Bapatla: శభాష్‌ బాషా.. ఇంటి వ్యర్థాలతో రోడ్లపై గుంతలు పూడ్చిన కూలీ

చినగంజాం, న్యూస్‌టుడే: గుంతలు పడిన రోడ్లకు ప్రభుత్వం ఎలాంటి మరమ్మతులు చేయకపోయినా.. ఓ కూలీ మాత్రం సమాజహితం కోరి తన ఇంటిలోని వ్యర్థాలతో చినగంజాం, పల్లెపాలెం ఆర్‌అండ్‌బీ రహదారులపై ఉన్న గోతులను పూడ్చుతున్నారు. బాపట్ల జిల్లా చినగంజాం మసీదుపేటకు చెందిన షేక్‌ బాషా ఉప్పు కొఠారుల్లో కూలీ పనులు చేస్తుంటారు. అతని పాతఇంటికి మరమ్మతులు చేయిస్తున్న క్రమంలో, ఆ ఇంటి నిర్మాణ వ్యర్థాలను బాషా బుధవారం ఆటోలో తెచ్చి రోడ్డుపై ఉన్న గుంతల్లో పోసి పూడ్చారు. అదిచూసిన పలువురు ఆయనను అభినందించారు. కాగా చినగంజాం, పల్లెపాలెం గ్రామాల మధ్య సుమారు నాలుగు కిలోమీటర్ల తారురోడ్డు ఉంది. ఆ రహదారిపై చాలావరకు గుంతలు పడటంతో వాహన చోదకులు, కూలీలు ఇబ్బంది పడుతున్నారు.