రుణయాప్‌ వేధింపులతో.. యువకుడి ఆత్మహత్య

ధవళేశ్వరం, న్యూస్‌టుడే: రుణయాప్‌ నిర్వాహకుల వేధింపులకు తాళలేక మరో యువకుడు బలవన్మరణానికి పాల్పడ్డారు. ధవళేశ్వరం సీఐ కె.మంగాదేవి కథనం మేరకు.. తూర్పుగోదావరి జిల్లా నల్లజర్ల మండలం దూబచర్లకు చెందిన కొరశిఖ శ్రీనివాసరావు(25) ధవళేశ్వరం పరిధిలోని విద్యుత్తు ఉపకేంద్రంలో షిఫ్ట్‌ ఆపరేటరుగా పనిచేస్తున్నారు. బడ్డీ క్యాష్‌ రుణయాప్‌ ద్వారా రుణం తీసుకొని తిరిగి చెల్లించారు. అయినప్పటికీ యాప్‌ నిర్వాహకులు ఇంకా డబ్బు కట్టాలని, లేదంటే సెల్‌ఫోన్‌ హ్యాక్‌ చేస్తామని బెదిరించారు. మీ బంధువుల ఫోన్‌నంబర్లకు అసభ్య సందేశాలు పంపుతామని హెచ్చరించారు. వారి వేధింపులు పెరగడంతో శనివారం మధ్యాహ్నం పనిచేసే కార్యాలయంలోనే శ్రీనివాసరావు ఉరేసుకున్నట్లు సీఐ తెలిపారు. మృతుడి తండ్రి వెంకటరావు ఫిర్యాదు మేరకు కేసు నమోదు చేశామని, మృతదేహాన్ని శవపరీక్ష నిమిత్తం రాజమహేంద్రవరం జీజీహెచ్‌కు తరలించామని తెలిపారు.