మెట్రోలో సీటు కోసం వివాదం..తోటి ప్రయాణికురాలిపై పెప్పర్‌ స్ప్రే చల్లిన మహిళ

దిల్లీ: మెట్రోరైల్లో సీటు కోసం తలెత్తిన వివాదంలో ఆగ్రహానికి గురైన ఓ యువతి తోటి ప్రయాణికురాలిపై పెప్పర్‌ స్ప్రే చల్లిన ఘటన ఆలస్యంగా వెలుగుచూసింది. దీనికి సంబంధించిన వీడియో సామాజిక మాధ్యమాల్లో చక్కర్లు కొట్టడంతో విషయం వెలుగుచూసింది. వివరాల్లోకి వెళ్లితే..

దిల్లీ(Delhi)లోని ఓ మెట్రోలో ప్రయాణిస్తున్న ఇద్దరు మహిళలు ఒకే వరుసలో కూర్చొని సీటు కోసం గొడవపడుతున్నట్లు వీడియోలో ఉంది. ఒక మహిళ తోటి ప్రయాణికురాలిపై కోపంగా అరుస్తూనే ఉంది. ఈ క్రమంలో ఆగ్రహానికి గురైన మహిళ బ్యాగులో నుంచి పెప్పర్‌ స్ప్రే తీసి ప్రయాణికురాలిని బెదిరింపులకు గురిచేసింది. ప్రయాణికురాలు ఆమెకు సర్దిచెప్పే ప్రయత్నం చేస్తున్నా వినకుండా..బాటిల్‌ మూత తిప్పి స్ప్రే చల్లింది. తర్వాత అక్కడ నుంచి లేచి వెళ్లిపోయింది. కొన్ని క్షణాల్లోనే ఆ వాసన కంపార్ట్‌మెంట్‌ అంతా వ్యాపించడంతో ఆ ఘాటుకు ప్రయాణికులు ఇబ్బంది పడ్డారు. ఇదంతా వీడియో తీసిన ఓ వ్యక్తి ట్విటర్‌లో పోస్టు చేయడంతో దిల్లీ మెట్రో రైల్‌ కార్పొరేషన్‌ స్పందించింది. సంఘటన జరిగిన మెట్రో కోచ్‌ నంబర్‌ పంపమని ఆ వ్యక్తిని కోరింది. ఈ వీడియో చూసిన నెటిజన్లు ప్రజా రవాణాలో ఇటువంటి గొడవలు జరగకుండా అధికారులు తగిన చర్యలు తీసుకోవాలని కామెంట్లు పెడుతున్నారు.