UP: రసాయన పరిశ్రమలో పేలుడు.. తొమ్మిది మంది మృతి

హాపూర్‌: ఉత్తర్‌ప్రదేశ్‌లోని హాపూర్‌ జిల్లాలో ఓ రసాయన పరిశ్రమలో భారీ పేలుడు సంభవించింది. పరిశ్రమలోని బాయిలర్‌ పేలడంతో తొమ్మిది మంది మృతిచెందగా.. దాదాపు 15మందికి గాయాలయ్యాయి. సమాచారం అందుకున్న పోలీసులు, ఫైరింజన్లు అక్కడికి చేరుకొని సహాయక చర్యలు కొనసాగిస్తున్నాయి. దిల్లీకి దాదాపు 80కి.మీల దూరంలోని ధౌలానాలోని యూపీఎస్‌ఐడీసీ పారిశ్రామిక ప్రాంతంలో ఈ దుర్ఘటన చోటుచేసుకున్నట్టు పోలీసు ఉన్నతాధికారులు తెలిపారు. 

ఈ పేలుడు ధాటికి చుట్టుపక్కల ఉన్న కొన్ని ఫ్యాక్టరీల పైకప్పులు సైతం దెబ్బతిన్నట్టు పోలీసులు తెలిపారు. ఫ్యాక్టరీలో మంటలను అదుపు చేసేందుకు అగ్నిమాపక సిబ్బందికి మూడు గంటల సమయం పట్టిందన్నారు. ఈ ఘటనలో తొమ్మిది మంది మృతిచెందగా.. పలువురికి గాయాలైనట్టు మేరఠ్‌ రేంజ్‌ ఐజీ ప్రవీణ్‌ కుమార్‌ తెలిపారు. వీరిని 15 మందిని ఆస్పత్రిలో చేర్పించినట్టు వెల్లడించారు. 

ఈ ఘటనపై యూపీ సీఎం యోగి ఆదిత్యనాథ్‌, పరిశ్రమల శాఖ మంత్రి నందగోపాల్‌ గుప్తా విచారం వ్యక్తంచేశారు. మృతుల కుటుంబాలకు తన ప్రగాఢ సానుభూతి తెలిపారు. స్థానిక అధికారులు తక్షణమే ఘటనా స్థలానికి వెళ్లి సహాయక చర్యలు కొనసాగించాలని సీఎం ఆదేశించినట్టు సీఎంవో తెలిపింది. బాధితులకు, వారి కుటుంబాలకు అవసరమైన సహాయ సహకారాలు అందించాలని సూచించినట్టు ట్వీట్‌ చేసింది.