రైలు ప్రమాద బాధితులకు వేగంగా క్లెయింల పరిష్కారం: ఐఆర్‌డీఏఐ ఆదేశం

ఈనాడు, హైదరాబాద్‌: ఒడిశా రైలు ప్రమాద బాధితులకు సంబంధించిన బీమా క్లెయింలను వేగంగా పరిష్కరించాలని బీమా కంపెనీలను, భారతీయ బీమా నియంత్రణ, అభివృద్ధి ప్రాధికార సంస్థ (ఐఆర్‌డీఏఐ) ఆదేశించింది. జీవిత, సాధారణ, ఆరోగ్య బీమా సంస్థలు ఇందుకోసం తగిన చర్యలు తీసుకోవాల్సిందిగా ఆదేశించింది. కష్టకాలంలో బాధితులను ఆదుకోవాల్సిన బాధ్యత బీమా సంస్థలకు ఉందని, అర్హులైన వారి క్లెయింల పరిష్కారాన్ని వేగంగా చేయాలని తెలిపింది. బెంగళూరు-హావ్‌డా, కోరమాండల్‌ సూపర్‌ఫాస్ట్‌ ఎక్స్‌ప్రెస్‌ రైళ్లు ప్రమాదానికి గురవడం వల్ల 275 మందికి పైగా మరణించడం, 1,000 మందికి పైగా ప్రయాణికులు గాయపడిన విషయం విదితమే. ఈ నేపథ్యంలో బాధితులకు ఆసరాగా నిలిచేందుకు ఐఆర్‌డీఏఐ బీమా సంస్థలకు మార్గదర్శకాలు విడుదల చేసింది.
* ప్రతి బీమా సంస్థ ప్రత్యేకంగా ఒక సహాయ కేంద్రాన్ని ఏర్పాటు చేయాలి. ఉన్నతాధికారిని నోడల్‌ అధికారిగా నియమించి, క్లెయింలకు సంబంధించిన వివరాలన్నీ వెబ్‌సైట్లలో పెట్టాలని తెలిపింది. మరణించిన వారికి సంబంధించి అధికారులు ఇచ్చిన వివరాలను తీసుకుని, తమ పాలసీదారులలో వారెవరైనా ఉన్నారా అన్నదీ బీమా సంస్థలు పరిశీలించాలని సూచించింది.