కెనడాలో కాల్పులు.. భారత విద్యార్థి మృతి

ఒట్టావా: కెనడాలోని వాంకోవర్‌లో చిరాగ్‌ అంటిల్‌ (24) అనే భారతీయ విద్యార్థి హత్యకు గురయ్యాడు. అతడు కారులో ఉండగా దుండగులు కాల్పులు జరిపినట్లు సమాచారం. విద్యార్థి మృతి విషయాన్ని సౌత్‌ వాంకోవర్‌ పోలీసులు వెల్లడించారు. ‘కాల్పుల శబ్దం వినిపించినట్లు ఈ నెల 12న రాత్రి 11 గంటల సమయంలో స్థానిక పోలీసులకు సమాచారం వచ్చింది. ఘటనా స్థలికి వెళ్లి పరిశీలించగా.. కారులో చిరాగ్‌ విగత జీవిగా పడి ఉన్నాడు. ఈ ఘటనపై దర్యాప్తు కొనసాగుతోంది. ఇప్పటివరకు ఎవర్నీ అరెస్టు చేయలేదు’ అని వాంకోవర్‌ పోలీసులు ఆదివారం ప్రకటించారు. చిరాగ్‌ హరియాణాకు చెందిన వ్యక్తి.