విలేకరిపై మంత్రి అనుచరుల దాడి

ఆలూరు గ్రామీణ, న్యూస్‌టుడే: కర్నూలు జిల్లా ఆలూరులో ఓ పత్రికా విలేకరి (ఈనాడు కాదు) చంద్రమోహన్‌పై కార్మికశాఖ మంత్రి గుమ్మనూరు జయరాం అనుచరులు సోమవారం దాడికి పాల్పడ్డారు. బాధితుడు తెలిపిన ప్రకారం... ఆలూరులోని ఎల్లార్తి రహదారిలో చంద్రమోహన్‌ ద్విచక్ర వాహనంపై వెళ్తుండగా మంత్రి అనుచరులు వీరాంజి, మంజులతోపాటు మరికొందరు కలిసి ఆపారు. ‘మంత్రికి వ్యతిరేకంగా వార్తలు రాస్తావా?’ అని దుర్భాషలాడుతూ రాళ్లతో దాడికి పాల్పడ్డారు. దాంతో చంద్రమోహన్‌ తలకు, వీపుపై బలమైన గాయాలయ్యాయి. అడ్డుకోబోయిన మరో విలేకరీ గాయపడ్డారు. పోలీసులు కేసు నమోదు చేశారు.