జమ్మూకశ్మీర్‌లో ఘోర రోడ్డు ప్రమాదం..

ఏడుగురు మృతి

శ్రీనగర్‌: జమ్మూకశ్మీర్‌లోని రాజౌరీ జిల్లాలో గురువారం ఘోర రోడ్డు ప్రమాదం చోటుచేసుకుంది. బస్సు అదుపుతప్పి లోయలో పడిపోవడంతో ఏడుగురు దుర్మరణం పాలయ్యారు. పోలీసులు మీడియాకు తెలిపిన వివరాల ప్రకారం.. ప్రయాణికులతో పూంచ్‌లోని సురాన్‌కోట్‌ నుంచి జమ్మూకు బయలు దేరిన బస్సు రాజౌరీలోని లంబేరీ వద్ద అదుపుతప్పి లోయలో పడిపోవడంతో ప్రమాదం చోటుచేసుకుంది. ఈ ఘటనలో 7గురు మరణించగా.. 24 మంది గాయాలపాలయ్యారు. గాయపడిన వారిలో కొందరి పరిస్థితి విషమంగా ఉందని పోలీసులు తెలిపారు. నిర్లక్ష్యంగా బస్సు నడపడమే ప్రమాదానికి ప్రధాన కారణమై ఉండవచ్చని వారు భావిస్తున్నారు. విచారణ కొనసాగుతోందని అధికారులు తెలిపారు. ప్రమాద స్థలం జమ్మూకు 160 కిలోమీటర్ల దూరంలో ఉంది. మృతి చెందిన వారి వివరాలు ఇంకా తెలియరాలేదు. సహాయ చర్యలు కొనసాగుతున్నాయి.