Chittoor: పోలీసుస్టేషన్‌ ఆవరణలో పేలిన జిలెటిన్‌ స్టిక్స్‌.. ధ్వంసమైన కిటికీలు, తలుపులు

గంగాధర నెల్లూరు: చిత్తూరు జిల్లా గంగాధర నెల్లూరు పోలీసుస్టేషన్‌ ఆవరణలో పేలుడు సంభవించింది. స్టేషన్‌ ఆవరణలో నిల్వ ఉంచిన నల్లమందు, జిలెటిన్‌ స్టిక్స్‌ శనివారం తెల్లవారుజామున ఒక్కసారిగా పేలిపోయాయి. మండల పరిధిలో క్వారీలకు అక్రమంగా రవాణా అవుతున్న నల్లమందు, జిలెటిన్‌ స్టిక్స్‌ను ఇటీవల పోలీసులు స్వాధీనం చేసుకొని పోలీసుస్టేషన్‌ ఆవరణలో ఉంచారు. శనివారం తెల్లవారుజామున అకస్మాత్తుగా భారీ శబ్దంతో నల్లమందు, జిలెటిన్‌ స్టిక్స్‌ పేలిపోయాయి. దీంతోపాటు పక్కనే ఉన్న ద్విచక్రవాహనాలు కూడా దగ్ధమయ్యాయి. భారీ శబ్దానికి స్టేషన్‌తోపాటు సమీపంలోని ఇళ్లలోని కిటికీలు, తలుపులు ధ్వంసమయ్యాయి. పేలుడు సంభవించిన సమయంలో జన సంచారం లేకపోవడంతో పెద్ద ప్రమాదం తప్పింది.