కౌలు రైతు ఆత్మహత్యాయత్నం

నకిలీ వరి విత్తనాలు విక్రయించారని ఆరోపణ

కేసముద్రం, న్యూస్‌టుడే: నకిలీ విత్తనాల కారణంగా పది ఎకరాల్లో సాగు చేసిన వరి పూర్తిగా నష్టపోయినట్లు మహబూబాబాద్‌ జిల్లా గూడూరు మండలం తీగలవేణి శివారు పాటిమీది తండాకు చెందిన రమేశ్‌ దంపతులు వెల్లడించారు. వీరు మంగళవారం కేసముద్రంలో విత్తనాలు విక్రయించిన ఎరువుల దుకాణం ఎదుట పురుగుల మందు డబ్బాతో ఆందోళన చేశారు. పురుగుల మందు తాగేందుకు రమేశ్‌ ప్రయత్నించగా పక్కనే ఉన్నవారు అడ్డుకున్నారు. 1001 రకం విత్తనాలు అడిగితే దుకాణదారు మరో రకం అంటగట్టినట్లు రైతు ఆరోపించారు. ప్రస్తుతం వరి కంకిపోసే దశలో ఉండగా గింజ తాలుగా మారిందన్నారు. సుమారు రూ.2 లక్షలు నష్టపోయినట్లు కన్నీరు పెట్టుకున్నారు. వ్యవసాయాధికారులకు ఫిర్యాదు చేసినా ఫలితం లేకపోవడంతో దుకాణం ఎదుట పురుగుల మందు తాగి ఆత్మహత్య చేసుకునేందుకు వచ్చినట్లు తెలిపారు. ఎస్సై తిరుపతి.. రైతు దంపతులకు సర్దిచెప్పి అక్కడి నుంచి తీసుకెళ్లారు.