ప‌రిశీల‌న‌లోని ప‌న్ను చెల్లింపుదారుల‌కు ఫేస్‌లెస్ అసెస్‌మెంట్ స‌మాచారం

ఆదాయ పన్ను(ఐటీ) విభాగం తమ పరిశీలనలో ఉండే మదింపుదార్లకు ఫేస్‌లెస్‌ అసెస్‌మెంట్‌ విషయంపై త్వరలో సమాచారాన్ని పంపనున్నట్లు ఒక పన్ను అధికారి తెలిపారు. 'అంతక్రితం నోటీసులు ఏమీ పక్కకు వెళ్లవు. ముందుగా ఫేస్‌లెస్‌ అసెస్‌మెంట్‌ పథకం కింద మదింపు చేసే వారికి సమాచారం పంపిస్తాం.

ఒక వేళ మదింపు అధికారి మరింత సమాచారం కావాలని భావిస్తే సెక్షన్‌ 142(1) కింద తాజా నోటీసులు పంపిస్తార’ని సీబీడీటీ అదనపు కమిషనర్‌ జైశ్రీ శర్మ పేర్కొన్నారు. రీఅసెస్‌మెంట్‌ కేసులు కూడా ఇక ఫేస్‌లెస్‌ పథకంలో భాగంగా మారనున్నాయని స్పష్టం చేశారు. ఈ పథకంలో భాగంగా మదింపుదార్లకు, పన్ను అధికార్లకు మధ్య భౌతికంగా ఎటువంటి సంబంధాలు ఉండవు. అన్నీ ఎలక్ట్రానిక్‌ పద్ధతిలోనే జరుగుతాయి.

పన్ను చెల్లింపుదారులతో అన్ని కమ్యూనికేషన్లు ఇక‌పై ఫేస్‌లెస్ అసెస్‌మెంట్ ద్వారా జ‌రుగుతాయ‌ని ఈ నెల ప్రారంభంలోనే తెలియ‌జేసింది. అటువంటి నోటీసులు అందుకున్న‌వారు పన్ను కార్యాలయాన్ని సందర్శించాల్సిన అవసరం లేకుండా లేదా ఏ అధికారిని కలవవలసిన అవసరం లేకుండా ఎలక్ట్రానిక్ పద్ధతిలో స్పందించవ‌చ్చు.