నరసన్నపేట: శ్రీకాకుళం జిల్లా నరసన్నపేటలో పోస్టల్‌ బ్యాలెట్‌ పోలింగ్‌ కేంద్రాల వద్ద గందరగోళం నెలకొంది. ఓటు హక్కు వినియోగించుకునేందుకు ఉద్యోగులు పెద్ద సంఖ్యలో వచ్చారు. పోలింగ్‌ ఉదయం 7 గంటలకు ప్రారంభించాల్సి ఉండగా.. సిబ్బంది రాక ఆలస్యం కావడంతో 9.30 గంటల వరకు కేంద్రాన్ని తెరవలేదు. పోలింగ్‌ కేంద్రం తెరిచాక ఒకేసారి అధిక సంఖ్యలో ఉద్యోగులు లోపలికి ప్రవేశించారు. దీంతో గందరగోళం నెలకొంది. బూత్‌లోని పోలింగ్‌ కంపార్ట్‌మెంట్‌లోకి ముగ్గురు, నలుగురు ఒకేసారి వెళ్లడం గమనార్హం. దీంతో రహస్యంగా వేయాల్సిన ఓటును.. ఓపెన్‌గానే వేశారు. మరోవైపు వైకాపా నాయకులు పోలింగ్‌ కేంద్రాల వద్దకు వెళ్లి ప్రచారం చేశారు. కొందరు ఉద్యోగులను ప్రలోభాలకు గురిచేసేందుకు యత్నించారు. ఇంత జరుగుతున్నా అక్కడ పోలీసులు కనిపించలేదు.