పథకం (డీబీటీ) కింద విద్యుత్‌ మీటర్లు ఏర్పాటు చేసినా రైతులపై ఒక్క పైసా భారం పడదని విద్యుత్‌శాఖ మంత్రి పెద్దిరెడ్డి రామచంద్రారెడ్డి పేర్కొన్నారు. మీటర్ల ఏర్పాటుతో రైతులు వినియోగించే విద్యుత్‌ లెక్కల్లో స్పష్టత వస్తుందన్నారు. డీబీటీ, వ్యవసాయానికి పగటి పూట 9 గంటల విద్యుత్‌ అందించే పథకంపై నిర్వహించిన సమీక్ష సమావేశంలో ఆయన మాట్లాడుతూ.. ‘‘నగదు బదిలీ పథకం కోసం ప్రభుత్వమే రైతుల పేరిట బ్యాంకు ఖాతాలు తెరుస్తుంది. దీనికి అనుగుణంగా 97 శాతం మంది రైతులు అంగీకార పత్రాలను డిస్కంలకు అందించారు. మీటర్ల ఏర్పాటుపై రైతుల్లో ఉండే అపోహలను తొలగించడానికి అవగాహనా కార్యక్రమాలు నిర్వహించాలి’’ అని అధికారులను ఆదేశించారు.