సీఎం సభకు వెళ్లే బస్సుల అడ్డగింత

విడవలూరు, న్యూస్‌టుడే: ‘మేమంతా సిద్ధం’ సభకు ఆర్టీసీ బస్సులన్నీ తరలిస్తే.. ప్రయాణికుల పరిస్థితి ఏంటని? శ్రీపొట్టి శ్రీరాములు నెల్లూరు జిల్లా విడవలూరు మండలం అన్నారెడ్డిపాలేనికి చెందిన మడపర్తి రాంప్రసాద్‌ శనివారం నిరసనకు దిగారు. కావలిలో జరిగిన సీఎం జగన్‌ సభకు బస్సులు పంపించడంతో ప్రయాణికులు ఇబ్బందులు ఎదుర్కొన్నారు. విడవలూరు మండలం ఊటుకూరు నుంచి కావలిలో జరిగే సీఎం సభకు ఆరు బస్సులు బయలుదేరి వెళ్తుండగా.. అన్నారెడ్డిపాలెం వద్ద వాటిని రాంప్రసాద్‌ అడ్డుకుని, అడ్డంగా పడుకున్నారు. పెళ్లిళ్ల సీజన్‌, ఇతర అవసరాల నేపథ్యంలో ప్రజలు బస్సుల్లేక ఇబ్బందులు పడుతుంటే రాజకీయ సభలకు ఎలా నడుపుతారని ఆగ్రహం వ్యక్తం చేశారు. దీంతో బస్సు డ్రైవర్‌ విడవలూరు పోలీసుస్టేషన్‌లో ఫిర్యాదు చేశారు. తనను అసభ్య పదజాలంతో రాంప్రసాద్‌ దూషిస్తూ బస్సుపై దాడి చేశారని అందులో పేర్కొన్నారు. ఈ మేరకు కేసు నమోదు చేస్తున్నట్లు పోలీసులు తెలిపారు.