Accident: ట్రాక్టర్‌ను ఢీకొట్టిన స్కూల్‌ బస్సు.. నలుగురు విద్యార్థులు మృతి

బాగల్‌కోట్‌: పాఠశాల బస్సు, ట్రాక్టర్‌ను ఢీకొట్టిన ఘటన పలు కుటుంబాల్లో తీవ్ర విషాదం నింపింది. కర్ణాటకలోని బాగల్‌కోట్‌ జిల్లా అలగూరు సమీపంలో సోమవారం ఉదయం జరిగిన ఈ దుర్ఘటనలో నలుగురు విద్యార్థులు మృతి చెందినట్లు పోలీసులు వెల్లడించారు.  ఈ ప్రమాదంలో మరో 8 మందికి గాయాలయ్యాయి. ఈ విద్యార్థులంతా వర్ధమాన్‌ మహావీర్‌ ఎడ్యుకేషనల్‌ సొసైటీకి చెందినవారిగా గుర్తించారు.  వీరంతా ఆదివారం రాత్రి కవటగిరిలో పాఠశాల వార్షికోత్సవానికి హాజరై తిరిగివస్తుండగా ఈ ఘటన చోటుచేసుకుంది. మృతి చెందిన విద్యార్థుల వయసు 13 నుంచి 17 ఏళ్ల మధ్య ఉంటుందని పోలీసులు తెలిపారు.  క్షతగాత్రులను సమీపంలోని ఆస్పత్రికి తరలించి చికిత్స అందిస్తున్నారు.

సీఎం సంతాపం.. మృతులకు పరిహారం

ఈ ప్రమాదంపై సీఎం సిద్ధరామయ్య ‘ఎక్స్‌’ వేదికగా స్పందించారు. మృతులకు తన సంతాపం ప్రకటించిన ఆయన.. విద్యార్థుల మృతిపై విచారం వ్యక్తంచేశారు. ఈ ఘటనలో మృతుల కుటుంబాలకు ₹2 లక్షలు, క్షతగాత్రులకు ₹50వేలు  చొప్పున పరిహారం ప్రకటించారు.