Kishan Reddy: ప్రభుత్వాలు చేయలేనివి.. సత్యసాయి చేశారు: కిషన్‌రెడ్డి

ఈనాడు డిజిటల్‌, అనంతపురం, న్యూస్‌టుడే, పుట్టపర్తి: ప్రభుత్వాలు చేయలేని ఎన్నో బృహత్తర కార్యాలను సత్యసాయిబాబా చేసి చూపించారని కేంద్ర మంత్రి కిషన్‌రెడ్డి పేర్కొన్నారు. బుధవారం పుట్టపర్తిలోని ప్రశాంతి నిలయంలో సత్యసాయి 97వ జయంతి వేడుకలు ఘనంగా జరిగాయి. ముఖ్య అతిథిగా హాజరైన కిషన్‌రెడ్డి మాట్లాడుతూ.. ఒకప్పుడు తీవ్రమైన కరవుతో అల్లాడిన అనంతపురం కష్టాలను చూసిన బాబా.. భక్తుల సహకారంతో ప్రజల దాహార్తిని తీర్చారన్నారు. ఒడిశా లాంటి ప్రాంతాల్లోనూ తాగునీటి సదుపాయాలు కల్పించారని తెలిపారు. ఖరీదైన వైద్యాన్ని నిరుపేదలకు అందించిన ఘనత బాబాకు దక్కుతుందన్నారు. విద్య, వైద్య, సామాజిక రంగాల్లో ఎన్నో ప్రాజెక్టులను సత్యసాయి ఒంటిచేత్తోనే పూర్తి చేశారని గుర్తు చేశారు. ఆయనకు 153 దేశాల్లో భక్తులు ఉన్నారని.. ఆయన బోధనల స్ఫూర్తిని మోదీ ప్రభుత్వం కొనసాగిస్తుందన్నారు. 2025లో సత్యసాయి శత జయంతి వేడుకలను కేంద్ర ప్రభుత్వం ఆధ్వర్యంలో నిర్వహిస్తామని వివరించారు.

ప్రధాని శుభాకాంక్షలు

సత్యసాయి జయంతి శుభాకాంక్షలు తెలుపుతూ ప్రధాని నరేంద్ర మోదీ ట్రస్టుకు లేఖ రాశారు. మనుషుల్లో తగ్గిపోతున్న మానవత్వాన్ని బాబా నిస్వార్థ సేవ మేల్కొలిపిందని పేర్కొన్నారు. ‘అందరినీ ప్రేమించు.. అందరినీ సేవించు’ అని బాబా చెప్పిన సూక్తి భవిష్యత్తు తరాలకు స్ఫూర్తిగా నిలుస్తుందన్నారు. తాను బాబా ఆశీర్వాదాలు తీసుకోవడం గొప్ప వరంగా భావిస్తున్నానని వివరించారు.