ప్రకృతి వ్యవసాయ మహిళా రైతు ఉషారాణికి స్త్రీ అవార్డు

ఈనాడు డిజిటల్‌, అమరావతి: ప్రకృతి వ్యవసాయ సాగులో గుంటూరుకు చెందిన మహిళా రైతు కొండా ఉషారాణి జాతీయ స్థాయిలో మొదటి బహుమతి సాధించారు. ఈ నెల 24 నుంచి 26వ తేదీ వరకు దిల్లీలో జాతీయ సైన్స్‌ అండ్‌ టెక్నాలజీ సదస్సు నిర్వహించారు. ఇందులో భాగంగా ఆయుష్‌ సంయుక్త కార్యదర్శి ప్రమోద్‌ కుమార్‌ చేతుల మీదుగా ఆమె స్త్రీ (శాస్త్ర, సాంకేతిక పరిశోధన, ఔత్సాహిక పారిశ్రామికవేత్తల ప్రోత్సాహకం) అవార్డును అందుకున్నారని రైతు సాధికార సంస్థ ఆదివారం ఒక ప్రకటనలో వెల్లడించింది. ఈ సదస్సుకు ఉషారాణి, అనంతపురం జిల్లాకు చెందిన వనూరమ్మ పేర్లను రైతు సాధికార సంస్థ ప్రతిపాదించింది. వీరిద్దరూ ప్రకృతి వ్యవసాయం చేయడంవల్ల రసాయన రహిత ఆహారాన్ని సమాజానికి అందించడంతోపాటు వాతావరణ కాలుష్యాన్ని నివారించవచ్చనే అంశంపై పవర్‌ పాయింట్‌ ప్రజెంటేషన్‌ ఇచ్చినట్లు పేర్కొంది.